បុគ្គលិកក្រុមហ៊ុនកាស៊ីណូណាហ្គាវើលដ៍ ប្តេជ្ញាបន្តធ្វើកូដកម្មរហូតបានសហជីពរបស់ពួកគេត្រលប់មកវិញ បើទោះអាជ្ញាធរបានចាប់ខ្លួនមេដឹកនាំសហជីពពួកគេក៏ដោយ។
សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ និងជាកូដករមួយរូប អ្នកស្រី គង់ ចាន់ណុច ដែលធ្លាប់ត្រូវបានអាជ្ញាធរចាប់ខ្លួន និងដោះលែងវិញកាលពីថ្ងៃទី៤ ខែមករា បានថ្លែងប្រាប់វីអូឌី នៅថ្ងៃព្រហស្បត្តិ៍ថា អ្នកស្រីនៅតែបន្តធ្វើកូដកម្ម បើទោះបីជាអ្នកស្រីធ្លាប់ត្រូវបានអាជ្ញាធរចាប់ខ្លួនក្តី។
អ្នកស្រីបន្តថា ការចូលរួមនេះគឺធ្វើឡើងដោយស្ម័គ្រចិត្តដើម្បីការពារសិទ្ធិរបស់ខ្លួន ចង់បានសហជីពរបស់ខ្លួនមកវិញ និងចង់បានដំណោះស្រាយពីក្រុមហ៊ុន។ អ្នកស្រីថា បើចរចាបន្ត គឺពួកគាត់ចង់បានសហជីពរបស់ពួកគាត់ ព្រោះសហជីពទាំងនោះជាអ្នកតំណាងរបស់បុគ្គលិកប្រមាណជាង ១០០០នាក់។
អ្នកស្រីថា៖ «គេហាមឃាត់ អត់ឱ្យពួកខ្ញុំចូលដល់ក្រុមហ៊ុនទេ អត់ដល់របងក្រុមហ៊ុនហ្មង។ គេចង់តែឱ្យពួកខ្ញុំធ្វើឱ្យឆ្ងាយៗតែម្តង ហើយចាប់មេ តំណាងពួកខ្ញុំ គឺចង់គម្រាមពួកខ្ញុំឱ្យឈប់ធ្វើកូដកម្មហ្មង តែពួកខ្ញុំជំហររឹងមាំរៀងៗខ្លួន។ ពួកខ្ញុំគ្មានការបង្ខិតបង្ខំទេ គឺជំហរពួកខ្ញុំ គឺចង់បានតំណាងមកវិញ ដើម្បីចរចាជាមួយក្រុមហ៊ុន»។
អ្នកស្រីបន្តថា នៅកន្លែងធ្វើកូដកម្មមានអាជ្ញាធរតាមឃ្លាំមើល ដែលមើលទៅមានចំនួនច្រើនជាងក្រុមកូដករទៅទៀត។ យ៉ាងណា អ្នកស្រីបញ្ជាក់ថា នៅតែបន្តជំហរធ្វើកូដកម្មដដែល បើទោះបីបារម្ភពីសុវត្ថិភាពក៏ដោយ។
អ្នកតវ៉ាមួយរូបទៀត អ្នកស្រី ញឹម សាម៉ៃ អះអាងថា គាត់រងនូវភាពអយុត្តិធម៌ និងការគាប់សង្កត់ពេលធ្វើកូដកម្ម។ បែបនេះក្តីអ្នកស្រីថា គាត់នឹងបន្តធ្វើកូដកម្មបន្តរហូតទាល់តែតំណាងសហជីពបានចូលធ្វើការជាមួយគ្នាវិញ។
អ្នកស្រីថា៖ «ខ្ញុំមានជម្លោះជាមួយក្រុមហ៊ុនណាហ្គាវើលដ៍ តែអាជ្ញាធររារាំងរហូត អត់ឱ្យពួកខ្ញុំធ្វើកូដកម្ម។ ខ្ញុំត្រូវការសហជីពនៅកន្លែងធ្វើការរបស់ខ្ញុំ។ មានការរារាំងពីអាជ្ញាធរ មានការចាប់ឡើងឡាន និយាយទៅមានគ្រប់ស្ថានភាពទាំងអស់»។
អ្នកស្រី ញឹម សាម៉ៃ ថា គិតត្រឹមថ្ងៃទី៦ ខែមករានេះ គឺគម្រប់ ២០ថ្ងៃហើយដែលក្រុមកូដករតវ៉ាបែបអហិង្សាដើម្បីទាមទារសិទ្ធិរបស់ខ្លួន។ អ្នកតវ៉ារូបនេះថា អ្វីដែលពួកគាត់កត់សម្គាល់ គឺសមត្ថកិច្ចមិនបានជួយសម្រួលស្ថានភាពពួកគាត់ទេ តែបែរជាប្រើពាក្យសម្តី និងកាយវិការមិនសមរម្យទាល់តែសោះមកលើពួកគាត់។
