ក្រុមអង្គការសង្គមស៊ីវិល សហភាពសហជីព សហព័ន្ធសហជីព និងសមាគមជាង ១០០ (១១៩) ស្ថាប័នបានអំពាវនាវឱ្យដោះលែងថ្នាក់ដឹកនាំកញ្ញា ឈឹម ស៊ីថរ និងសមាជិកសហជីពណាហ្គាវើលដ៍ដែលត្រូវបានចាប់ខ្លួនជាបន្ទាន់ និងឥតលក្ខខណ្ឌ។
តាមរយៈសេចក្តីថ្លែងការណ៍កម្រាស់៥ទំព័រចេញផ្សាយនៅល្ងាចថ្ងៃទី៤ ខែមករា ក្រុមអង្គការសង្គមស៊ីវិលសរុប ១១៩ ស្ថាប័ន បានសំដែងការខកចិត្តជាខ្លាំង ចំពោះវិធានការរបស់សមត្ថកិច្ចដែលដឹកនាំដោយស្នងការនគរបាលរាជធានីភ្នំពេញ ដែលបានឃាត់ខ្លួនថ្នាក់ដឹកនាំសហជីព ប្រតិភូចរចារ និងសកម្មជនសហជីពទ្រទ្រង់សិទិ្ធការងារ បុគ្គលិក កម្មករខ្មែរនៃក្រុមហ៊ុនណាហ្គាវើលដ៏ (LRSU) ជិត២០នាក់ រួមទាំងការចាប់ខ្លួនកញ្ញា ឈឹម ស៊ីថរ នៅរសៀលថ្ងៃទី៤ ខែមករា ឆ្នាំ២០២២។ ក្រុមអង្គការសង្គមស៊ីវិលដែលរួមមាន សហគមន៍ដីធ្លី សហព័ន្ធសហជីពកម្មករសំណង់ និងព្រៃឈើកម្ពុជា មជ្ឈមណ្ឌលសិទ្ធិមនុស្សកម្ពុជា និងអង្គការសង្គមស៊ីវិលសរុប ១១៩ ស្ថាប័នបានអំពាវនាវឱ្យអាជ្ញាធរកម្ពុជាដោះលែងថ្នាក់ដឹកនាំ និងសមាជិកសហជីព ដែលត្រូវបានចាប់ខ្លួនជាបន្តបន្ទាប់នេះ ជាបន្ទាន់ និងឥតលក្ខខណ្ឌ។
សេចក្តីថ្លែងការណ៍បានសរសេរថា៖ «យើងខ្ញុំមានការខកចិត្តយ៉ាងខ្លាំង ចំពោះវិធានការរបស់អាជ្ញាធរមានសមត្ថកិច្ចដែលមិនបានអនុវត្តតួនាទី និងកាតព្វកិច្ចរបស់ខ្លួនឱ្យស្របតាមច្បាប់ក្នុងការចូលរួមការពារសុវត្ថិភាព ក្រុមកូដករដែលធ្វើកូដកម្មដោយអហិង្សា ប៉ុន្តែបែរជាធ្វើការចាប់ខ្លួនថ្នាក់ដឹកនាំ និងសមាជិកសហជីពណាហ្គាវើលដ៍ ទាំងនៅពេលយប់ និងចោទប្រកាន់អ្នកទាំងនោះដោយមិនត្រឹមត្រូវទៅវិញ»។
សេចក្តីថ្លែងការណ៍បានអំពាវនាវថា៖ «អាជ្ញាធរត្រូវតែបញ្ឈប់ការបំភិតបំភ័យ និងគម្រាមកំហែងថ្នាក់ដឹកនាំ និងសមាជិកសហជីព ដោយបញ្ឈប់ការប្រើប្រាស់ការចោទប្រកាន់តាមផ្លូវតុលាការ ឬ ការបន្ទរសារបំភិតបំភ័យតាមរយៈសារព័ត៌មានដែលគាំទ្ររដ្ឋាភិបាល»។
សេចក្តីថ្លែងការណ៍បានកត់សម្គាល់ថា ក្នុងចំណោមអ្នកដែលត្រូវបានចាប់ខ្លួន ក៏ដូចជាអ្នកដែលចូលរួមក្នុងកូដកម្មអហិង្សានេះ គឺជាស្ត្រី។ ស្ត្រីដែលត្រូវបានច្បាប់ជាតិ ក៏ដូចជា អនុសញ្ញាអន្តរជាតិស្តីពីសិទ្ធិស្ត្រី បានផ្តល់សិទ្ធិសេរីភាពក្នុងការបញ្ចេញមតិ ការប្រមូលផ្តុំ និងការជួបជុំគ្នាដោយអហិង្សា ហើយនិងបង្កើតសហជីពស្របច្បាប់។
