មន្ត្រីសហជីពបានឱ្យដឹងនៅមុននេះថា សមត្ថកិច្ចរាជធានីភ្នំពេញបានចាប់ខ្លួនអតីតបុគ្គលិកក្រុមហ៊ុនណាហ្គាវើលដ៍ចំនួន ៨ នាក់នៅវេលាម៉ោង ៨យប់មិញនេះ នៅការិយាល័យសហជីពស្ថិតនៅផ្លូវសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បុគ្គលិកសហជីពទាំង៨នាក់ ក្នុងនោះមានអគ្គលេខាធិការសហជីពម្នាក់រួមមាន ឈ្មោះ ឈឹម សុខន, ឃ្លាំង សុបិន្ត, សុន ស្រីពេជ្រ, ហៃ សុភាព, រី សុវណ្ណឌី, រិន ផល្លា, អេង ស្រីប និងស៊ុន ស្រីមុំ។ បើតាមមន្ត្រីសហជីពបានឱ្យដឹងថា ពេលនេះសហជីពសម្រេចរំសាយការធ្វើកូដកម្មនៅមុខក្រុមហ៊ុនកាស៊ីណូណាហ្គាវើលដ៍ជាបណ្តោះអាសន្នសិន និងបានជូនដំណឹងទៅភាគីពាក់ព័ន្ធដើម្បីធ្វើអន្តរាគមន៍ករណីនេះហើយ។
ស្នងការនគរបាលរាជធានីភ្នំពេញ លោក ស ថេត បានបញ្ជាក់ប្រាប់វីអូឌីនៅយប់ថ្ងៃទី៣១ ខែធ្នូ នេះថា សមត្ថកិច្ចពិតជាបានឃាត់ខ្លួនអតីតបុគ្គលិកណាហ្គាវើលដ៍ពិតប្រាកដមែន។ លោកបន្តថា ក្នុងចំណោមអតីតបុគ្គលិកទាំង៨នាក់ មាន ៤ នាក់ត្រូវបានចោទប្រកាន់ពីបទ ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គមតាមមាត្រា ៤៩៤ និង៤៩៥ នៃក្រមព្រហ្មទណ្ឌកម្ពុជា។ ចំណែក ៤ នាក់ទៀតកំពុងសាកសួរនៅឡើយ ហើយសមត្ថកិច្ចកំពុងបន្តរកចាប់ខ្លួនបន្ថែមទៀត។
គិតត្រឹមថ្ងៃទី៣១ ខែធ្នូនេះ អតីតបុគ្គលិកក្រុមហ៊ុនណាហ្គាវើលដ៍ជាង១ពាន់នាក់ បានធ្វើកូដកម្មអស់រយៈពេល១៤ថ្ងៃជាប់ៗគ្នាមកហើយ ដើម្បីទាមទារលក្ខខណ្ឌការងារចំនួន ៩ចំណុច ក្នុងនោះមានការទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន ៣៦៥នាក់ ដែលមិនព្រមទទួលយកសំណងបញ្ចប់កិច្ចសន្យាការងារ ចូលបម្រើការងារឡើងវិញ។
មុនពេលចាប់ខ្លួននេះ រដ្ឋបាលរាជធានីភ្នំពេញ បានអំពាវនាវឱ្យបុគ្គលិកណាហ្គាវើលដ៍បញ្ឈប់សកម្មភាពតវ៉ា ដើម្បីរក្សានូវសន្តិសុខ សុវត្ថិភាព និងរបៀបរៀបរយសាធារណៈសម្រាប់ពលរដ្ឋទូទៅ ភ្ញៀវទេសចរជាតិ-អន្តរជាតិ ធ្វើដំណើរកម្សាន្តនាឱកាសបុណ្យឆ្លងឆ្នាំសកល២០២១-២០២២នេះ។
រដ្ឋបាលរាជធានីភ្នំពេញសរសេរថា៖ «ដើម្បីចូលរួមអបអរសាទរពិធីបុណ្យចូលឆ្នាំសកល ២០២២ ដែលនឹងចូលមកដល់នៅ ថ្ងៃទី៣១ ខែធ្នូ ឆ្នាំ២០២១ និងថ្ងៃទី០១ ខែមករា ឆ្នាំ២០២២ នេះ ក៏ដូចជាដើម្បីបង្កលក្ខណៈដល់បងប្អូន ប្រជាពលរដ្ឋទូទៅ ភ្ញៀវទេសចរជាតិ និងអន្តរជាតិ ធ្វើដំណើរកម្សាន្តដោយភាពសប្បាយរីករាយ រដ្ឋបាលរាជធានីភ្នំពេញ សូមអំពាវនាវដល់ក្រុមបាតុករទាំងអស់ ត្រូវបញ្ឈប់សកម្មភាពតវ៉ាដោយខុសច្បាប់ចាប់ពីពេលនេះតទៅ សំដៅធ្វើយ៉ាងណារក្សាបាននូវសន្តិសុខ សុវត្ថិភាព និងរបៀបរៀបរយសាធារណៈ»៕
