សង្គមស៊ីវិលដែលធ្វើការពាក់ព័ន្ធនឹងសិទ្ធិមនុស្ស និងការងារ ទទូចឱ្យតំណាងរាស្ត្រគ្រប់និន្នាការរួមចំណែកស្តាប់កង្វល់ និងពាំនាំបញ្ហារបស់កូដករក្រុមហ៊ុនល្បែងណាហ្គាវើលដ៍ យកទៅពិភាក្សានិងដោះស្រាយ ប៉ុន្តែអ្នកនាំពាក្យថា សភាកំពុងស្ថិតនៅក្នុងពេលវិស្សមកាល។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានបង្ហោះសារនៅលើហ្វេសប៊ុកផ្ទាល់ខ្លួននៅថ្ងៃទី០៥ ខែមករានេះ ដោយបង្ហាញពីការមិនអស់ចិត្តទៅនឹងភាពស្ងាត់ស្ងៀមរបស់តំណាងរាស្ត្រដែលពុំមានសកម្មភាពអ្វីលើរឿងកម្មករនិយោជិតណាហ្គាវើលដ៍តវ៉ារាប់ពាន់នាក់នៅក្បែរបងរដ្ឋសភា។
អ្នកស្រីបានសរសេរថា៖ «ពេញមួយយប់នៅមិនអស់ចិត្ត នឹកដល់តំណាងរាស្ត្រថាតើពួកគាត់បានដឹងរឿងកម្មករនិយោជិតពាន់នាក់ធ្វើកូដកម្មច្រើនថ្ងៃមកហើយទេ។ តើគាត់ដឹងថា អង្គនីតិប្រតិបត្តិបានរឹតត្បិតសិទ្ធិពលរដ្ឋនៅជាប់ជណ្តើរខ្លួនដែរឬទេ? ហើយតំណាងរាស្ត្រជាស្ត្រី តើពួកគាត់បានដឹងរឿងទុក្ខសោករបស់ស្ត្រីរាប់ទាំងស្ត្រីមានផ្ទៃពោះជាច្រើន ដែលឈរហាលថ្ងៃទាមទារដំណោះស្រាយលើវិវាទការងារទេ?»
លោកស្រីបន្តថា៖ «តើតំណាងរាស្ត្រយល់ថា ការចាប់ខ្លួនទាំងកម្រោលលើស្ត្រីវ័យក្មេងនៅជិតរបងសភាខ្លួនជារឿងត្រឹមត្រូវទេ? ហើយតើលោកនាយករដ្ឋមន្ត្រីបានដឹងនិងអាចអន្តរាគមន៍រឿងនេះ ដូចរឿងកូនតោរបស់ជនជាតិចិនមួយរូបដែលទទួលបានដំណោះស្រាយយ៉ាងពេញចិត្តដល់ម្ចាស់តោរូបនោះ ថ្វីបើផ្ទុយពីច្បាប់ដែរឬទេ? ខ្ញុំឆ្ងល់ពេញមួយយប់ សូមជួយស្រាយចម្ងល់ខ្ញុំផង!»
លោកស្រី ចក់ សុភាព បកស្រាយបន្ថែមនូវដើមចមនៃការបង្ហោះសាររបស់ខ្លួនប្រាប់វីអូឌីថា តំណាងរាស្ត្រជាអ្នកតំណាងឱ្យពលរដ្ឋ មិនថាអ្នកបោះឆ្នោត ឬមិនបោះឆ្នោត។ លោកស្រីថា ដូច្នេះតំណាងរាស្ត្រ ត្រូវឈឺឆ្អាល ចុះជួប និងស្តាប់កង្វល់របស់កូដករ ថាតើអ្នកតំណាងរបស់រាស្ត្រទាំងនោះនឹងអាចជួយក្រុមបុគ្គលិករងគ្រោះបានតាមរបៀបណាខ្លះ?
