ការចរចារកដំណោះស្រាយ លើវិវាទការងាររវាងបុគ្គលិកក្រុមហ៊ុនកាស៊ីណូណាហ្គាវើលដ៍ និងតំណាងរបស់ក្រុមហ៊ុនកាលពីថ្ងៃម្សិលមិញនេះ បានបរាជ័យជាលើកទី៥។
យោងតាមសេចក្តីជូនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈកាលពីថ្ងៃទី២៧ខែធ្នូ បានឱ្យដឹងថា ភាគីទាំងពីរនៅតែប្រកាន់ជំហររៀងៗខ្លួន ដោយភាគីសហជីពតំណាងឱ្យបុគ្គលិក ៣៥៧ នាក់ ដឹកនាំដោយកញ្ញា ឈឹម ស៊ីថរ និងលោកមេធាវី ហម ស៊ុនរិទ្ធិ នៅតែបន្តទាមទារឱ្យក្រុមហ៊ុនទទួលយកបុគ្គលិកទាំង ៣៥៧នាក់ចូលធ្វើការវិញ។ ចំណែកលោក Mike Ngai តំណាងឱ្យភាគីក្រុមហ៊ុនវិញ នៅតែរក្សាជំហរមិនព្រមទទួលយកពួកគេឱ្យចូលធ្វើការវិញទេ ដោយឯកភាពទូទាត់សំណងត្រឹមត្រូវតាមច្បាប់ការងារ។
កិច្ចចរចានេះ ធ្វើឡើងក្រោមការសម្របសម្រួលពីលោក ទេស រុក្ខាផល អគ្គលេខាធិការនៃអគ្គលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្ម និងបាតុកម្ម នៅតាមគ្រប់មុខសញ្ញារបស់ក្រសួងការងារ និងបណ្តុះបណ្តាលវិជ្ជាជីវៈនៅឯទីស្តីការក្រសួងការងារ។ យ៉ាងណាក្តី ក្រសួងការងារបញ្ជាក់ថា ក្រសួងនឹងបន្តព្យាយាមធ្វើការសម្របសម្រួលដោះស្រាយករណីនេះបន្តទៀត ទៅតាមនីតិវិធីត្រឹមត្រូវនៃច្បាប់ នៅទីស្តីការក្រសួងការងារ។
គិតត្រឹមថ្ងៃទី២៨ ខែធ្នូ ឆ្នាំ២០២១នេះ គឺមានរយៈពេល១១ថ្ងៃហើយ ដែលបុគ្គលិកក្រុមហ៊ុនកាស៊ីណូណាហ្គាវើលដ៍ជាង ១ពាន់នាក់បាននាំគ្នាធ្វើកូដកម្មនៅមុខក្រុមហ៊ុន ដើម្បីទាមទារឱ្យក្រុមហ៊ុនបនល្បែងដ៏ធំនៅចំកណ្តាលទីក្រុងភ្នំពេញមួយនេះ ទទួលយកបុគ្គលិក ៣៥៧នាក់ឱ្យចូលធ្វើការងារឡើងវិញ។
ក្រុមហ៊ុនណាហ្គាវើលដ៍បានប្រកាសពីគម្រោងបញ្ឈប់បុគ្គលិក ១ពាន់៣រយនាក់ ក្រោមហេតុផលវិបត្តិហិរញ្ញវត្ថុដោយសារតែជំងឺកូវីដ១៩។ ប៉ុន្តែផ្ទុយពីការអះអាងនេះ ក្រុមបុគ្គលិកបានចោទប្រកាន់ថា ការបញ្ឈប់បុគ្គលិកដ៏ច្រើន គឺក្រុមហ៊ុនមានបំណងគាល់រំលើងសហជីពចេញពីក្រុមហ៊ុន ដោយថា ៨០%នៃបុគ្គលិកដែលត្រូវបញ្ឈប់គឺជាថ្នាក់ដឹកនាំ ប្រតិភូ និងសមាជិករបស់សហជីពនៅក្នុងក្រុមហ៊ុនណាហ្គាវើលដ៍៕
