សាលាដំបូងរាជធានីភ្នំពេញ នៅថ្ងៃអង្គារនេះ បន្តបើកសវនាការសួរដេញដោលលើកញ្ញា សេង ធារី និងអតីតមេដឹកនាំបក្សប្រឆាំង និងអ្នកគាំទ្រជាង៤០នាក់ ក្នុងសំណុំរឿង «ញុះញង់ និងរួមគំនិតក្បត់»។
កាលពីថ្ងៃទី២៨ ខែធ្នូ ឆ្នាំ២០២១ សាលាដំបូងរាជធានីភ្នំពេញ បានសម្រេចផ្អាកសវនាការ ហើយបន្តធ្វើនៅថ្ងៃនេះទៀត បន្ទាប់ពីជនជាប់ចោទម្នាក់ គឺកញ្ញា សេង ធារី បដិសេធឆ្លើយសំណួរបន្ត ដោយរង់ចាំទទួលបានភស្តុតាងពីមេធាវីដែលតុលាការយកមកដាក់បន្ទុកលើកញ្ញា ដោយថា សំណួររបស់ចៅក្រមសួរនោះមិនមានក្នុងឯកសារនិងភស្តុតាងដែលកញ្ញាថតចម្លងពីតុលាការនាពេលកន្លងមកឡើយ។
កញ្ញា សេង ធារី បានឱ្យដឹងតាមរយៈបណ្ដាញសង្គមថា កញ្ញាត្រូវបានអាជ្ញាធររាជធានីភ្នំពេញឃាត់ខ្លួនរយៈពេលខ្លី នៅក្បែរសួនច្បារមុខក្រុមហ៊ុនណាហ្គាវើលដ៍ ខណៈពេលដែលកញ្ញាបានស្លៀកសម្លៀកបំពាក់ពណ៌ស្លាទុំស្រដៀងនឹងសម្លៀកបំពាក់អ្នកជាប់ឃុំ ធ្វើដំណើរចេញពីទីនោះទៅកាន់សាលាដំបូងរាជធានីភ្នំពេញ ដើម្បីបន្តចូលរួមសវនាការនៅព្រឹកនេះ។
កញ្ញាបញ្ជាក់ថា៖ «ខ្ញុំបានអាជ្ញាធរព្រលែង[ដោះលែង]ហើយ ហើយកំពុងធ្វើដំណើរទៅតុលាការក្រុងភ្នំពេញ សម្រាប់សវនាការម៉ោង៨កន្លះ»។
កញ្ញា សេង ធារី គឺជាមេធាវីម្នាក់ដែលបានបញ្ចប់ការសិក្សាថ្នាក់បណ្ឌិតច្បាប់នៅសហរដ្ឋអាមេរិក ក្រោយមកកញ្ញាបានវិលមកកម្ពុជាវិញ បន្ទាប់ពីរស់នៅនិងសិក្សានៅសហរដ្ឋអាមេរិកអំឡុងពេលរត់ភៀសខ្លួនចេញពីរបបខ្មែរក្រហម។
បើតាមជនជាប់ចោទរូបនេះរៀបរាប់ក្នុងអង្គសវនាការថា ពេលរស់នៅកម្ពុជានោះ កញ្ញាបានធ្វើការងារសង្គមជាច្រើន ដើម្បីជួយទៅដល់ការកសាងសន្តិភាព អប់រំពីច្បាប់ សិទ្ធិមនុស្ស និងប្រជាធិបតេយ្យ ព្រមទាំងធ្លាប់ធ្វើជាប្រធាន«មជ្ឈមណ្ឌលអភិវឌ្ឍន៍កម្ពុជា»ថែមទៀតផង៕