លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃនេះថា លោកនឹងស្នើឱ្យមានការបង្កើតច្បាប់ ស្ដីពី «ការកំណត់អាយុចូលនិវត្តន៍របស់នាយករដ្ឋមន្ត្រី» នៅក្រោយពេលដែលលោកឈប់គ្រប់គ្រងតំណែងកំពូលមួយនេះ។
ការថ្លែងរបស់លោកនាយករដ្ឋមន្ត្រី ហ៊ុន សែន បានធ្វើឡើងនៅក្នុងពិធីសម្ពោធដាក់ឱ្យប្រើប្រាស់អគាររដ្ឋបាល និងទីស្ដីការក្រសួងការពារជាតិថ្មី នៅព្រឹកថ្ងៃពុធនេះ។ ប្រមុខរដ្ឋាភិបាលរូបនេះអះអាងថា លោកនឹងសម្រេចបំណងអ្នកស្នើសុំឱ្យរៀបចំបង្កើតច្បាប់កំណត់អាយុចូលនិវត្តន៍របស់នាយករដ្ឋមន្ត្រី។ ប៉ុន្តែលោកបានបញ្ជាក់ថា ច្បាប់នេះមិនមែនជាច្បាប់កំណត់អាណត្តិនាយករដ្ឋមន្ត្រីនោះទេ។
លោកនាយករដ្ឋមន្ត្រីបានថ្លែងថា៖ «កាលហ្នឹងគេថា កំណត់អាយុនាយករដ្ឋមន្រ្តី អូខេ! ចាំពេលបោះឆ្នោតជ្រើសរើសផ្ដល់ការទុកចិត្តឱ្យរដ្ឋាភិបាលថ្មីហើយ [យើង] ចេញមកយើងជាសមាជិកសភាគិតថាបបួលគ្នាប៉ុន្មាននាក់យើង ពេលយើងចេញមកប្រជុំកាសែតទាំងអស់គ្នា។ ហើយយើងផ្ដួចផ្ដើមគំនិតស្នើសុំធ្វើច្បាប់កំណត់អាយុនាយករដ្ឋមន្រ្តី ធ្វើឱ្យវាចំដាក់យកត្រឹម៧០បានហើយ ព្រោះជិតឆ្នាំ២០២៣ បើសិនជាខ្ញុំចាកចេញ ឧទាហរណ៍ទេណា! ខ្ញុំទើប៧១! អ៊ីចឹងលើសម៉ាតិចអត់អីទេ! ឥលូវបើចង់ដាក់ ៧២ក៏បាន អត់អីទេ»។
លោកបន្តថា៖ «ឧទាហរណ៍ទៅចុះ ប៉ុន្តែអាអ្នកដែលកំពុងស្នើសុំហ្នឹង អាហ្នឹង[សម រង្ស៊ី]វា ៧៣ហើយ! អ្ហែងធ្វើទៅ ធ្វើងាប់ខ្លួនឯងតើ!»
