សវនាការជំនុំជម្រះក្ដីក្នុងសំណុំរឿង «ញុះញង់និងរួមគំនិតក្បត់» មួយករណី ដែលធ្វើឡើងនៅថ្ងៃនេះ ចៅក្រមសាលាដំបូងរាជធានីភ្នំពេញបានណែនាំជនត្រូវចោទ កញ្ញា សេង ធារី កុំឱ្យប្រើពាក្យអសុរោះចោទប្រកាន់លើស្ថាប័នតុលាការ ក្នុងនាមជាខ្មែរដូចគ្នា។
ប្រតិកម្មរបស់ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ នេះ ធ្វើឡើងបន្ទាប់ពីកញ្ញា សេង ធារី បានលើកឡើងក្នុងពេលសវនាការ ដោយស្នើទៅចៅក្រមឱ្យទម្លាក់បទចោទប្រកាន់ «ញុះញង់និងរួមគំនិតក្បត់» ដែលកញ្ញាហៅថា ជាបទចោទប្រកាន់ដ៏ «ឡេឡឺ»។ កញ្ញាថា ការទម្លាក់ចោលបទចោទប្រកាន់នេះ វាជាដំណោះស្រាយដ៏ល្អបំផុតមួយ។
ជាការឆ្លើយតប លោកចៅក្រម រស់ ពិសិដ្ឋ បានលើកឡើងថា ក្នុងនាមលោកជាខ្មែរ លោកបានគោរពកញ្ញា សេង ធារី ប៉ុន្តែកញ្ញាបែរជាប្រើពាក្យអសុរោះមិនសមរម្យលើរូបលោកនិងមន្ត្រីតុលាការផ្សេងទៀតទៅវិញ។ លោកចាត់ទុកពាក្យដែលកញ្ញា សេង ធារី ប្រើនោះថា «ធ្ងន់ធ្ងរពេក» ដោយថា ក្នុងនាមជាខ្មែរដូចគ្នា មិនគួរប្រើប្រាស់ពាក្យនេះឡើយ។
ក្រោយពីចៅក្រមប្រតិកម្មបែបនេះ មេធាវីការពារក្ដីឱ្យកញ្ញា សេង ធារី គឺលោក ជូង ជូងី បានលើកឡើងថា អ្វីដែលកូនក្ដីរបស់លោកបាននិយាយនោះ បានធ្វើឱ្យប៉ះពាល់អារម្មណ៍របស់ចៅក្រមក៏ពិតមែន ប៉ុន្តែការចោទប្រកាន់របស់តុលាការ គឺធ្ងន់ធ្ងរពេក។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ដែលបានឃ្លាំមើលសវនាការ នាថ្ងៃនេះ បានកត់សម្គាល់ថា ចៅក្រមហាក់បានបង្ហាញការខកចិត្តដែលថា កញ្ញា សេង ធារី បានប្រើប្រាស់ពាក្យធ្ងន់ៗដាក់តុលាការ ក្នុងនាមជាខ្មែរដូចគ្នា។ លោកស្រីបន្តថា បើសិនជាតុលាការយល់ថា ប្រជាពលរដ្ឋទាំងអស់គ្នាជាខ្មែរ បទចោទប្រកាន់ «ក្បត់ជាតិ» នេះ មិនគួរត្រូវប្រើប្រាស់នោះឡើយ។
លោកថា៖ «ហើយលោកប្រើពាក្យយើងសុទ្ធតែជាខ្មែរ មិនគួរមើលងាយគ្នាអីជាដើមហ្នឹង សម្រាប់ខ្ញុំយល់ថា ជាពាក្យមួយសំខាន់ដែរ បើសិនជាយើងជាខ្មែរទាំងអស់គ្នា គួរណាយើងយកចិត្តទុកដាក់ចំពោះគ្នា មិនគួរណាមានការប្រើប្រាស់នូវការចាប់ចងឬចោទប្រកាន់ ជាពិសេសការប្រើប្រាស់នូវពាក្យ “ក្បត់ជាតិ” នេះ ជាពាក្យមួយខ្ញុំតែងតែលើកពីដើមថា ជាពាក្យមួយធ្ងន់ធ្ងរមែនទែន ព្រោះពេលដែលយើងនិយាយថា “ខ្មែរយើងក្បត់ជាតិ” យើងបានបន្ទាបតម្លៃពលរដ្ឋខ្លួន ដូចថា ស្រឡាញ់ចំពោះជាតិហ្នឹង»។
យ៉ាងណាក៏ដោយ ក្រោយពីបើកសវនាការបានប្រហែល៣ម៉ោង នៅព្រឹកថ្ងៃអង្គារនេះ ចៅក្រម លោក រស់ ពិសិដ្ឋ បានសម្រេចពន្យារពេលសវនាការទៅថ្ងៃទី១៥ ខែកុម្ភៈ ឆ្នាំ២០២២ ដោយទុកពេលឱ្យមេធាវីថតចម្លងឯកសារ ភស្តុតាង ពាក់ព័ន្ធនឹងសំណុំរឿង «ញុះញង់ និងរួមគំនិតក្បត់» របស់តុលាការទាំងអស់ ដើម្បីយកមកសិក្សានិងពិភាក្សាជាមួយកូនក្ដី។
