ប្រមុខរដ្ឋាភិបាលលោក ហ៊ុន សែន បានព្រមានដាក់ក្រុមហ៊ុន លី ឈួង របស់កូនប្រសាលោក ជាម យៀប ដែលជាអនុប្រធានទី១ រដ្ឋសភា ក្នុងបញ្ជីខ្មៅ ឬ Blacklist បើមិនបញ្ឈប់ «ការសាងសង់សំណង់មុន រួចទើបទូទាត់ថវិកាតាមក្រោយ» ដោយមិនមានការដាក់ដេញថ្លៃ និងពុំបានឆ្លងកាត់ការអនុញ្ញាតពីរដ្ឋាភិបាលថ្នាក់ជាតិ។
ការព្រមានរបស់លោកនាយករដ្ឋមន្ត្រី ហ៊ុន សែន ធ្វើឡើងក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ៤៨ តភ្ជាប់ពីខេត្តព្រះសីហនុ ទៅកាន់ខេត្តកោះកុង នាព្រឹកថ្ងៃទី០៣ ខែមករា ឆ្នាំ២០២២។
លោកនាយករដ្ឋមន្ត្រីលើកឡើងថា ក្រុមហ៊ុន និងអភិបាលខេត្តដែលសង់គម្រោងមានការគប់គិតគ្នា ដោយមិនបានឆ្លងកាត់ការដេញថ្លៃ ហើយមកទាមទាររដ្ឋាភិបាលទូទាត់ថ្លៃចំណាយ ទាំងដែលអភិបាលខេត្តទាំងនោះ មិនបានស្នើមករដ្ឋាភិបាល ដើម្បីសុំសាងសង់សំណង់ទាំងនោះឡើយ។ ក្នុងនោះ លោក ហ៊ុន សែន បានប្រាប់ទៅក្រុមហ៊ុន លី ឈួង ឱ្យបញ្ឈប់ជាបន្ទាន់ បើមិនដូច្នេះទេ លោកនឹងដាក់ក្រុមហ៊ុននេះទៅក្នុងបញ្ជីខ្មៅតែម្តង។
លោក ហ៊ុន សែន មានប្រសាសន៍ថា៖ «ខ្ញុំផ្តាំទៅក្រុមហ៊ុន លី ឈួង ឱ្យបញ្ឈប់ជាបន្ទាន់ បើមិនអញ្ចឹងខ្ញុំនឹងដាក់ក្រុមហ៊ុន លី ឈួងទៅក្នុងបញ្ជីខ្មៅ។ ខ្ញុំដឹងថាក្រុមហ៊ុនអ្នកឯងធ្វើល្អហើយ វិមានសន្តិភាព វិមានសភា ធ្វើកន្លែងនេះកន្លែងនោះ ក៏ប៉ុន្តែអ្នកឯងមិនអាចនឹងធ្វើរបៀបនេះតទៅទៀតបានទេ។ ហើយផ្តាំទៅក្រុមហ៊ុនទាំងអស់កុំឱ្យយកតម្រាប់តាមក្រុមហ៊ុន លី ឈួង»។
ក្រៅពីនោះ លោក ហ៊ុន សែន ដែលអះអាងថា បានកាន់អំណាចជិតកន្លះសតវត្សរូបនេះ ព្រមានដកតំណែងអភិបាលខេត្តណាដែលជំពាក់បំណុលក្រុមហ៊ុន លី ឈួង ពាក់ព័ន្ធករណីគប់គិតគ្នាសាងសង់គម្រោងមុន រួចទើបធ្វើការទូទាត់ប្រាក់តាមក្រោយ ដោយមិនមានការដេញថ្លៃជាមុន។
ប្រមុខរដ្ឋាភិបាលរូបនេះ បានបញ្ជាឱ្យអភិបាលខេត្តទាំងនោះ ដកគម្រោងដែលមិនទាន់បានអនុវត្តឱ្យអស់ និងត្រូវទូទាត់ប្រាក់ដែលជំពាក់ក្រុមហ៊ុន លី ឈួង ក្នុងរយៈពេល ២០ឆ្នាំ។
អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង ប្រាប់វីអូឌីនៅល្ងាចថ្ងៃចន្ទទី៣ ខែមករាថា ម្ចាស់ក្រុមហ៊ុន លី ឈួង ពិតជាក្រុមហ៊ុនកូនប្រសារបស់លោក ជាម យៀប ដែលទើបតែងតាំងជាអនុប្រធានទី១ រដ្ឋសភាប្រាកដមែន។
លោកអះអាងថា៖ «កូនប្រសាឯកឧត្តម ជាម យៀប មែនបាទ។ […] ជាសេចក្តីសម្រេចរបស់សម្តេច ហើយលោកឯកភាពឱ្យ [ក្រុមហ៊ុន] លី ឈួង ធ្វើក៏ខ្លួនលោក អីក៏ខ្លួនលោក។ ហើយក្នុងការអនុវត្តផ្សេងៗ គឺការត្រួតពិនិត្យទៅលោកឃើញអីខុស លោកមុខតែថាហើយ រឿងហ្នឹងចឹង។ ដូច្នេះខ្ញុំអត់មានយោបល់អីចំពោះបញ្ហាហ្នឹងទេ។»