អ្នកស្រី ញឹម សាម៉ៃ បន្ថែមថា៖ «គាត់ប្រើពាក្យអសុរសមកលើពួកខ្ញុំ សម្តីអត់ពិរោះទេ! […] ថ្ងៃដែលគេចាប់ពួកខ្ញុំឡើងឡាន មានទាំងស្ត្រីពោះធំទៀត។ ខ្ញុំស្រែកប្រាប់គាត់ថា កុំឱ្យរុញ ព្រោះអីគាត់ពោះធំ គេថាបើពោះធំហើយមកធ្វើៗអី? [ខ្ញុំតបថា] ពួកខ្ញុំមកទាមទារសិទ្ធិសេរីភាពរបស់ខ្ញុំនៅកន្លែងធ្វើការទេ ខ្ញុំត្រូវការសហជីព! ពួកគេ [អាជ្ញាធរ] រុញ ធាក់»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ មានប្រសាសន៍ប្រាប់វីអូឌីតាមប្រព័ន្ធតេលេក្រាមថា ជម្លោះនៅក្នុងក្រុមហ៊ុនណាហ្គាវើលដ៍នវមានទិដ្ឋភាព២ គឺទិដ្ឋភាពច្បាប់ការងារ និងមិនមែនច្បាប់ការងារ។ លោកថា អ្វីដែលមិនមែនជាច្បាប់ការងារ លោកសុំមិនអត្ថាធិប្បាយទេ។
លោក ហេង សួរ ថា៖ «ចំពោះទិដ្ឋភាពច្បាប់ការងារពាក់ព័ន្ធជាមួយការទូទាត់សំណងផ្សេងៗ គឺក្រសួងបានជូនដំណឹងជាច្រើនដងហើយថា ក្រសួងប្តេជ្ញាការពាររាល់ប្រយោជន៍របស់បងប្អូនដែលមានចែងនៅក្នុងច្បាប់។ ដូច្នេះសុំឱ្យបងប្អូនអតីតបុគ្គលិកចូលមកគណនាជាមួយមន្ត្រីរបស់ក្រសួង»។
លោកបន្តថា ក្រសួងត្រូវការតួលេខ និងទិន្នន័យពីបុគ្គលិកម្នាក់ៗដើម្បីយកមកគណនា។ លោកថា ក្រសួងមិនអាចយកទិន្នន័យតែពីខាងនិយោជកនោះទេ ពីព្រោះវាអាចមានលម្អៀង។
លោកថា៖ «សារជាថ្មីម្តងទៀតសូមបងប្អូនដែលពិតជាចង់ទទួលបាននូវសំណង ហើយយល់ថា និយោជកគណនាខុស សូមមកជួបមន្ត្រីក្រសួងដើម្បីផ្ទៀងផ្ទាត់»។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ លោក ឃុន ថារ៉ូ លើកឡើងថា បុគ្គលិកហាក់អស់ជំនឿលើយន្តការរបស់ក្រសួងការងារ និងបណ្តុះបណ្តាលវិជ្ជាជីវៈ ដោយអះអាងថា ក្រសួងការងារបានបរាជ័យក្នុងការដោះស្រាយវិវាទការងាររវាងនិយោជិត និងក្រុមហ៊ុនកាស៊ីណូណាហ្គាវើលន៍នេះ។
លោកថា៖ «ដើម្បីដោះស្រាយរឿងហ្នឹង គឺមានតែការចរចាដោយសន្តិវិធី ហើយជ្រើសរើសស្ថាប័នឯករាជ្យណាមួយ ដើម្បីដោះស្រាយរឿងហ្នឹង ដែលអាចទទួលស្គាល់ដោយភាគីទាំងសងខាង។ រឿងដែលសំខាន់មួយទៀតនោះ វាលុះត្រាតែទម្លាក់ចោលនូវការចោទប្រកាន់ ដោះលែងនូវតំណាងរបស់គេហ្នឹង ដើម្បីឱ្យគេមានសិទ្ធិពេញលេញនៅក្នុងការតំណាងឱ្យបុគ្គលិកនិយោជិតហ្នឹងទៅចរចា»។
គិតត្រឹមថ្ងៃទី៦ ខែមករា នេះ គឺមានរយៈពេល២០ថ្ងៃហើយ ដែលបុគ្គលិកក្រុមហ៊ុនកាស៊ីណូណាហ្គាវើលដ៍បានធ្វើកូដកម្មដើម្បីទាមទារឱ្យថៅកែក្រុមហ៊ុនទទួលយកបុគ្គលិកជាង៣០០នាក់ត្រលប់ចូលធ្វើការវិញ។ គិតចាប់ពីថ្ងៃផ្ទុះកូដកម្មនៅថ្ងៃទី១៨ ខែធ្នូ ឆ្នាំ២០២១មក មានថ្នាក់ដឹកនាំសហជីពចំនួន ៨ នាក់ ត្រូវបានចោទប្រកាន់ពីបទពីបទ “ញុះញង់ឲ្យប្រព្រឹត្តបទឧក្រិដ្ឋជាអាទិ៍” តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា ខណៈសមាជិកជិត ២០ នាក់ត្រូវបានដោះលែងវិញ៕
