ក្រុមអ្នកជំនាញរបស់អង្គការសហប្រជាជាតិថ្កោលទោសចំពោះការចាប់ខ្លួន និងឃុំខ្លួនថ្នាក់ដឹកនាំសហជីពណាហ្គាវើលដ៍ និងបានអំពាវនាវឱ្យរដ្ឋាភិបាលពន្យល់នូវសកម្មភាពឆ្លើយតបរបស់មន្រ្តីនគរបាលនៅក្នុងករណីនេះ។
តាមរយៈសេចក្តីប្រកាសព័ត៌មានកាលពីថ្ងៃទី៥ ខែមករា ក្រុមអ្នកជំនាញផ្នែកសិទ្ធិមនុស្សនៃអង្គការសហប្រជាជាតិបានចាត់ទុកថា ការចាប់ និងឃុំខ្លួនអ្នកដឹកនាំ និងសកម្មជនសហជីពកាស៊ីណូណាហ្គាវើលដ៍ យ៉ាងហោចណាស់ ២៩នាក់ ក្នុងអំឡុងពេលធ្វើកូដកម្មជាបន្តបន្ទាប់ មកនេះ អាចជាការរំលោភបំពានលើច្បាប់សិទ្ធិមនុស្ស។
ក្រុមអ្នកជំនាញសិទ្ធិមនុស្សឯករាជ្យបានមានប្រសាសន៍ថា៖ «យើងខ្ញុំក៏សូមធ្វើការថ្កោលទោសយ៉ាងខ្លាំងចំពោះរបៀបនៃការចាប់ខ្លួនករណីដំបូងៗ ដែលបានធ្វើឡើងនៅពេលយប់មុនឆ្លងចូលឆ្នាំថ្មី នៅពេលមានព្រឹត្តិការណ៍ជាច្រើនផ្សេងទៀតបានបង្វែរចំណាប់អារម្មណ៍សាធារណជន។ នេះអាចត្រូវបានគេមើលឃើញថា ជាមធ្យោបាយមិនសមរម្យមួយក្នុងការរឹតត្បិតសិទ្ធិមនុស្សជាមូលដ្ឋាន»។
អ្នកជំនាញសិទ្ធិមនុស្សនៃក្រុមប្រឹក្សាសិទ្ធិមនុស្សអង្គការសហប្រជាជាតិទាំងនោះរួមមាន លោក Vitit Muntarbhorn អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា, លោកស្រី Irene Khan អ្នករាយការណ៍ពិសេសស្តីពីការលើកកម្ពស់ និងការការពារសិទ្ធិសេរីភាពនៃការបញ្ចេញគំនិត និងមតិយោបល់, លោកស្រី Mary Lawlor អ្នករាយការណ៍ពិសេសស្តីពីស្ថានភាពរបស់អ្នកការពារសិទ្ធិមនុស្ស និងលោក Clément Nyaletsossi Voule អ្នករាយការណ៍ពិសេសស្តីពីសិទ្ធិខាងការប្រមូលផ្តុំដោយសន្តិវិធី និងខាងសមាគម។
ក្រុមអ្នកជំនាញក៍បានលើកឡើងដែរថា ការចោទប្រកាន់ និងការចាប់ខ្លួនថ្មីៗនេះបង្កឲ្យមានការព្រួយបារម្ភជាពិសេស នៅពេលដែលប្រទេសកម្ពុជាកំពុងត្រៀមរៀបចំការបោះឆ្នោតឃុំ សង្កាត់នៅឆ្នាំនេះ និងការបោះឆ្នោតជាតិនៅឆ្នាំក្រោយ។ ការធ្វើបែបនេះ បញ្ចូនសារដ៏គួរឲ្យភ័យខ្លាចដល់ប្រជាជនខ្មែរអំពីលំហក្នុងការប្រមូលផ្តុំដោយសេរី។
ក្រុមអ្នកជំនាញផ្នែកសិទ្ធិមនុស្ស ក៏ជំរុញឲ្យមន្ត្រីទាំងឡាយគោរពតាមការប្តេជ្ញាចិត្តរបស់ខ្លួនចំពោះច្បាប់សិទ្ធិមនុស្សជាតិ និងអន្តរជាតិ និងផ្តល់តម្លាភាពឲ្យបានពេញលេញក្នុងដំណើរការនីតិវិធីនៃករណីទាំងអស់នេះ។ លើសពីនេះទៀត ក្រុមអ្នកជំនាញបានអំពាវនាវជាថ្មីម្តងទៀត ឲ្យរាជរដ្ឋាភិបាល អនុវត្តនូវអនុសាសន៍ដែលខ្លួនបានទទួលយកក្នុងអំឡុងពេលនៃការត្រួតពិនិត្យឡើងវិញ ជាសកលតាមកាលកំណត់ នាឆ្នាំ២០១៩ ដែលរួមបញ្ចូលទាំងការសន្យាដើម្បីបង្កើតលក្ខខណ្ឌដែល “សង្គមស៊ីវិល រួមទាំងអ្នកការពារសិទ្ធិមនុស្ស អាចបំពេញការងារ របស់ពួកគេដោយសេរី ដោយគ្មានការជ្រៀតជ្រែក ឬការរារាំង។
គិតមកដល់ពេលនេះ យ៉ាងហោចណាស់ មានមនុស្ស ៩នាក់ ក្នុងនោះស្រ្តី ៧នាក់ និងបុរស ២នាក់ ត្រូវបានចោទប្រកាន់ពីបទ “ញុះញង់ឲ្យ ប្រព្រឹត្តបទឧក្រិដ្ឋជាអាទិ៍” តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា ហើយកំពុងស្ថិតក្នុងការឃុំខ្លួន ខណៈអ្នកផ្សេងទៀតត្រូវបាន ដោះលែង។
បើទោះបីជាមានការចាប់ខ្លួនថ្នាក់ដឹកនាំសហជីពណាហ្គាវើលដ៍ក្តី ក៏បុគ្គលិកណាហ្គាវើលដ៍រាប់រយនាក់នៅតែបន្តធ្វើកូដកម្ម ដើម្បី ទាមទារ ឱ្យថៅកែទទួលយកបុគ្គលិកជាង៣០០នាក់ដែលភាគច្រើនជាសមាជិកនិងថ្នាក់ដឹកនាំសហជីពចូលធ្វើការងារឡើងវិញ និងទាមទារឱ្យ ដោះលែងថ្នាក់ដឹកនាំសហជីពរបស់ពួកគេមកវិញ៕
