ក្រសួងសុខាភិបាល បានប្រកាសរកឃើញអ្នកឆ្លងជំងឺកូវីដ-១៩ ប្រភេទបំប្លែងខ្លួនថ្មី «អូមីក្រុង» មានចំនួន៣ ករណីបន្ថែមទៀត ដែលជាករណីនាំចូលពីក្រៅប្រទេសទាំងអស់ ធ្វើឱ្យអ្នកឆ្លងមេរោគប្រភេទថ្មីនេះនៅកម្ពុជាកើនឡើងដល់ ៦៩ករណី។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២ ខែមករា ឆ្នាំ២០២២ បានឱ្យដឹងថា អ្នកឆ្លងជំងឺកូវីដ-១៩ ចំនួន ៣នាក់ថ្មីដែលរកឃើញកាលពីម្សិលមិញ គឺប្រភេទបំប្លែងខ្លួន «អូមីក្រុង» ហើយជាករណីនាំចូលពីក្រៅប្រទេសទាំងអស់ ខណៈស្លាប់ម្នាក់ និងជាសះស្បើយថ្មីមានចំនួន ១១នាក់ផងដែរ។
ការប្រកាសព័ត៌មានរកឃើញអ្នកឆ្លងជំងឺកូវីដ១៩ ប្រភេទអូមីក្រុងនៅថ្ងៃអាទិត្យនេះ បើប្រៀបធៀបទៅនឹងការប្រកាសកាលពីថ្ងៃសៅរ៍ម្សិលមិញមានការថយចុះ ១១ករណី។
គិតមកត្រឹមព្រឹកថ្ងៃទី២ ខែមករានេះ កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន «អូមីក្រុង» សរុបចំនួន ៦៩ករណីហើយ ក្រោយពីកម្ពុជាបានរកឃើញករណីវិជ្ជមានមេរោគថ្មីនេះជាលើកដំបូង កាលពីថ្ងៃទី ១៤ខែធ្នូ លើស្ត្រីខ្មែរម្នាក់ ដែលធ្វើដំណើរពីប្រទេសហ្គាណា នៃតំបន់អាហ្វ្រិកខាងលិច មកកម្ពុជា។
គិតត្រឹមព្រឹកថ្ងៃអាទិត្យដដែលនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២០ ៥១០នាក់ ក្នុងនោះ អ្នកជំងឺព្យាបាលជាសះស្បើយចំនួន១១៦ ៩៤០នាក់ អ្នកស្លាប់កើនដល់ចំនួន៣ ០១៣នាក់ និងករណីនាំចូលពីក្រៅប្រទេសចំនួន១៩ ៩២៦នាក់៕
