បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) ប្រកាន់ជំហរដាច់ខាតបន្តធ្វើកូដកម្មនៅមុខក្រុមហ៊ុនរហូតមានដំណោះស្រាយលើវិវាទការងារ បើទោះបីជាកិច្ចចរចាជាមួយភាគីក្រុមហ៊ុនជាលើកទី៥ ត្រូវបានបរាជ័យក៏ដោយ។
បុគ្គលិកក្រុមហ៊ុនកាស៊ីណូណាហ្គាវើលដ៍ជាង១ ០០០នាក់បានបន្តធ្វើកូដកម្មនៅមុខក្រុមហ៊ុនរយៈពេល១២ថ្ងៃជាប់ៗគ្នាមកហើយ គិតត្រឹមថ្ងៃទី២៩ ខែធ្នូនេះ ដើម្បីទាមទារលក្ខខណ្ឌការងារចំនួន៩ចំណុច ក្នុងនោះមាន ការទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន៣៦៥នាក់ ដែលមិនព្រមទទួលយកសំណងបញ្ចប់កិច្ចសន្យាការងារ ចូលបម្រើការងារឡើងវិញ។
កាលពីថ្ងៃទី២៧ ខែធ្នូ ក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងមួយស្ដីពីលទ្ធផលនៃការចរចារកដំណោះស្រាយលើវិវាទការងាររវាងបុគ្គលិកក្រុមហ៊ុនកាស៊ីណូណាហ្គាវើលដ៍ និងតំណាងក្រុមហ៊ុន ប៉ុន្តែត្រូវបានបរាជ័យជាលើកទី៥ ដោយសារភាគីវិវាទប្រកាន់ជំហររៀងៗខ្លួន។
យ៉ាងនេះក្ដី ក្រុមកូដករទាំងនោះបានប្រកាសពីជំហរធ្វើកូដកម្មបន្តទៀត ប្រសិនបើក្រុមហ៊ុនល្បែងមួយនេះមិនព្រមទទួលយកបុគ្គលិកទាំងជាង៣០០នាក់ឱ្យចូលធ្វើការងារវិញនោះ។
សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ អ្នកស្រី រី សុវណ្ណឌី ថ្លែងប្រាប់ វីអូឌី នៅថ្ងៃពុធនេះថា បុគ្គលិកជាង១០០០នាក់នេះត្រូវការការងារដែលមានសុវត្ថិភាព និងមានតំណាងស្មោះត្រង់ ដែលជួយដោះស្រាយនៅពេលមានបញ្ហាកើតឡើង។ បើមិនដូច្នេះទេ ពួកគេនឹងរងការគាបសង្កត់ពីភាគីក្រុមហ៊ុនដោយពុំមានអ្នកអើពើមិនខាន។
អ្នកស្រីថា៖ «បើសិនជាអត់បាន៣៦៥នាក់ ដែលក្នុងហ្នឹងមានតំណាងពួកគាត់ [បានចូលធ្វើការវិញ] គឺគាត់ដាច់ខាតត្រូវតែនៅឈរនៅពីមុខក្រុមហ៊ុនរហូតដែរ។ ជំហរហ្នឹងសុទ្ធតែសំខាន់ដូចគ្នា។ ក្រុមហ៊ុនទុកសហជីពនៅ ចង់និយាយថាជាឆ្អឹងទទឹងករបស់គេ អ៊ីចឹងដាច់ខាតគេត្រូវរំលាយសហជីពហ្នឹងឱ្យបាន។ ហើយខាងភាគីខាងកូដករ បើសិនជាបាត់បង់សហជីព បាត់បង់តំណាងរបស់គាត់ គឺពួកគាត់នឹងធ្វើការងារដូចទាសករអ៊ីចឹង គឺគេជេរផងអីផង ហើយក៏គ្មាននរណាគេទៅរកខុសរកត្រូវឱ្យពួកគាត់ដែរ។ អ៊ឹចឹងគាត់ត្រូវតែការពារតំណាងរបស់គាត់»។
អ្នកតវ៉ាមួយរូបទៀត លោក ប៉េង សោភា លើកឡើងថា ក្រុមហ៊ុនបានទាមទារបញ្ឈប់បុគ្គលិកជាង៣០០នាក់ ដែលភាគច្រើនជាសកម្មជនសហជីព ដោយក្រុមហ៊ុនផ្ដល់ហេតុផលថា ខាតបង់ការចំណាយច្រើនដោយសារកូវីដ-១៩ ចាំបាច់ត្រូវកាត់បន្ថយបុគ្គលិក។ យ៉ាងណា លោកថា រឿងនៅពីក្រោយខ្នងនៃការបញ្ឈប់បុគ្គលិកទាំងនោះ គឺក្រុមហ៊ុនរើសអើងសហជីពតែម្ដង។