សេចក្តីថ្លែងការណ៍នេះបានធ្វើឡើង បន្ទាប់ពីអាជ្ញាធររាជធានីភ្នំពេញ បានចាប់ខ្លួនកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ និងថ្នាក់ដឹកនាំសហជីព២នាក់ទៀត បញ្ជូនទៅតុលាការនៅរសៀលថ្ងៃនេះ។ កញ្ញា ឈឹម ស៊ីថរ ត្រូវបានអាជ្ញាធរស្លៀកពាក់ស៊ីវិលចំនួន៤ទៅ៥នាក់ចាប់ក្រៀក រួចបញ្ចូលទៅក្នុងរថយន្តពណ៌សមួយគ្រឿងនៅក្បែអគារស្ថានទូតអូស្ត្រាលីនិងរដ្ឋសភា ខណៈកូដករមួយចំនួនបានចូលទៅជួយ តែមិនបានសម្រេចឡើយ។
កញ្ញា ឈឹម ស៊ីថរ បានប្រកាសកាលពីព្រឹកមិញថា នាងនឹងទៅចូលរួមធ្វើកូដកម្មដោយសន្តិវិធីនៅទីតាំងមុខអគារណាហ្គាវើលដ៍ដែលជាទីកន្លែងក្រុមសហជីពនិងសមាជិកសហជីពកំពុងធ្វើកូដកម្ម។ កញ្ញាបានសន្និដ្ឋានជាមុនថា នាងនឹងអាចត្រូវបានចាប់ខ្លួនដោយកម្លាំងមានសមត្ថកិច្ច។
កញ្ញា ឈឹម ស៊ីថរ គឺជាថ្នាក់ដឹកនាំសហជីពម្នាក់ក្នុងចំណោម៣នាក់ដែលអាជ្ញាធររាជធានីភ្នំពេញបានប្រកាសតាមចាប់ខ្លួនកាលពីព្រឹកមិញនេះ។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានសរសេរនៅលើគណនីហ្វេសប៊ុករបស់លោកស្រី ដោយបានចោទជាសំណួរថា៖ «តើនេះជាសង្គមអ្វី ដែលអាជ្ញាធរមកចាប់ស្ត្រីវ័យក្មេងដោយហិង្សា ក្រៀកកគ្នា ហើយញាត់ចូលឡានទាំងប្រញាប់ប្រញាល់គ្មានដីកាត្រឹមត្រូវ?»។
ចំណែកស្ថានទូតសហរដ្ឋអាមេរិកប្រចាំនៅកម្ពុជា បានបង្ហោះសារនៅលើទំព័រហ្វេសប៊ុកនៅថ្ងៃនេះថា ស្ថានទូតប្រទេសមហាអំណាចមួយនេះកំពុងឃ្លាំមើលយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករក្រុមហ៊ុនកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធី និងបានអំពាវនាវឱ្យអាជ្ញាធរកម្ពុជាស្ដាប់សំឡេងរបស់ពលរដ្ឋ។
ស្ថានទូតអាមេរិកបានសរសេរថា៖ «យើងកំពុងធ្វើការតាមដានយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករនៃកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធីរបស់ពួកគេ និងស្នើឱ្យអាជ្ញាធរស្ដាប់ពី [សំឡេង] ពលរដ្ឋ មិនមែនបំបិទសំឡេងរបស់គេទេ។ សេរីភាពក្នុងការបញ្ចេញមតិ ក្នុងការប្រមូលផ្ដុំគ្នា និងក្នុងការចងក្រងគ្នាជាក្រុម សមាគម ត្រូវបានធានាដោយរដ្ឋធម្មនុញ្ញនៃប្រទេសកម្ពុជា»។ គិតត្រឹមថ្ងៃទី៤ ខែមករា ឆ្នាំ២០២២នេះ អាជ្ញាធរបានចាប់ខ្លួនកម្មករ សហជីព និងតំណាងសហជីពសរុបចំនួន២៦នាក់ ក្នុងនោះ បញ្ជូនទៅតុលាការ៩នាក់ ធ្វើកិច្ចសន្យាដោះលែងវិញចំនួន៣នាក់ និងកំពុងបន្តសាកសួរជាង១០នាក់ទៀត៕
