ស្ថាប័នសារព័ត៌មានមួយចំនួនដូចជា VOD, EAC និង GN Time ជាដើម មិនត្រូវបានអនុញ្ញាតឱ្យចូលយកព័ត៌មាននៅក្នុងសន្និសីទសារព័ត៌មានស្ដីពី «ការចាប់ខ្លួនបុគ្គលិកណាហ្គាវើលដ៍ (Naga World)» នៅព្រឹកថ្ងៃនេះទេ ខណៈក្លឹបសារព័ត៌មានចង់ឃើញអាជ្ញាធរបើកទូលាយចំពោះគ្រប់ស្ថាប័ន។
មន្ត្រីនគរបាលម្នាក់ដែលមិនបញ្ជាក់អត្តសញ្ញាណ បាននិយាយថា៖ «ខ្ញុំជាអ្នកយាម ធ្វើការតាមតែបទបញ្ជាគេទេ។ គេឱ្យឈ្មោះមកតែប៉ុណ្ណឹង ហើយបើរញ៉េររញ៉ៃ គេដកពួកខ្ញុំទៅបញ្ឈរជើងហើយ អត់ការងារធ្វើឥលូវហើយ»។
មន្ត្រីនគរបាលដដែល បន្តថា៖ «បងអ្នកសារព័ត៌មានដឹងថាតើនរណាមានសិទ្ធិដែលអាចចូលទៅបាន សូមបងធ្វើការទំនាក់ទំនងជាមួយគេ។ ខ្ញុំយល់ មេបងឯងចាត់តាំងមក តែខាងនេះអត់ហ៊ានអនុញ្ញាតទេ ដោយសារតែមានបញ្ជាពីសាលាក្រុង ហើយបទបញ្ជាទាំងនេះសុទ្ធតែមកពីសាលាក្រុង។ ដូច្នេះឱ្យមេទាក់ទងជាមួយសាលាក្រុង ដូច្នេះគេតេមកខាងស្នងការ គេនឹងតេមកប្រាប់ ហើយយើងនឹងអនុញ្ញាតឱ្យចូលហើយ»។
សន្និសីទសារព័ត៌មានដែលរៀបចំដោយស្នងការដ្ឋាននគរបាលរាជធានីភ្នំពេញ ដែលមានការចូលរួមពីព្រះរាជអាជ្ញារងសាលាដំបូងរាជធានីភ្នំពេញ លោក សេង ហៀង នៅថ្ងៃនេះ គឺទាក់ទងនឹងការបង្ហាញភស្តុតាងដែលឈានទៅដល់ការចាប់ឃុំខ្លួននិងការចោទប្រកាន់លើបុគ្គលិកកាស៊ីណូណាហ្គាវើលដ៍ រយៈពេលជាង១០ថ្ងៃមកនេះ។
មន្ត្រីនគរបាលម្នាក់ទៀតដែលជាអ្នកផ្ទៀងផ្ទាត់ឈ្មោះ បាននិយាយថា៖ «គេឱ្យមកបែបនេះ [កាន់បញ្ជីឈ្មោះ] ខ្ញុំមិនចង់ឃាត់អ្នកទាំងអស់គ្នាទុកនោះទេ ហើយដល់ពេលដែលយើងអត់មានឈ្មោះផង តើឱ្យធ្វើយ៉ាងម៉េច?»
លោកបានបន្ថែមថា៖ «ខ្ញុំអត់ដឹងមូលហេតុទេ ដោយសារតែថ្នាក់លើបញ្ជូនតែឈ្មោះមកដែលនឹងត្រូវអនុញ្ញាតឱ្យចូល ខ្ញុំក៏អត់ដឹងមូលហេតុអ្វីដែរ។ ខ្ញុំជាអ្នកយាម ខ្ញុំមិនហាមឃាត់ទេ តែគេមិនអនុញ្ញាតឱ្យចូល មានឈ្មោះទើបអនុញ្ញាតឱ្យចូល»។
នាយកប្រព័ន្ធផ្សព្វផ្សាយនៅមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក អ៊ិត សូធឿត បានចាត់ទុកថា ការហាមឃាត់អ្នកសារព័ត៌មានមិនឱ្យចូលយកព័ត៌មាននៅក្នុងសន្និសីទកាសែតក្រោមលេសមិនបានចុះឈ្មោះបែបនេះ គឺជាការរឹតត្បិតសេរីភាពសារព័ត៌មាន និងមិនឱ្យអនុវត្តតួនាទីរបស់ខ្លួន។
លោកថា៖ «យើងដឹងហើយថា សន្និសីទសារព័ត៌មានជាព្រឹត្តិការណ៍សាធារណៈ ជាពិសេសលើបញ្ហាសាធារណៈ មានន័យថា ពាក់ព័ន្ធនឹងបញ្ហាកម្មករ [ណាហ្គាវើលដ៍] ដែលគាត់តវ៉ាអីជាដើមហ្នឹង! អ៊ីចឹងអ្នកសារព័ត៌មានគួរត្រូវបានអនុញ្ញាត មិនត្រូវរើសអើងទៅតាមនិន្នាការ ឬទៅតាមស្ថាប័ន ដូចជា វីអូឌី ដែលជាស្ថាប័នព័ត៌មានឯករាជ្យ ដែលយើងតែងតែរាយការណ៍ព័ត៌មានបែបរសើប បាតុកម្ម ឬចំណុចអវិជ្ជមានច្រើនរបស់រដ្ឋាភិបាល ដែលនេះគឺជាតួនាទីរបស់អ្នកសារព័ត៌មាន»។