លោកស្រីថា៖ «យើងគួរតែតាមដាន ថាតើមានតំណាងរាស្ត្រណាមួយដែលយកចិត្តទុកដាក់ចំពោះបញ្ហាដែលរាស្ត្រប្រឈម។ យើងដឹងហើយ តំណាងរាស្ត្រត្រូវបានជ្រើសរើសតាមយៈការបោះឆ្នោត ចឹងយើងក៏ដឹងដែរថា វាជិតដល់ពេលបោះឆ្នោតដូចគ្នា ចឹងយើងអាចវិនិច្ឆ័យទៅតាមតថភាពនេះ។ ទោះជាយ៉ាងណា ខ្ញុំចង់ឃើញតំណាងរាស្ត្រគ្រប់រូបមិនថា មាននិន្នាការមកពីបក្សណានោះទេ ត្រូវដើរតួបំពេញកាតព្វកិច្ចរបស់ខ្លួន ក្នុងនាមជាតំណាងរាស្ត្រ ក្នុងនាមជាអ្នកពាំនាំទុក្ខកង្វល់របស់រាស្ត្រយកទៅដោះស្រាយ»។
យ៉ាងណា លោកស្រី សុភាព ថា កូដកម្មនេះមិនជាការធ្វើឡើងតាមការញុះញង់នោះទេ តែកូដករធ្វើដោយស្ម័គ្រចិត្តដោយគ្រាន់តែប្រើបាស់សិទ្ធិរបស់ខ្លួនដើម្បីដំណោះស្រាយសមរម្យ។
តំណាងរាស្ត្រមណ្ឌលរាជធានីភ្នំពេញ មកពីគណបក្សប្រជាជនកម្ពុជា លោក សួន រិនឌី មិនឆ្លើយតបនឹងការរិះគន់នេះទេ ដោយនិយាយយ៉ាងខ្លីថា លោកកំពុងចុះបំពេញបេសកម្មការងារនៅតាមខេត្ត។
លោក សួន រិនឌី៖ «ប៉ុន្មានថ្ងៃនេះ ពូអត់នៅភ្នំពេញផងហ្នឹង ពូចុះខេត្ត! ហ្នឹងហើយ ដល់ពូមកវិញ ឥលូវពូចុះខេត្តហើយ»។
តំណាងរាស្ត្រមណ្ឌលរាជធានីភ្នំពេញមកពីបក្សកាន់អំណាចមួយរូបទៀត លោក លី ឆេង សុំមិនឆ្លើយសំណួររបស់វីអូឌី ដោយនិយាយថា លោកកំពុងជាប់រវល់។
លោកថា៖ «ខ្ញុំជាប់រវល់តិច»។
តំណាងរាស្ត្រមណ្ឌលរាជធានីភ្នំពេញមកពីបក្សដដែល លោកស្រី ឡោក ខេង ក៏បានបដិសេធតបនូវសំណួររបស់វីអូឌី ដោយអះអាងថា ប្រព័ន្ធទូរស័ព្ទមានភាពរអាក់រអួល មិនអាចស្តាប់សំណួរបាន។
លោកស្រីថា៖ «ស្តាប់ (សំណួរ) មិនបានទេ! ឮដាច់ៗ»។
ចំណែកអ្នកនាំពាក្យរដ្ឋសភា លោក ឡេង ប៉េងឡុង ថ្លែងថា លោកមិនបានដឹងថាតើតំណាងរាស្ត្ររាជធានីភ្នំពេញមកពីគណបក្សកាន់អំណាចបានបំពេញភារកិច្ចនេះ ឬយ៉ាងណានោះទេ ដោយសារលោកពុំបានទទួលការរាយការណ៍ណាមួយថា អ្នកតំណាងរាស្ត្រទាំងនោះបានធ្វើអីពាក់ព័ន្ធនឹងស្ថានភាពនៃកូដកម្មរបស់បុគ្គលិកណាហ្គាវើលដ៍នេះទេ។
លោកថា៖ «បើគាត់ (តំណាងរាស្ត្រ) អត់រាយការណ៍មកៗ ពេលនេះពេលវិស្សមកាលផង! ហើយមិនដឹងគាត់ចុះទៅឯណាទេ ក៏ខ្ញុំអត់បានដឹង គាត់អត់រាយការណ៍មក»។
យ៉ាងណា លោក ឡេង ប៉េងឡុង ថា ទោះបីធ្វើកូដកម្មក៏ត្រូវការការចរចា ហើយការចរចាក៏ទាមទារឱ្យមានតម្លាភាពរវាងអ្នកពាក់ព័ន្ធដោយចៀសវាងការប្រកាន់ថា អ្នកតូចតាច ឬអ្នកមានអំណាច។
នាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា មានប្រសាសន៍គាំទ្រនឹងការលើកឡើងរបស់លោកស្រី ចក់ សុភាព។ លោកថា តំណាងរាស្ត្រ តំណាងឱ្យពលរដ្ឋ ហើយត្រូវបានពលរដ្ឋបោះឆ្នោតផ្តល់សេចក្តីទុកចិត្ត ឱ្យតាក់តែងនូវគោលនយោបាយ ច្បាប់ជាតិ សម្រាប់ជាប្រយោជន៍ដល់ពលរដ្ឋវិញ។
លោកថា៖ «កាលណាតំណាងរាស្ត្រហ្នឹង អ្នកដែលអង្គុយនៅក្នុងសភា សមាជិកសភាទាំងអស់ហ្នឹង មិនមែនកើតចេញពីការបោះឆ្នោតដែលសេរី យុត្តិធម៌ទេ តំណាងរាស្ត្រហ្នឹងច្រើនតែអសកម្ម គឺគាត់អត់សូវបានខ្វល់ យកចិត្តទុកដាក់ជាមួយនឹងសុខទុក្ខរបស់ពលរដ្ឋ ឬសុខទុក្ខរបស់ម្ចាស់ខ្លួនឯងហ្នឹងទេ ប៉ុន្តែគាត់ខ្វល់តែរឿងយកចិត្តយកថ្លើមមេបក្សរបស់គាត់ទៅវិញ»។
កូដកម្មរបស់បុគ្គលិកក្រុមហ៊ុនណាហ្គាវើលដ៍ បានបន្តធ្វើនៅល្ងាចថ្ងៃពុធនេះ បើទោះបីជាអាជ្ញាធរបានចាប់ខ្លួនថ្នាកដឹកនាំរបស់ខ្លួនក៏ដោយ។
សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ លោក លឹម ឫទ្ធារតនា បង្ហាញជំហរធ្វើកូដកម្មទាមទារដំណោះស្រាយបន្តទៀត បើទោះបីទើបនឹងត្រូវបានអាជ្ញាធរឱ្យធ្វើកិច្ចសន្យា និងដោះលែងវិញ កាលពីយប់មិញនេះក៏ដោយ។
លោកថា៖ «ប្រជាជនយើងទាំងអស់គ្នាមានសិទ្ធិក្នុងការតវ៉ា និងសម្តែងមតិ។ ខ្ញុំមិនដឹងថាត្រូវនិយាយយ៉ាងណាឱ្យត្រូវទេ ប៉ុន្តែរឿងមកដល់ពេលនេះហើយ គឺគ្មានពាក្យថាបកក្រោយទេ។ (ខ្ញុំ) ត្រូវបានអាជ្ញាធរចាប់ខ្លួន និងឱ្យធ្វើកិច្ចសន្យា។ ក្នុងកិច្ចសន្យាហ្នឹងគេឱ្យយើងឈប់ធ្វើកូដកម្មខុសច្បាប់ ប៉ុន្តែយើងដឹងខ្លួនយើងថាកូដកម្មហ្នឹងជាកូដកម្មខុសច្បាប់ ឬក៏មិនខុសច្បាប់»។
គិតត្រឹមថ្ងៃទី៥ ខែមករា នេះ កូដកម្មរបស់បុគ្គលិកក្រុមហ៊ុនណាហ្គាវើលដ៍បានធ្វើអស់រយៈពេលជិត២០ថ្ងៃហើយ ចាប់តាំងពីថ្ងៃទី១៨ ខែធ្នូ ឆ្នាំ២០២១ ដើម្បីទាមទារឱ្យក្រុមហ៊ុនទទួលយកបុគ្គលិកជាង៣០០នាក់ចូលធ្វើការងារឡើងវិញ។ កូដកម្មរបស់បុគ្គលិកក្រុមហ៊ុនណាហ្គាវើលដ៍ ក៏បានឈានទៅដល់ការចាប់ខ្លួន និងចោទប្រកាន់ថ្នាក់ដឹកនាំសហជីព ២៦ នាក់។ ប៉ុន្តែបានដោះលែងមកវិញ ១៨ នាក់ ខណៈ ៨ នាក់ត្រូវបានតុលាការបន្តនីតិវិធីចោទប្រកាន់ និងឃុំខ្លួនបណ្តោះអាសន្នក្នុងពន្ធនាគារ ក្នុងនោះក៏រួមមាន កញ្ញា ឈឹម ស៊ីថរ ប្រធានសហជីពប្រចាំក្រុមហ៊ុនណាហ្គាវើលដ៍ និងលោក សុខ ណារិទ្ធ ថ្នាក់ដឹកនាំសហជីពនៅក្រុមហ៊ុនណាហ្គាវើលដ៍ ខណៈមន្ត្រីសហជីពម្នាក់ទៀត លោក សុខ គង្គា ត្រូវបានដោះលែងនៅក្រៅឃុំ ប៉ុន្តែដាក់ឱ្យស្ថិតនៅក្រោមការត្រួតពិនិត្យរបស់តុលាការនៅល្ងាចថ្ងៃទី៥ ខែមករានេះ៕
