អាជ្ញាធររាជធានីភ្នំពេញ បានចាប់ខ្លួនកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ និងមេសហជីព២នាក់ទៀត នៅរសៀលនេះ នៅពេលពួកគេបានដើរទៅចូលរួមធ្វើកូដកម្មដោយសន្តិវិធីនៅទីតាំងមុខក្រុមហ៊ុនកាស៊ីណូណាហ្គាវើលដ៍។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានឱ្យដឹងថា មេដឹកនាំសហជីព ៣រូប រួមមាន កញ្ញា ឈឹម ស៊ីថរ លោក សុខ ណារិទ្ធ និងលោក សុខ គង្គា ត្រូវបានសមត្ថកិច្ចចាប់ខ្លួនបានហើយ នៅម៉ោងជាង៤រសៀលនេះ ពាក់ព័ន្ធនឹង «ការញុះញង់ និងរៀបចំការតវ៉ានៅមុខក្រុមហ៊ុនណាហ្គាវើលដ៍»។
— VOD English (@VOD_English) January 4, 2022
កញ្ញា ឈឹម ស៊ីថរ ត្រូវបានអាជ្ញាធរស្លៀកពាក់ស៊ីវិលចំនួន៤ទៅ៥នាក់ចាប់ក្រៀក រួចបញ្ចូលទៅក្នុងរថយន្តពណ៌សមួយគ្រឿងនៅមុខរដ្ឋសភា ខណៈកូដករមួយចំនួនបានចូលទៅជួយ តែមិនបានសម្រេចឡើយ។
កញ្ញា ឈឹម ស៊ីថរ បានប្រកាសកាលពីព្រឹកមិញថា នាងនឹងទៅចូលរួមធ្វើកូដកម្មដោយសន្តិវិធីនៅទីតាំងមុខអគារណាហ្គាវើលដ៍ដែលជាទីកន្លែងក្រុមសហជីពនិងសមាជិកសហជីពកំពុងធ្វើកូដកម្ម។ កញ្ញាបានសន្និដ្ឋានជាមុនថា នាងនឹងអាចត្រូវបានចាប់ខ្លួនដោយកម្លាំងមានសមត្ថកិច្ច។
កញ្ញា ឈឹម ស៊ីថរ គឺជាថ្នាក់ដឹកនាំសហជីពម្នាក់ក្នុងចំណោម៣នាក់ដែលអាជ្ញាធររាជធានីភ្នំពេញបានប្រកាសតាមចាប់ខ្លួនកាលពីព្រឹកមិញនេះ។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានសរសេរនៅលើគណនីហ្វេសប៊ុករបស់លោកស្រី ដោយបានចោទជាសំណួរថា៖ «តើនេះជាសង្គមអ្វី ដែលអាជ្ញាធរមកចាប់ស្ត្រីវ័យក្មេងដោយហិង្សា ក្រៀកកគ្នា ហើយញាត់ចូលឡានទាំងប្រញាប់ប្រញាល់គ្មានដីកាត្រឹមត្រូវ?»
ចំណែកស្ថានទូតសហរដ្ឋអាមេរិក បានបង្ហោះសារនៅលើទំព័រហ្វេសប៊ុកដែរថា ស្ថានទូតប្រទេសមហាអំណាចមួយនេះកំពុងឃ្លាំមើលយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករក្រុមហ៊ុនកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធី និងបានអំពាវនាវឱ្យអាជ្ញាធរកម្ពុជាស្ដាប់សំឡេងរបស់ពលរដ្ឋ។
ស្ថានទូតអាមេរិកបានសរសេរថា៖ «យើងកំពុងធ្វើការតាមដានយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករនៃកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធីរបស់ពួកគេ និងស្នើឱ្យអាជ្ញាធរស្ដាប់ពីពលរដ្ឋ មិនមែនបំបិទសំឡេងរបស់គេទេ។ សេរីភាពក្នុងការបញ្ចេញមតិ ក្នុងការប្រមូលផ្ដុំគ្នា និងក្នុងការចងក្រងគ្នាជាក្រុម សមាគម ត្រូវបានធានាដោយរដ្ឋធម្មនុញ្ញនៃប្រទេសកម្ពុជា»៕