លោក ហ៊ុន សិរីវឌ្ឍន៍ អ្នកយកព័ត៌មានឱ្យ AEC News ដែលមិនត្រូវបានអនុញ្ញាតឱ្យចូលសន្និសីទកាសែតដែរនោះ សុំមិនធ្វើអត្ថាធិប្បាយ។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា ថ្លែងថា៖ «មិនមានការហាមឃាត់ ឬអនុញ្ញាត ឬមិនអនុញ្ញាតនោះទេ។ បញ្ហាសំខាន់លើកលែងតែមានការបញ្ជាក់ត្រឹមត្រូវ និងឯកសារត្រឹមត្រូវ បានយើងអនុញ្ញាត។ យើងមិនចេះតែឱ្យចូលមកប៉ាតណាប៉ាតណី ធ្វើម៉េចយើងដឹងថាអ្នកហ្នឹងមកពីខាងណាខាងណី ទីតាំងរបស់អង្គភាពទាំងមូល យើងមិនអាចអនុញ្ញាតឱ្យចូលប៉ាតណាប៉ាតណីនោះទេ។ សារព័ត៌មានគេឱ្យចូលទេតើ! ពុំមានការហាមឃាត់នោះទេ»។
លោកបានបន្ថែមថា៖ «ពេលខ្លះគាត់មកមិនមានប្រភពច្បាស់លាស់ អត់មានឯកសារអំណះអំណាងច្បាស់លាស់ឱ្យខាងសមត្ថកិច្ច ដូច្នេះខាងសមត្ថកិច្ចគេម៉េចឱ្យចូលផ្ដេសផ្ដាស សមត្ថកិច្ចយើងត្រូវពិនិត្យមើលច្បាស់លាស់ដែរថាតើអង្គភាពណាឬអង្គភាពណី»។
ប្រធានក្លឹបអ្នកកាសែតកម្ពុជា លោក ប៉ែន បូណា បានថ្លែងថា ជាទូទៅ លោកសង្កេតឃើញស្ថាប័នមួយចំនួន គេតម្រូវឱ្យមានការចុះឈ្មោះជាមុន ប៉ុន្តែមិនមែនទូទៅនោះទេ ដូចជា នៅទីស្ដីការគណៈរដ្ឋមន្ត្រី ឬសាលាក្រុង ជាដើម។ ទោះជាយ៉ាងណា លោក ប៉ែន បូណា ចង់ឃើញអាជ្ញាធរបើកទូលាយចំពោះការចុះយកព័ត៌មានរបស់អ្នកសារព័ត៌មានទាំងអស់ដែលមានកាតសារព័ត៌មានត្រឹមត្រូវ។
លោកបានបញ្ជាក់ថា៖ «ការចុះឈ្មោះវាមិនរំខានអីធំដុំដល់យើងដែរ ដើម្បីយើងបានទទួលយកព័ត៌មាន យើងគួរតែចុះឈ្មោះ បើគេតម្រូវឱ្យចុះឈ្មោះមុន។ ខ្ញុំអត់បានទៅដល់កន្លែង ដូច្នេះខ្ញុំអត់ដឹងថាការពិតយ៉ាងម៉េច។ យើងអត់បានចុះឈ្មោះ ហើយគេមិនឱ្យចូល អាហ្នឹងអាចមកពីកំហុសយើងដែរ។ ប៉ុន្តែក្នុងនាមអ្នកកាសែត ខ្ញុំមានបំណងថា ចង់ឱ្យអាជ្ញាធរបើកទូលាយចំពោះស្ថាប័នដែលមានកាត [កាតអ្នកកាសែត] ត្រឹមត្រូវ»។
លោកបានបញ្ជាក់ថា៖ «ស្ថាប័នមួយគេមានបែបបទរបស់គេដែរ ហើយយើងត្រូវតែសម្របខ្លួនខ្លះដែរពេលខ្លះ»។
អ្នកនាំពាក្យក្រសួងព័ត៌មាន លោក មាស សុភ័ណ្ឌ បានពន្យល់ដោយខ្លីថា វាជាសិទ្ធិសម្រេចរបស់អាជ្ញាធរផ្ទាល់។
លោកមានប្រសាសន៍ថា៖ «អាហ្នឹងវាជាសិទ្ធិរបស់អាជ្ញាធរមានសមត្ថកិច្ច ដែលលោកមានសិទ្ធិសម្រេចថាតើត្រូវធ្វើដូចម្ដេចក្នុងពេលបំពេញនិងអនុវត្តតួនាទីភារកិច្ចរបស់ខ្លួន»៕
