មន្ត្រីជាន់ខ្ពស់នៃក្រសួងសុខាភិបាលកម្ពុជាថ្លែងថា កម្ពុជាតាមរយៈក្រសួងមួយនេះនៅតែបន្តតាមដានយ៉ាងដិតដល់លើការវិវត្តនៃវីរុស និងស្ថានភាពអ្នកឆ្លងមេរោគបំប្លែងថ្មី «អូមីក្រុង» ដើម្បីបញ្ចៀសការចម្លងចូលទៅក្នុងសហគមន៍។
ការលើកឡើងយ៉ាងដូច្នេះ ធ្វើឡើងបន្ទាប់ពីក្រសួងសុខាភិបាលនៅថ្ងៃអង្គារនេះ បានចេញសេចក្ដីប្រកាសព័ត៌មានថាបានរកឃើញអ្នកឆ្លងកូវីដ-១៩ថ្មីចំនួន៥នាក់បន្ថែមទៀតកាលពីថ្ងៃទី២៧ ខែធ្នូ ម្សិលមិញ ក្នុងនោះមានប្រភេទបំប្លែងខ្លួន «អូមីក្រុង» ២ករណី ដែលជាអ្នកដំណើរមកពីក្រៅប្រទេស ឬជាករណីនាំចូល។ ប្រភពដដែលបញ្ជាក់ថា នៅថ្ងៃជាមួយគ្នានោះក៏មានករណីស្លាប់ម្នាក់ ខណៈអ្នកជាសះស្បើយថ្មីមានចំនួន១១នាក់ផងដែរ។
គិតមកទល់ថ្ងៃនេះ ចំនួនអ្នកឆ្លងមេរោគប្រភេទបំប្លែងខ្លួន «អូមីក្រុង» នៅកម្ពុជាកើនឡើងដល់៣៣ករណី ខណៈ៣ករណីត្រូវបានព្យាបាលជាសះស្បើយ។
អគ្គនាយកបច្ចេកទេសនៃក្រសួងសុខាភិបាលកម្ពុជា លោកវេជ្ជបណ្ឌិត ហុក គឹមចេង ថ្លែងប្រាប់ វីអូឌី នៅថ្ងៃទី២៨ ខែធ្នូនេះថា ក្រសួងសុខាភិបាលកំពុងតាមដានអ្នកជំងឺបំប្លែងថ្មី «អូមីក្រុង» ដោយដាក់ឱ្យអ្នកទាំងនោះសម្រាកព្យាបាលនៅមជ្ឈមណ្ឌលមួយកន្លែងដាច់ដោយឡែកពីអ្នកជំងឺកូវីដ-១៩ ធម្មតាផ្សេងទៀត។
លោកថា បើតាមការសង្កេត អ្នកជំងឺទាំងនោះមានស្ថានភាពស្រាលៗ មិនមានជាបញ្ហាអ្វីធ្ងន់ធ្ងរគួរឱ្យព្រួយបារម្ភទេ យ៉ាងណាក្រុមគ្រូពេទ្យកំពុងតាមដានយ៉ាងម៉ត់ចត់លើបញ្ហានេះបន្ថែមទៀត។
លោកវេជ្ជបណ្ឌិត ហុក គឹមចេង ថា៖ «ទោះបីអូមីក្រុងក៏ដោយ អីក៏ដោយ ក៏យើងត្រូវតែធ្វើម៉េចឱ្យការការពាររបស់យើងហ្នឹងគឺបានជាប់ជាប្រចាំ។ ហើយក្រសួងនឹងបន្តតាមដានទៅលើការវិវត្តនៃអូមីក្រុងហ្នឹងទៀត យើងក៏គ្រប់គ្រងទៅលើអ្នកជំងឺហ្នឹង។ ហើយអ្នកជំងឺ [អូមីក្រុង] ដែលយើងរកឃើញហ្នឹងក៏គាត់បានសម្រាកព្យាបាល។ យើងបានតាមជាប់រហូតដែរ ឃើញថាអ្នកជំងឺទាំងអស់ហ្នឹងគឺគាត់មានសភាពស្រាលទេ តែទោះបីយ៉ាងណាក៏ដោយ ក៏យើងនៅតែមានការប្រុងប្រយ័ត្នទាំងអស់គ្នា»។
លោក ហុក គឹមចេង បន្តថា តាមការស្រាវជ្រាវអ្នកជំនាញរកឃើញថា វីរុសបំប្លែងថ្មី «អូមីក្រុង» អាចចម្លងមេរោគបានលឿនជាងវីរុសកូវីដ-១៩បំប្លែងខ្លួនដទៃ។
យ៉ាងណា លោកថា អ្វីដែលពលរដ្ឋត្រូវយកចិត្តទុកដាក់គឺការយល់ដឹង ប្រុងប្រយ័ត្ន ការពារ ដោយមិនសំខាន់លើការឆ្លងលឿនឬយឺតឡើយ ពោលលោកថា ករណីឆ្លងអាចកើតឡើងដោយមិនអាចកំណត់បាន ឱ្យតែបុគ្គលនោះភ្លេចខ្លួន។
