សហរដ្ឋអាមេរិកបានប្រកាសថា ខ្លួនមានមោទកភាពក្នុងការបញ្ជូនវត្ថុបុរាណចំនួន៣៥ដែលមានប្រភពដើមពីប្រទេសកម្ពុជានិងតំបន់អាស៊ីអាគ្នេយ៍ ត្រលប់មកកម្ពុជាវិញ។
សេចក្ដីប្រកាសនៅលើទំព័រហ្វេសប៊ុករបស់ស្ថានទូតអាមេរិកប្រចាំកម្ពុជា នៅថ្ងៃទី១៣ ខែមករា បានឱ្យដឹងថា វត្ថុបុរាណខ្មែរដែលមានតម្លៃមិនអាចកាត់ថ្លៃបានទាំងនេះ រួមមាន រូបចម្លាក់រចនាបថសម័យអង្គរធ្វើពីសំរឹទ្ធ គឺរូបពុទ្ធបដិមាទ្រង់ភ្នែន និងរូបចម្លាក់រចនាបថប្រាសាទកោះកេរ ធ្វើពីថ្មភក់ នៅសតវត្សរ៍ទី១០ ជារូបចម្លាក់ព្រះគណេស។
វត្ថុបុរាណទាំងនេះនឹងត្រូវបញ្ជូនមកកាន់កម្ពុជាវិញ ដោយសារមានកិច្ចខិតខំពីរដ្ឋអាជ្ញាសហរដ្ឋអាមេរិកប្រចាំតំបន់ភាគខាងត្បូងនៃទីក្រុងញូវយ៉ក និងការិយាល័យស៊ើបអង្កេតនៃក្រសួងសន្តិសុខមាតុភូមិសហរដ្ឋអាមេរិក។
ប្រភពដដែលអះអាងថា សហរដ្ឋអាមេរិកមានការប្ដេជ្ញាចិត្តក្នុងការបញ្ចប់នូវការជួញដូរវត្ថុបុរាណខុសច្បាប់ និងស្វែងរកវត្ថុមានតម្លៃទាំងនេះ ហើយបញ្ជូនទៅកាន់មាតុភូមិកំណើតវិញ។
ក្រោមកិច្ចសហការរវាងកម្ពុជានិងសហរដ្ឋអាមេរិក ប្រទេសមហាអំណាចមួយនេះតែងតែធ្វើការបញ្ជូនវត្ថុបុរាណមកកម្ពុជាវិញជារឿយៗ។
កាលពីថ្ងៃទី៩ ខែមិថុនា ២០២១ ឯកអគ្គរាជទូតកម្ពុជាប្រចាំសហរដ្ឋអាមេរិក លោក ជុំ សុន្ទរី និងលោក Cyrus vance Jr. រដ្ឋអាជ្ញានៃការិយាល័យរដ្ឋអាជ្ញាប្រចាំសង្កាត់ញូវយ៉ក បានចុះហត្ថលេខាលើកិច្ចព្រមព្រៀងរវាងកម្ពុជា និងរដ្ឋអាជ្ញានៃសង្កាត់ញូវយ៉ក ស្ដីពី ការផ្ទេរសិទ្ធិគ្រប់គ្រងវត្ថុបុរាណរបស់កម្ពុជាដែលត្រូវបានជួញដូរចំនួន២៧រូបពីការិយាល័យរដ្ឋអាជ្ញាមកកម្ពុជា។ ពិធីនេះប្រព្រឹត្តទៅនៅការិយាល័យរដ្ឋអាជ្ញាប្រចាំសង្កាត់ញូវយ៉ក សហរដ្ឋអាមេរិក៕
