ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩ដែលជាប្រភេទបំប្លែងខ្លួន អូមីក្រុង មានចំនួន១ករណីបន្ថែមទៀតដែលជាករណីនាំចូលពីក្រៅប្រទេស ក្នុងចំណោមអ្នកឆ្លងកូវីដ-១៩ទាំងអស់៤នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២៩ ខែធ្នូ ឆ្នាំ២០២១ បានឱ្យដឹងថា អ្នកឆ្លងជំងឺកូវីដ-១៩ ចំនួន៤នាក់ថ្មី ដែលបានរកឃើញកាលពីម្សិលមិញនោះ រួមមាន ប្រភេទបំប្លែងខ្លួន«អូមីក្រុង»ម្នាក់ ដែលជាករណីនាំចូលពីក្រៅប្រទេស។ ប្រភពដដែលបញ្ជាក់ថា ជាមួយគ្នានោះ ក៏មានករណីអ្នកជំងឺស្លាប់ម្នាក់ ខណៈអ្នកជាសះស្បើយថ្មីមានចំនួន៩នាក់ផងដែរ។
គិតមកត្រឹមព្រឹកថ្ងៃទី២៩ ខែធ្នូនេះ កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួនប្រភេទ អូមីក្រុង សរុបចំនួន៣៤ករណីហើយ ក្នុងរយៈប្រមាណ១ខែនៃខែធ្នូនេះ។
គិតត្រឹមព្រឹកថ្ងៃដដែលនេះ កម្ពុជារកឃើញករណីអ្នកឆ្លងជំងឺកូវីដ-១៩ សរុប១២០ ៤៧៣ ក្នុងនោះអ្នកជំងឺព្យាបាលជាសះស្បើយមានចំនួន១១៦ ៨៩៤នាក់ និងស្លាប់សរុបចំនួន៣០១១នាក់៕