រដ្ឋបាលរាជធានីភ្នំពេញ អំពាវនាវដល់បុគ្គលិកណាហ្គាវើលដ៍បញ្ឈប់សកម្មភាពតវ៉ា ដើម្បីរក្សានូវសន្តិសុខ សុវត្ថិភាព និងរបៀបរៀបរយសាធារណៈសម្រាប់ពលរដ្ឋទូទៅ ភ្ញៀវទេសចរជាតិ-អន្តរជាតិ ធ្វើដំណើរកម្សាន្តនាឱកាសឆ្លងឆ្នាំ។
សេចក្ដីអំពាវនាវរបស់រដ្ឋបាលរាជធានីភ្នំពេញ ដែលចេញផ្សាយនៅល្ងាចថ្ងៃទី៣០ ខែធ្នូ ម្សិលមិញ បានលើកឡើងថា ក្នុងរយៈពេលកន្លងមក ចាប់ពីថ្ងៃទី១៨ រហូតដល់ថ្ងៃទី៣០ ខែធ្នូ ឆ្នាំ២០២១នេះ អតីតកម្មករនិយោជិតនៃក្រុមហ៊ុនណាហ្គាវើលដ៍ ដឹកនាំដោយ កញ្ញា ឈឹម ស៊ីថរ និងគូកន បានធ្វើសកម្មភាពសម្ដែងមតិដោយខុសច្បាប់នៅលើសួនច្បារសាធារណៈ និងនៅតាមដងផ្លូវសាធារណៈ។
រដ្ឋបាលរាជធានីភ្នំពេញ បន្ថែមថា អតីតកម្មករនិយោជិតទាំងនោះថែមទាំងបានបិទផ្លូវច្រកចេញចូលរបស់ក្រុមហ៊ុនឯកជននេះទៀតផង ដែលសកម្មភាពនេះបានធ្វើឱ្យប៉ះពាល់ធ្ងន់ធ្ងរដល់សន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ និងសិទ្ធិស្របច្បាប់របស់ក្រុមហ៊ុន។
អាជ្ញាធរអះអាងថា សកម្មភាពតវ៉ារបស់អតីតបុគ្គលិកទាំងនោះក៏ពុំបានចូលរួមទប់ស្កាត់ការរីករាលដាលនៃជំងឺកូវីដ-១៩ បើទោះបីជាមានការខិតខំសម្របសម្រួលរកដំណោះស្រាយជាបន្តបន្ទាប់ ទាំងនៅថ្នាក់រដ្ឋបាលរាជធានីភ្នំពេញ និងក្រសួងការងារ និងបណ្ដុះបណ្ដាលវិជ្ជាជីវៈយ៉ាងណាក្ដី។
រដ្ឋបាលរាជធានីភ្នំពេញ បន្តថា៖ «ដើម្បីចូលរួមអបអរសាទរពិធីបុណ្យចូលឆ្នាំសកល ២០២២ ដែលនឹងចូលមកដល់នៅថ្ងៃទី៣១ ខែធ្នូ ឆ្នាំ២០២១ និងថ្ងៃទី០១ ខែមករា ឆ្នាំ២០២២នេះ ក៏ដូចជាដើម្បីបង្កលក្ខណៈដល់បងប្អូនប្រជាពលរដ្ឋទូទៅ ភ្ញៀវទេសចរជាតិនិងអន្តរជាតិ ធ្វើដំណើរកម្សាន្តដោយភាពសប្បាយរីករាយ រដ្ឋបាលរាជធានីភ្នំពេញសូមអំពាវនាវដល់ក្រុមបាតុករទាំងអស់ត្រូវបញ្ឈប់សកម្មភាពតវ៉ាដោយខុសច្បាប់ចាប់ពីពេលនេះតទៅ សំដៅធ្វើយ៉ាងណារក្សាបាននូវសន្តិសុខ សុវត្ថិភាព និងរបៀបរៀបរយសាធារណៈ»។
គួររំឭកថា វិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍មានរយៈពេល៨ខែមកហើយ នៅតែមិនទាន់មានដំណោះស្រាយចប់ ក្រោយពីក្រុមហ៊ុននេះបានប្រកាសបញ្ឈប់បុគ្គលិក១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ក្រោមហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ-១៩៕