ការពន្យារពេលសវនាការទៅពាក់កណ្ដាលខែកុម្ភៈ ឆ្នាំ២០២២នេះ ធ្វើឡើងបន្ទាប់ពីមេធាវីការពារក្ដីឱ្យកញ្ញា សេង ធារី គឺលោក ជូង ជូងី បានលើកឡើងក្នុងសវនាការថា រូបលោកទើបបានថតចម្លងឯកសារពីតុលាការកាលពីម្សិលមិញបានតិចតួចប៉ុណ្ណោះ ដោយមិនទាន់មានពេលជួបកូនក្ដីដើម្បីពិភាក្សាគ្នា ពាក់ព័ន្ធនឹងបទល្មើសដែលតុលាការចោទប្រកាន់លើកូនក្ដីនៅឡើយ ខណៈកញ្ញា សេង ធារី បង្ហាញការយល់ព្រមតាមមេធាវី។
លោក ជូង ជូងី បានប្រាប់អ្នកសារព័ត៌មានបន្ទាប់ចេញពីសវនាការថា ទោះបីជាតុលាការទុករយៈពេលឱ្យលោកចំនួន៦សប្ដាហ៍ក៏ពិតមែន ប៉ុន្តែលោកមិនអាចកំណត់ពេលវេលាថាគ្រប់គ្រាន់ឡើយ។
លោកថា៖ «ខ្ញុំអត់ទាន់កំណត់ថាគ្រប់គ្រាន់ទេ ហេតុអី? ពីព្រោះនៅក្នុងសំណុំរឿង វាអាថ៌កំបាំង មិនដឹងឯកសារណាខ្លះបានទម្លាក់បន្ទុកមកលើកូនក្ដីខ្ញុំ ហើយមិនដឹងមានចម្លើយណាដាក់បន្ទុកមកលើកូនក្ដីខ្ញុំ ដែលខ្ញុំត្រូវការសិក្សាត្រៀមតទល់ជាមួយឯកសារ ដោះបន្ទុក និងត្រៀមជាមួយចម្លើយដាក់បន្ទុក អ៊ីចឹងខ្ញុំព្យាករអត់កើត»។
នៅព្រឹកថ្ងៃនេះ សមត្ថកិច្ចក៏បានឃាត់ខ្លួនកញ្ញា សេង ធារី រយៈពេលខ្លី នៅក្បែររូបសំណាកព្រះបរមរតនកោដ្ឋ នរោត្ដម សីហនុ អំឡុងពេលដែលកញ្ញាបានធ្វើដំណើរថ្មើរជើងដោយស្លៀកសម្លៀកបំពាក់ពណ៌ស្លាទុំស្រដៀងនឹងសម្លៀកបំពាក់អ្នកទោស ដើរទៅកាន់សាលាដំបូងរាជធានីភ្នំពេញ។
កញ្ញា សេង ធារី ប្រាប់អ្នកសារព័ត៌មានថា ពេលឃាត់ខ្លួននោះ សមត្ថកិច្ចបានយកទូរសព្ទរបស់គាត់ និងបានឱ្យកញ្ញាប្រាប់លេខកូដសម្ងាត់ ដើម្បីលុបព័ត៌មាន បន្ទាប់ពីកញ្ញាបានឡាយតាមហ្វេសប៊ុក អំឡុងពេលដើរមកចូលរួមសវនាការ ប៉ុន្តែកញ្ញាមិនប្រគល់ឱ្យឡើយ។ លើសពីនេះ កញ្ញាថា សមត្ថកិច្ចខ្លះបានព្រមានចាប់ខ្លួនកញ្ញាបញ្ជូនទៅឃុំខ្លួនពន្ធនាគារតែម្ដង ខណៈកញ្ញាបានស្លៀកពាក់ដូចអ្នកទោសក្នុងពន្ធនាគារទៅហើយនោះ។
កញ្ញា សេង ធារី គឺជាមេធាវីម្នាក់ដែលបានបញ្ចប់ការសិក្សាថ្នាក់បណ្ឌិតច្បាប់នៅសហរដ្ឋអាមេរិក។ ក្រោយមក កញ្ញាបានវិលមកកម្ពុជាវិញ បន្ទាប់ពីរស់នៅនិងសិក្សានៅសហរដ្ឋអាមេរិកអំឡុងពេលរត់ភៀសខ្លួនចេញពីរបបខ្មែរក្រហម។
បើតាមជនជាប់ចោទរូបនេះរៀបរាប់ក្នុងអង្គសវនាការថា ពេលរស់នៅកម្ពុជានោះ កញ្ញាបានធ្វើការងារសង្គមជាច្រើន ដើម្បីជួយទៅដល់ការកសាងសន្តិភាព អប់រំពីច្បាប់ សិទ្ធិមនុស្ស និងប្រជាធិបតេយ្យ ព្រមទាំងធ្លាប់ធ្វើជាប្រធាន «មជ្ឈមណ្ឌលអភិវឌ្ឍន៍សង្គម» ថែមទៀតផង៕