ពលរដ្ឋរស់នៅក្រុងប៉ោយប៉ែត ខេត្តបន្ទាយមានជ័យ មួយរូប ថ្លែងក្នុងលក្ខខណ្ឌសុំមិនបញ្ចេញឈ្មោះលើកឡើងថា ជំងឺកូវីដ-១៩ទាមទារឱ្យពលរដ្ឋមានការប្រុងប្រយ័ត្ន។ យ៉ាងណា កញ្ញាថា វាលែងជាករណីគួរឱ្យបារម្ភខ្លាំងដូចមុនហើយ បើទោះនេះជាករណីបំប្លែងថ្មី «អូមីក្រុង» ក៏ដោយ។
កញ្ញាបន្តថា៖ «វាដូចជាលែងជាបញ្ហាគួរឱ្យបារម្ភហើយ គ្រាន់តែថាយើងត្រូវការពារខ្លួន។ ហើយពេលដែលយើងឆ្លងហ្នឹង យើងត្រូវធ្វើម៉េចៗអ៊ីចឹង គ្រប់គ្នា ទាំងក្រុមគ្រូពេទ្យ និងប្រជាជន គេដឹងថាត្រូវធ្វើម៉េច! អ៊ីចឹងទោះបីមានករណីឆ្លង ប្រជាជនផ្ទាល់ដឹងថាត្រូវជួបព្យាបាលរបៀបម៉េច! វាគួរឱ្យបារម្ភ តែវាមិនខ្លាំងទេ វាដូចជាជំងឺធម្មតាហើយ»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា កន្លងទៅ ប្រជាជនកម្ពុជាបាត់បង់ជីវិតដោយសារកូវីដ-១៩ប្រភេទ «ដែលតា» ដែលហូរចូលខ្លាំងតាមច្រកព្រំដែនថៃ។ យ៉ាងណា លោកថា ករណី «អូមីក្រុង» វិញ លោកមិនច្បាស់ទេ ថាវាត្រូវបាននាំចូលតាមច្រកព្រំដែនថៃ ឬវៀតណាម ឬតាមផ្លូវអាកាស។
លោកបន្តថា កម្ពុជាគួរតែបើកទូលាយនូវទេសចរចូលប្រទេស តែត្រូវមានវិធានការពិនិត្យនិងការពារឱ្យច្បាស់លាស់តាមច្រកនានា មិនថាផ្លូវអាកាស ផ្លូវគោក និងផ្លូវទឹកនោះឡើយ។
លោកថា៖ «សូមឱ្យមានវិធានការតាមច្រកទាំងអស់ហ្នឹងទៅ ហើយយើងកុំបិទ [Lockdown] ដូចកាលមុន។ អ៊ីចឹងហើយយើងរៀនរស់នឹងកូវីដ-១៩ ហើយយើងប្រុងប្រយ័ត្នទាំងអស់គ្នា ឱ្យមន្ត្រីជំនាញតាមច្រកទាំងអស់ហ្នឹង ឱ្យគាត់ចេះការពារនូវច្រកចេញចូលនីមួយៗ ដូចជា ច្រកហោះហើរ ច្រកផ្លូវគោក ផ្លូវទឹក។ បើសិនជាយើងបណ្ដោយតាមច្រកហ្នឹង ហើយយើងអត់ធ្វើតេស្ត អត់ត្រួតពិនិត្យបានត្រឹមត្រូវ វាអាចនឹងមានផលវិបាកទៅថ្ងៃក្រោយ»។
បើតាមក្រសួងសុខាភិបាល គិតត្រឹមព្រឹកថ្ងៃទី២៨ ខែធ្នូនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួនជាង១២ម៉ឺននាក់ (១២០ ៤៦៩) ក្នុងនោះ អ្នកជំងឺព្យាបាលជាសះស្បើយសរុបមានចំនួនជាង១១ម៉ឺននាក់ (១១៦ ៨៨៥) ហើយអ្នកស្លាប់សរុបជាង៣ពាន់នាក់ (៣ ០១០) និងករណីនាំចូលពីក្រៅប្រទេសសរុបជិត២ម៉ឺននាក់ (១៩ ៨៩០)។
កាលពីយប់ថ្ងៃទី២៦ ខែធ្នូ លោកនាយករដ្ឋមន្ត្រី ហ៊ុន សែន អះអាងថា កម្ពុជាកំពុងគ្រប់គ្រងការឆ្លងមេរោគបំប្លែងខ្លួនថ្មី «អូមីក្រុង» មិនឱ្យរីករាលដាលចូលទៅក្នុងសហគមន៍នោះឡើយ។
យ៉ាងណា លោក ហ៊ុន សែន ក៏អំពាវនាវទៅប្រជាពលរដ្ឋទាំងអស់ឱ្យប្រុងប្រយ័ត្នខ្ពស់ចំពោះការឆ្លងមេរោគបំប្លែងខ្លួនថ្មីនេះ ដោយត្រូវចូលរួមទប់ស្កាត់មិនឱ្យឆ្លងចូលទៅក្នុងសហគមន៍ ត្បិតវីរុសកូវីដ-១៩បំប្លែងខ្លួនថ្មីនេះមានលទ្ធភាពចម្លងលឿនជាងប្រភេទបំប្លែងខ្លួនផ្សេងទៀត ដូចជាដែលតា ឬ អាល់ហ្វា៕