អាជ្ញាធររាជធានីភ្នំពេញ បានដោះលែងកូដករណាហ្គាវើលដ៍ ១៦នាក់មកវិញ កាលពីយប់ថ្ងៃទី៤ ខែមករានេះ ក្រោយសាកសួរ និងធ្វើកិច្ចសន្យាអប់រំ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានថ្លែងប្រាប់វីអូឌីនៅព្រឹកថ្ងៃពុធនេះថា មន្ត្រីជំនាញបានសាកសួរទៅលើកូដករទាំងនោះ ខណៈកូដករ ៣នាក់ក្នុងនោះរួមមានកញ្ញា ឈឹម ស៊ីថរ ផងត្រូវបានបញ្ជូនទៅតុលាការកាលពីម្សិលមិញ និងត្រូវបញ្ជូនទៅដំណាក់កាលបន្តទៀត។ ដោយឡែក លោកថា កូដករ១៦នាក់ទៀត ត្រូវបានដោះលែងវិញកាលពីយប់មិញនេះ។
លោកថា៖ «ម្សិលមិញ ១៦នាក់ហ្នឹង គឺសមត្ថកិច្ចយើង បានធ្វើការណែនាំ អប់រំ ធ្វើកិច្ចសន្យា ដោះលែងហើយនៅយប់មិញ»។
លោក សាន សុខសីហា និយាយថា បើកូដករទាំងនោះគ្រាន់តែចូលរួមធ្វើកូដកម្មដោយមិនដឹង ឬដោយសារចាញ់បោកគេ និងមិនមានភស្តុតាងណាមួយនោះ គឺសមត្ថកិច្ចគ្រាន់តែណែនាំ អប់រំ រួចដោះលែង។ យ៉ាងណាលោកថា បើសិនស្រាវជ្រាវឃើញមានភស្តុតាង ថាពាក់ព័ន្ធករណីចូលរួមក្នុងចលនាខុសច្បាប់ អុកឡុក ញុះញង់ និងបង្កឱ្យមានភាពអសន្តិសុខនៅក្នុងសង្គម នោះសមត្ថកិច្ចនឹងចាត់វិធានការតាមផ្លូវច្បាប់។
សូមបញ្ជាក់ថា ក្នុងចំណោមកម្មករ សហជីព និងថ្នាក់ដឹកនាំសហជីពណាហ្គាវើលដ៍សរុប២៦នាក់ ដែលត្រូវបានចាប់ខ្លួនចាប់តាំងពីយប់ថ្ងៃទី៣១ ធ្នូ ដល់ថ្ងៃទី៤ ខែមករាម្សិលមិញនេះ គឺអាជ្ញាធរបានសម្រេចបញ្ជូនទៅតុលាការ៩នាក់ និងធ្វើកិច្ចសន្យាដោះលែងវិញចំនួន១៧នាក់៕
