ធនាគារជាតិនៃកម្ពុជា បានប្រកាសពីការរីកចម្រើនផ្នែកសេដ្ឋកិច្ច និងវិស័យធនាគារ ដោយថា សេដ្ឋកិច្ចកម្ពុជា ឆ្នាំ២០២១ មានកំណើនវិជ្ជមានវិញដែលបានកើនឡើង៣% បន្ទាប់ពីធ្លាក់ចុះកាលពីឆ្នាំ២០២០ ហើយនៅឆ្នាំ២០២២នេះ កម្ពុជារំពឹងថាកំណើនសេដ្ឋកិច្ចនឹងងើបឡើងក្នុងអត្រាប្រមាណ៥% ផងដែរ។
លិខិតរបស់ធនាគារជាតិនៃកម្ពុជាកលពីថ្ងៃទី៣១ខែធ្នូ ឆ្នាំ២០២១ បានលើកឡើងថា សេដ្ឋកិច្ចកម្ពុជាឆ្នាំ២០២១កន្លងទៅត្រូវប៉ាន់ប្រមាណថា ងើបឡើងក្នុងរង្វង់៣% ដោយសារមានការងើបឡើងវិញនូវសកម្មភាពសេដ្ឋកិច្ចក្នុងស្រុក គួបផ្សំនៃកំណើនសេដ្ឋកិច្ចពិភពលោកផងដែរ។ លើសពីនេះ ការងើបឡើងវិញនូវវិស័យកាត់ដេរ វិស័យកសិកម្ម, ពាណិជ្ជកម្មដុំនិងរាយ, ទូរគមនាគមន៍ ដឹកជញ្ជូន និងសំណង់ រួមទាំងវិស័យកម្មន្តសាលមិនមែនកាត់ដេរសម្រាប់ការនាំចេញជាដើម។
ប្រភពដដែលបន្តថា ការងើបឡើងនូវសេដ្ឋកិច្ចពិភពលោកនឹងគាំទ្រដល់ការនាំចេញរបស់កម្ពុជា ដូចជាផលិតផលកាត់ដេរ និងផលិតផលកម្មន្តសាលមិនមែនកាត់ដេរ ពិសេសគ្រឿងបង្គុំអគ្គិសនី និងកង់។ ដោយឡែក វិស័យសំណង់ និងអចលនទ្រព្យ រំពឹងថានឹងកើនឡើងសន្សឹមៗ ដែលគាំទ្រដោយកំណើនចំណូលក្នុងស្រុក និងលំហូរចូលទុនវិនិយោគមកកម្ពុជា។ រីឯវិស័យកសិកម្ម ដែលអាចស្រូបទាញកម្លាំងការងារជិត១ភាគ៣(១/៣) នៃកម្លាំងការងារសរុបនោះ រំពឹងថានឹងមានកំណើនល្អប្រសើរជាងឆ្នាំ២០២១។
ធនាគារជាតិនៃកម្ពុជាលើកឡើងទៀតថា ជាមួយគ្នានេះ កិច្ចព្រមព្រៀងពាណិជ្ជកម្មកម្ពុជា-ចិន, កិច្ចព្រមព្រៀងកម្ពុជា-កូរ៉េខាងត្បូង នឹងបន្តផ្តល់កំណើនសក្តានុពលលើវិស័យកសិកម្ម ពិសេស កសិកម្មកែច្នៃ និងកសិ-ឧស្សាហកម្ម។ ដោយឡែក កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ហៅកាត់ជាភាសាអង់គ្លេសថា RCEP ព្រមទាំងដំណើរការសកម្មភាពមួយចំនួនទៀត នឹងផ្តល់ឱកាសដល់កម្ពុជា ដែលនាំឱ្យមានការរំពឹងថា អត្រាកំណើនសេដ្ឋកិច្ចឆ្នាំ២០២២ នឹងហក់ឡើងខ្ពស់ជាងឆ្នាំ២០២១កន្លងទៅ។
ធនាគារជាតិនៃកម្ពុជា បន្ថែមថា៖ «ផ្អែកទៅទស្សនវិស័យខាងលើ សេដ្ឋកិច្ចកម្ពុជាត្រូវបានរំពឹងដោយសុទិដ្ឋិនិយមថា បន្តងើបឡើងបន្ថែមទៀត ក្នុងអត្រាប្រមាណ៥% នៅឆ្នាំ២០២២»។
សេដ្ឋកិច្ចកម្ពុជានៅមុនពេលកើតមានវិបត្តិជំងឺកូវីដ-១៩នេះ ធ្លាប់ហក់ឡើងរហូតដល់ ៧ភាគរយ ប៉ុន្តែកំណើននេះក៏បានធ្លាក់ចុះទៅវិញ ដោយសារភាពមិនប្រាកដប្រជានៃជំងឺជាសកលនេះ រួមនឹងបញ្ហាប្រឈមផ្សេងៗទៀត៕