វីអូឌីមិនអាចសុំការបកស្រាយពីភាគីក្រុមហ៊ុន លី ឈួងបានទេនៅថ្ងៃចន្ទនេះ ខណៈបុរសដែលអះអាងថាជាម្ចាស់លេខទូរសព្ទដែលមាននៅលើអាស័យដ្ឋានរបស់ក្រុមហ៊ុន LY CHHUONG CONSTRUCTION & IMPORT EXPORT CO., LTD តបថាលោកមិនមានពាក់ព័ន្ធនឹងក្រុមហ៊ុនសំណង់នេះឡើយ។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន នៅថ្ងៃនេះបដិសេធធ្វើអត្ថាធិប្បាយទាក់ទិនខេត្តដែលពាក់ព័ន្ធករណីគប់គិតសង់គម្រោងមុន រួចទើបធ្វើការទូទាត់ថ្លៃចំណាយតាមក្រោយ ដោយមិនដាក់ឱ្យដេញថ្លៃ។ យ៉ាងណា លោកអះអាងថានឹងបកស្រាយនៅពេលក្រោយ។
អភិបាលរងខេត្តកំពង់ធំ លោកស្រី លំ គុណធារី លើកឡើងថា គម្រោងសំណង់មួយចំនួននៅខេត្តកំពង់ធំត្រូវបានសង់ដោយក្រុមហ៊ុន លី ឈួង ដោយក្នុងនោះកិច្ចសន្យាសរសេរថានឹងទូទាត់ថវិកានៅឆ្នាំ ២០២៤ និងទូទាត់ដោយថ្នាក់ក្រោមជាតិ។ យ៉ាងណា លោកស្រីមិនបានដឹងទេថា មានករណីគប់គិតគ្នារវាងថ្នាក់ខេត្ត និងក្រុមហ៊ុន ឬយ៉ាងណានោះ។
លោកស្រី លំ គុណធារី មានប្រសាសន៍ថា៖ «មិនមានអីត្រូវលាក់បាំងទេ! ប៉ុន្តែអ្វីដែលយើងធ្វើនោះមានផ្លូវមួយខ្សែវាងប្រាសាទសម្បូរព្រៃគុហ៍ អគារអាជ្ញាធរសម្បូរព្រៃគុហ៍ ហើយនិងមានសាកលវិទ្យាល័យដែលត្រៀមនឹងដាក់ឈ្មោះថា សាកលវិទ្យាល័យតេជោ ហ៊ុន សែន ធ្វើនៅទឹកដីស្រុកកំពង់ស្វាយ»។
យ៉ាងណា លោកស្រីថា រដ្ឋបាលខេត្តមិនមែនចេះតែធ្វើគម្រោងទេ ពោលការងារខាងទាំងនេះ គឺមានការដេញថ្លៃនៅឯក្រសួងសេដ្ឋកិច្ច និងហិរញ្ញវត្ថុ។ លោកស្រីបញ្ជាក់ថា កិច្ចសន្យាជាមួយក្រុមហ៊ុនក្នុងឆ្នាំ ២០២០នោះ គឺមានការចុះហត្ថលេខាត្រឹមត្រូវពីអភិបាលខេត្ត ហើយមានការយល់ព្រមពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ថែមទៀតផង។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា តាមពិតកម្ពុជាមានច្បាប់ស្តីពី «លទ្ធកម្មសាធារណៈ» សម្រាប់កំណត់នីតិវិធីនៃការផ្តល់សេវាមួយចំនួនដូចជា សេវាប្រឹក្សាយោបល់ សេវាសាងសង់ជាដើមដែលប្រើប្រាស់ថវិកាជាតិ។ លោកថា គម្រោងធំៗមួយចំនួនដូចជា ហេដ្ឋារចនាសម្ព័ន្ធ អគាររដ្ឋបាលជាដើម ត្រូវធ្វើឡើងតាមនីតិវិធីលទ្ធកម្មសាធារណៈ ដែលមិនអាចរំលងបាន។
លោក សន ជ័យ ថា៖ «នៅពេលដែលមានការរំលង ឬក៏មិនធ្វើតាមនីតិវិធីនៅក្នុងលទ្ធកម្មសាធារណៈ វាអាចធ្វើឱ្យមានផលប៉ះពាល់៖ ទី១ គុណភាពសំណង់ ទី២ វាអាចនាំឱ្យមានការលួចបន្លំគុណភាព។ ហើយទី៣ វាអាចឈានទៅដល់ការកើតចេញនូវអំពើពុករលួយ ហើយនិងប៉ះពាល់ទៅដល់ការចំណាយមួយដែលខ្វះការប្រកួតប្រជែង»។
ក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ៤៨ តភ្ជាប់ខេត្តព្រះសីហនុ ទៅកាន់ខេត្តកោះកុង លោកនាយករដ្ឋមន្ត្រី ហ៊ុន សែន គូសបញ្ជាក់ថា សម្រាប់ការខ្ចីបុលទាំងឡាយមានតែក្រសួងសេដ្ឋកិច្ច និងហិរញ្ញវត្ថុតែប៉ុណ្ណោះ ដែលតំណាងឱ្យរដ្ឋាភិបាល។ ចំណែកករណីអភិបាលខេត្តអនុវត្តការសាងសង់មុន រួចទើបទូទាត់តាមក្រោយ ជាការខ្ចីបុល ដែលរាជរដ្ឋាភិបាល មិនអនុញ្ញាតទេ៕