ការលើកឡើងរបស់លោកនាយករដ្ឋមន្ត្រី ហ៊ុន សែន ទំនងជាសំដៅទៅកាន់លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេសខ្លួននៅប្រទេសបារាំង។
កាលពីថ្ងៃទី៩ ខែតុលា ឆ្នាំ២០២១ លោក សម រង្ស៊ី បានឌឺដងឱ្យលោកនាយករដ្ឋមន្ត្រី ហ៊ុន សែន បង្កើតច្បាប់ពីរទៀត បន្ទាប់ពីការបង្កើតច្បាប់ស្ដីពី«ការកំណត់សញ្ជាតិខ្មែរតែមួយ»សម្រាប់តំណែងប្រធានក្រុមប្រឹក្សាធម្មនុញ្ញ ប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រី គឺច្បាប់ស្ដីពីការកំណត់នាយករដ្ឋមន្ត្រីចូលនិវត្តន៍ត្រឹមអាយុ៧០ឆ្នាំ និងច្បាប់ស្ដីពីការកំណត់អាណត្តិនាយករដ្ឋមន្ត្រី។
នៅក្នុងបទសម្ភាសន៍មួយចេញផ្សាយនៅថ្ងៃទី៩ ខែតុលា លោក សម រង្ស៊ី បានសំណូមពរឱ្យលោកនាយករដ្ឋមន្ត្រី ហ៊ុន សែន បង្កើតច្បាប់ថ្មីពីរទៀតដែលជាច្បាប់មានសារៈសំខាន់នោះ គឺច្បាប់ដែលតម្រូវឱ្យនាយករដ្ឋមន្ត្រី រដ្ឋមន្ត្រី និងអ្នកកាន់តំណែងមុខងារសាធារណៈទាំងអស់ចូលនិវត្តន៍ចាប់ពីអាយុ៧០ឆ្នាំឡើងទៅ ដើម្បីបើកផ្លូវឱ្យយុវជនជំនាន់ក្រោយចូលមកជំនួស និងច្បាប់ស្ដីពីការកំណត់អាណត្តិនាយករដ្ឋមន្ត្រីត្រឹមពីរអាណត្តិ។
បើតាមលោក សម រង្ស៊ី ច្បាប់ទី២នេះមានគោលបំណងឱ្យប្រទេសកម្ពុជាគេចផុតនៅថ្ងៃខាងមុខ ពីជនផ្ដាច់ការដែលចង់កាន់អំណាចអស់មួយជីវិត។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ យល់ថា សាររបស់លោកនាយករដ្ឋមន្ត្រី ហ៊ុន សែន នៅថ្ងៃនេះ គ្រាន់តែជាវោហារសព្ទនយោបាយក្នុងការប្រជែងយកប្រជាប្រិយភាពដើម្បីអំណាចផ្ទាល់ខ្លួនតែប៉ុណ្ណោះ។ លោកថា ការបង្កើតច្បាប់នេះគួរធ្វើឡើងជាយូរមកហើយ មិនមែនធ្វើនៅពេលដែលលោកនាយករដ្ឋមន្ត្រីប្រកាសពីការត្រៀមឈប់ធ្វើនយោបាយនោះទេ។
លោកថា៖ «ពាក់ព័ន្ធជាមួយការងារនេះដែរ យើងឃើញថា របៀបនៃការឌឺដងនយោបាយរបស់មេដឹកនាំនយោបាយធំៗនៅកម្ពុជានេះ វាមិនមែនជារឿងដំបូង ហើយកើតឡើងលើកទីមួយឬលើកទីពីរ វាកើតឡើងជិតម្ភៃសាមសិបឆ្នាំទៅហើយ ហើយវាក៏បានក្លាយជារឿងដដែលៗ។ សូម្បីតែខ្ញុំជាយុវជនជំនាន់ក្រោយហ្នឹង គឺស្ដាប់ឮតាំងពីមិនទាន់ចេះ ឬក៏មិនទាន់យល់ពីតួនាទី ឬក៏កាតព្វកិច្ច ក្នុងនាមជាអ្នកនយោបាយអ៊ីចឹង»។
លោកបន្តថា៖ «អ៊ីចឹងសម្រាប់ការយល់ឃើញផ្ទាល់ខ្លួនរបស់ខ្ញុំ ខ្ញុំគិតថា វាគ្រាន់តែជាវោហារសព្ទនយោបាយនៅក្នុងការប្រជែងយកប្រជាប្រិយភាពដើម្បីអំណាចផ្ទាល់ខ្លួនតែប៉ុណ្ណឹងឯង ហើយការណ៍នេះ វាមិនផ្ដល់ផលចំណេញអ្វីច្រើនដល់សង្គមទេ»។
ក្រៅពីប្រកាសត្រៀមបង្កើតច្បាប់ស្ដីពី «ការកំណត់អាយុចូលនិវត្តន៍របស់នាយករដ្ឋមន្ត្រី» ហើយ លោកនាយករដ្ឋមន្ត្រី ហ៊ុន សែន នៅថ្ងៃនេះក៏បានប្រកាសថា លោកនឹងក្លាយជាឪនាយករដ្ឋមន្ត្រីនៅក្រោយឆ្នាំ២០២៣ ហើយលោកនឹងអាចក្លាយជាជីតានាយករដ្ឋមន្ត្រីនៅក្រោយឆ្នាំ២០៤០ ទៀតផង៕