លោកថា៖ «រូបភាពដែលមើលឃើញ គឺឃើញរើសអើងសហជីព! អ៊ីចឹងគាត់ [បុគ្គលិក] ក៏ចូលរួមតវ៉ា គាត់គិតថាបើសិនជានៅក្រុមហ៊ុនគាត់អត់មានសហជីព អ៊ីចឹងដូចកូនអត់មានឪពុកម្ដាយអ៊ីចឹង ព្រោះសហជីពតែងតែជួយពួកគាត់ដោះស្រាយភាពអយុត្តិធម៌នៅកន្លែងការងារច្រើន។ អ៊ីចឹងគឺគាត់[បុគ្គលិក]ចូលចិត្ត និងស្រឡាញ់សហជីព»។
វីអូឌី មិនអាចទាក់ទងសុំការបកស្រាយពីតំណាងក្រុមហ៊ុនណាហ្គាវើលដ៍ លោក Mike Ngai បានទេ នៅថ្ងៃពុធនេះ។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ លើកឡើងថា ប្រសិនបើវិវាទការងារនេះមិនត្រូវបានដោះស្រាយ ហើយកូដកម្មបន្តអូសបន្លាយយូរ គឺបង្ហាញរូបភាពអាក្រក់សម្រាប់មហាជន។ បន្ថែមពីនេះក៏បង្ហាញពីអសមត្ថភាពរបស់ស្ថាប័នរដ្ឋាភិបាល ដែលមិនអាចដោះស្រាយវិវាទការងារមួយនេះបាន។
លោក ថារ៉ូ និយាយថា៖ «បើសិនជាបន្តឱ្យកើតឡើង វាជាគំរូអាក្រក់ទៅដល់និយោជកផ្សេងៗទៀតដែលមានឥទ្ធិពលប្រហាក់ប្រហែលទៅនឹងណាហ្គាវើលដ៍ហ្នឹង។ អាចប្រើប្រាស់នូវទម្រង់ដូចគ្នានៅក្នុងការរំលាយរចនាសម្ព័ន្ធសហជីព ជាទម្រង់នៃការរើសអើងសហជីពអ៊ីចឹង»។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ថ្លែងប្រាប់ វីអូឌី នៅថ្ងៃទី២៩ ខែធ្នូនេះថា នៅក្នុងច្បាប់ការងារ គឺមានការការពារទៅវិញទៅមក ពោលគឺទាំងបុគ្គលិកនិងនិយោជក។ លោកថា ក្នុងករណីដែលមានបញ្ហាសេដ្ឋកិច្ចឬវិបត្តិ ក្រុមហ៊ុនអាចកាត់បន្ថយបុគ្គលិកបាន។
លោកថា៖ «ការសម្របសម្រួលដូចខ្ញុំបញ្ហាក់ជាច្រើនដងហើយថា វាអាស្រ័យលើភាគីទាំងពីរ។ យើងក្ដាប់បាននូវអ្វីដែលជាសំណូមពររបស់បងប្អូនកម្មករយើង ប៉ុន្តែវាក៏មានដែនកំណត់នៃច្បាប់ដែលផ្ដល់សិទ្ធិទៅដល់និយោជកមួយចំនួនធំដែរ»។
យ៉ាងណា លោក ហេង សួរ ថាក្រសួងការងារមិនបានឱបដៃឈរមើលវិវាទការងាររបស់ភាគីទាំងពីរឡើយ ហើយក្រសួងមិនបានបោះបង់ចោលតួនាទីរបស់ខ្លួន ដោយបានបំពេញនូវភារកិច្ចតាមច្បាប់ស្តីពីការងារ។
ទោះបីជាយ៉ាងនេះក្ដី សហភាពសហជីពកម្ពុជា បានចេញសេចក្ដីថ្លែងការណ៍មួយនៅថ្ងៃទី២៩ ខែធ្នូនេះ ដោយលើកឡើងថា ក្រុមហ៊ុនណាហ្គាវើលដ៍បញ្ឈប់បុគ្គលិកនិយោជិតដោយបង្ខំទាំងពួកគេមិនបានប្រព្រឹត្តកំហុស គឺជាទង្វើរំលោភច្បាប់យ៉ាងធ្ងន់ធ្ងរ។ បន្ថែមពីនេះ ចំពោះការគេចវេះមិនចូលតុចរចារបស់និយោជក បានបង្ហាញអំពីភាពមិនទទួលខុសត្រូវ និងមិនបានឱ្យតម្លៃដល់ក្រសួងការងារ។
សហភាពសហជីពកម្ពុជា យល់ឃើញថា ក្រសួងការងារមិនត្រូវរារែកចិត្ត និងត្រូវធ្វើការសម្រេច ដោយភាពស្មោះត្រង់ ចំពោះការដោះស្រាយជូនបុគ្គលិកទាំងនោះ ដោយមិនត្រូវបណ្តោយឱ្យពេលវេលាអូសបន្លាយនាំឱ្យប៉ះពាល់ដល់ជីវភាពរស់នៅរបស់ពួកគេ និងមិនត្រូវភ្ជាប់កូដកម្មនេះទៅនឹងហេតុផលផ្សេងឡើយ។ សហភាពសហជីពកម្ពុជា សង្ឃឹមថា ក្រសួងការងារ ក៏ដូចជារាជរដ្ឋាភិបាល នឹងផ្ដល់ដំណោះស្រាយដោយយុត្តិធម៌ជូនកម្មករនិយោជិតចំនួន៣៦៥នាក់បានចូលបម្រើការងារវិញ នាពេលឆាប់ៗនេះ៕
