ក្រសួងសុខាភិបាលបានប្រកាសរកឃើញអ្នកឆ្លងជំងឺកូវីដ-១៩ ប្រភេទបំប្លែងខ្លួន អូមីក្រុង មានចំនួន ១៤ករណីបន្ថែមទៀត ដែលជាករណីនាំចូលពីក្រៅប្រទេសទាំងអស់ ធ្វើឱ្យអ្នកឆ្លងមេរោគប្រភេទថ្មីនេះនៅកម្ពុជាកើនឡើងដល់ ៤៨ករណី។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី៣០ ខែធ្នូ ឆ្នាំ២០២១ បានឱ្យដឹងថា អ្នកឆ្លងជំងឺកូវីដ-១៩ ចំនួន ១៤នាក់ថ្មីដែលរកឃើញកាលពីម្សិលមិញ គឺប្រភេទបំប្លែងខ្លួន អូមីក្រុង ហើយជាករណីនាំចូលពីក្រៅប្រទេសទាំងអស់ ។ ក្រសួងបន្ថែមថា ក៏មានករណីអ្នកជំងឺស្លាប់ម្នាក់ ខណៈជាសះស្បើយថ្មីមានចំនួន ១៣នាក់ផងដែរ។
ការប្រកាសរកឃើញអ្នកឆ្លងជំងឺកូវីដ១៩ ប្រភេទអូមីក្រុងនៅថ្ងៃនេះ បើប្រៀបធៀបទៅនឹងថ្ងៃម្សិលមិញមានការកើនឡើង ១៣ករណី ខណៈសេចក្តីប្រកាសព័ត៌មានរបស់ក្រសួងសុខាភិបាលម្សិលមិញមានត្រឹមមួយករណីប៉ុណ្ណោះ។
គិតមកត្រឹមព្រឹកថ្ងៃទី៣០ ខែធ្នូនេះ កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន អូមីក្រុង សរុបចំនួន ៤៨ករណីហើយ ក្នុងរយៈកន្លះខែប៉ុណ្ណោះ ក្នុងខែធ្នូនេះ ក្រោយពីកម្ពុជាបានរកឃើញករណីវិជ្ជមានមេរោគថ្មីនេះជាលើកដំបូង កាលពីថ្ងៃទី១៤ខែធ្នូ លើស្ត្រីខ្មែរម្នាក់ ដែលធ្វើដំណើរពីប្រទេសហ្គាណា នៃតំបន់អាហ្វ្រិកខាងលិច មកកម្ពុជា។
កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន «អូមីក្រុង» ជាបន្តបន្ទាប់ ក្រោយពេលរដ្ឋាភិបាលតាមរយៈក្រសួងសុខាភិបាល បានសម្រេចដកបម្រាម ដែលហាមឃាត់ចំពោះអ្នកដំណើរដែលមកពីប្រទេស ឬ ឆ្លងកាត់ប្រទេសចំនួន១០ ក្នុងតំបន់អាហ្វ្រិកមិនឱ្យចូលមកកម្ពុជា បន្ទាប់ពីតំបន់មួយនេះរកឃើញករណីឆ្លងវីរុសកូវីដ-១៩ ប្រភេទ«អូមីក្រុង» ដំបូងគេ។
គិតត្រឹមព្រឹកថ្ងៃដដែលនេះ ក្រសួងសុខាភិបាលបានប្រកាសរកឃើញអ្នកឆ្លងជំងឺកូវីដ១៩ សរុប ១២០ ៤៨៧ ក្នុងនោះអ្នកជំងឺព្យាបាលជាសះស្បើយមានចំនួន ១១៦ ៩០៧នាក់ និងស្លាប់សរុបចំនួន ៣០១២នាក់៕
