លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានលើកសំណើសុំដាក់បញ្ចូលថ្ងៃទី២៩ធ្នូ ជាទិវា «អបអរសាទរថ្ងៃបញ្ចប់សង្គ្រាមនៅកម្ពុជា» ទៅក្នុងប្រតិទិនខ្មែរចាប់ពីឆ្នាំក្រោយនេះតទៅ តែមិនតម្រូវឱ្យឈប់សម្រាកនោះទេ។
ក្នុងពិធីសម្ពោធដាក់ឱ្យប្រើប្រាស់អគាររដ្ឋបាល និងទីស្ដីការក្រសួងការពារជាតិថ្មី នៅព្រឹកថ្ងៃពុធនេះ ប្រមុខរដ្ឋាភិបាល លោក ហ៊ុន សែន ថ្លែងថា ចាប់ពីឆ្នាំក្រោយនេះ លោកស្នើសុំដាក់បញ្ចូលក្នុងប្រតិទិន ថ្ងៃ២៩ធ្នូ គឺជាទិវាអបអរសាទរបញ្ចប់សង្គ្រាមនៅកម្ពុជា។
លោកនាយករដ្ឋមន្ត្រីបានបញ្ជាក់ថា៖ «ខ្ញុំស្នើសុំដាក់ចូលប្រតិទិនដាក់ថា ទិវាអបអរសាទរថ្ងៃបញ្ចប់សង្គ្រាមតាមរយៈនយោបាយឈ្នះ-ឈ្នះ ដាក់ចូលក្នុងនោះ ហើយមិនចាំបាច់ឈប់សម្រាកទេ»។
បើតាមទំព័រហ្វេសប៊ុកផ្លូវការរបស់លោក ថ្ងៃទី២៩ ខែធ្នូ ឆ្នាំ២០២១នេះ គឺជាខួប២៣ឆ្នាំ នៃការបញ្ចប់សង្គ្រាមនៅកម្ពុជា ក្រោមនយោបាយ ឈ្នះ-ឈ្នះ (២៩ ធ្នូ ១៩៩៨ – ២៩ ធ្នូ ២០២១)។ បើតាមលោកនាយករដ្ឋមន្ត្រី ហ៊ុន សែន ថ្ងៃទី២៩ ខែធ្នូ ឆ្នាំ១៩៩៨ កម្ពុជារកបាននូវសុខសន្តិភាពពេញលេញ និងមានការឯកភាពជាតិទាំងស្រុងជាប្រវត្តិសាស្ត្រ។
យ៉ាងណាក្ដី កន្លងមកមានការរិះគន់ថា រដ្ឋាភិបាលកម្ពុជាចង់បំភ្លេចចោលព្រឹត្តិការណ៍ប្រវត្តិសាស្ត្រដ៏សំខាន់មួយ នោះគឺ «កិច្ចព្រមព្រៀងសន្តិភាពទីក្រុងប៉ារីស ២៣ តុលា» ត្បិតរដ្ឋបានសម្រេចដកចេញពីប្រតិទិន ដោយមិនឱ្យមានការឈប់សម្រាកប្រចាំឆ្នាំរបស់កម្ពុជាថែមទៀតផង៕