មន្ត្រីអប់រំប្រាប់ឱ្យអាណាព្យាបាលពង្រឹងសុវត្ថិភាពចំណីអាហារ ក្រោយរកឃើញវិជ្ជមានកូវីដ-១៩ លើសិស្សានុសិស្សនិងគ្រូបង្រៀននៅសាលារៀនឯកជនមួយនៅក្នុងទីក្រុងភ្នំពេញ។
នាយកវិទ្យាល័យជាស៊ីមបឹងកេងកង លោក នុត ងួនលី ថ្លែងថា លោកនៅតែបារម្ភជានិច្ចពីហានិភ័យនៃការចម្លងជំងឺកូវីដ-១៩ក្នុងសាលារៀន ខណៈបច្ចុប្បន្នមានករណីឆ្លងជំងឺកូវីដ-១៩បំប្លែងថ្មីអូមីក្រុងក្នុងសហគមន៍ទៀតនោះ។ លោកថា គណៈគ្រប់គ្រងសាលាបានព្យាយាមណែនាំ ការពារសិស្ស ដោយរៀបចំឱ្យមានក្រុមយុវជនជួយឃ្លាំមើល និងបំបែកពេលសិស្សជួបជុំគ្នាច្រើនក្នុងសាលា។
លោក នុត ងួនលី ថា អ្វីដែលជាក្តីបារម្ភរបស់លោកមួយទៀត គឺទាក់ទងការហូបចុករបស់សិស្សនៅអាហារដ្ឋាន។ យ៉ាងណាលោកថា បានប្រាប់ឱ្យអ្នកលក់ដូរក្នុងសាលាពង្រីកទីធ្លាលក់ និងដាក់គម្លាតកន្លែងអង្គុយឱ្យឆ្ងាយៗពីគ្នា ហើយមិនអនុញ្ញាតឱ្យផឹកទឹកក្នុងធុង និងកែវរួមគ្នាជាដើម។
បែបនេះក្តី លោកនៅតែអះអាងចង់ឱ្យអាណាព្យាបាលចូលរួមពង្រឹងសុវត្ថិភាពចំណីអាហារដល់កូនៗជាជាងបណ្តោយឱ្យកូនទិញអាហារបរិភោគនៅខាងក្រៅដោយខ្លួនឯង។
នាយកវិទ្យាល័យជាស៊ីមបឹងកេងកងរូបនេះមានប្រសាសន៍ថា៖ «ជាមួយលោកអាណាព្យាបាល យើងបានជម្រាបគាត់ទៅតាមតេលេក្រាម ឱ្យគាត់រៀបចំអាហារហូបចុក អាហារសម្រន់ និងទឹក ដាក់ឱ្យកូនៗយកមកតាម ជាសវាងកូនៗទៅរួមគ្នាហូបនៅកន្លែងអាហារដ្ឋានច្រើន ធ្វើឱ្យយើងមានហានិភ័យខ្ពស់នៅក្នុងការឆ្លង»។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ថ្លែងថា ក្រសួងអប់រំ កំពុងបន្តចូលរួមជាមួយរដ្ឋាភិបាលដើម្បីបង្ការ គ្រប់គ្រង ទប់ស្កាត់ការរីករាលដាលនៃជំងឺកូវីដ-១៩ ដោយបន្តអនុវត្តវិធានការសុខាភិបាលយ៉ាងខ្ជាប់ខ្ជួន។
លោកបន្តថា បវេសនកាលឆ្នាំសិក្សា២០២១-២០២២ ក្រសួងអប់រំ យុវជន និងកីឡា បាននិងបន្តពង្រឹងការរៀននិងបង្រៀនតាមគន្លងប្រក្រតីភាពថ្មីនៃវិស័យអប់រំ ដោយបើកដំណើរការគ្រប់គ្រឹះស្ថានសិក្សាចំណេះទូទៅនិងគ្រឹះស្ថានមត្តេយ្យសិក្សា ឱ្យប្រព្រឹត្តទៅជាប្រក្រតីដោយបន្តអនុវត្តគោលការណ៍ប្រតិបត្តិស្តង់ដាចុះថ្ងៃទី០៤ សីហា ២០២០ របស់ក្រសួងអប់រំ យុវជន និងកីឡា។
លោក រស់ សុវាចា ថា៖ «ក្រសួងអប់រំ យុវជន និងកីឡា តម្រូវឱ្យគ្រប់គ្រឹះស្ថានសិក្សា បន្តពង្រឹងការអនុវត្តសុវត្ថិភាពសុខភាពសិក្សា រក្សាគម្លាតសុវត្ថិភាព និងសុវត្ថិភាពចំណីអាហារដល់បុគ្គលិកអប់រំ និងសិស្សានុសិស្ស។ ក្នុងបរិបទកូវីដ-១៩ គោលបំណងធំ២ សម្រាប់ការសិក្សាគឺ ឱ្យមានការរៀនសូត្រជាបន្តប្រកបដោយគុណភាព និងចូលរួមជាមួយរាជរដ្ឋាភិបាលក្នុងការគ្រប់គ្រង ទប់ស្កាត់ និងបង្ការការរីករាលដាលនៃជំងឺកូវីដ-១៩»។
សិស្សវិទ្យាល័យព្រះស៊ីសុវត្ថិ កញ្ញា លី ធីតា ប្រាប់ថា កញ្ញាត្រូវទៅសាលាទាំងក្តីបារម្ភពីហានិភ័យនៃការឆ្លងវីរុសបំប្លែងថ្មី «អូមីក្រុង»។ យ៉ាងណា កញ្ញាថាពុំមានជម្រើសទេ តែត្រូវទៅរៀនដោយការប្រុងប្រយ័ត្នបំផុត។
យុវសិស្សរូបនេះថា៖ «ខ្ញុំគិតថា សាលាគួរតែបំបែកក្រុមជា ២ ដូចពេលមុននោះបង។ មួយក្រុមរៀននៅផ្ទះ មួយក្រុមទៀតរៀនអនឡាញ អញ្ចឹងទៅគាត់អាចកាត់បន្ថយអ្នកមកសាលារៀនបានច្រើនណាបង។ មួយអាទិត្យឆ្លាស់គ្នាម្តង ព្រោះពេលមុនខ្ញុំក៏រៀនអញ្ចឹងដែរបង បើគេអត់ចង់បិទសាលា មានតែធ្វើអញ្ចឹង ដើម្បីកុំឱ្យសិស្សទៅជុំគ្នាច្រើនពេកបង។ បើបិទសាលាទៀត មានតែរៀនអនឡាញទាំងអស់គ្នាដដែលណាបង»។
អាណាព្យាបាលសិស្សមួយអង្គនៃសាលាបឋមសិក្សាចតុមុខ ព្រះតេជគុណ ភោគ គឹង មានសង្ឃដីការថា ព្រះអង្គគោរពគោលការណ៍ដែលមន្ត្រីអប់រំចង់ឱ្យអាណាព្យាបាលពង្រឹងសុវត្ថិភាពអាហារសម្រាប់កូនៗ។ យ៉ាងណាព្រះតេជគុណថា អាណាព្យាបាលអាចនឹងមានផលលំបាកខ្លះដែរ ពោលគឺត្រូវដាំបាយធ្វើម្ហូបឱ្យទាន់ពេលវេលាដើម្បីដាក់បាយកញ្ចក់ឱ្យកូនយកទៅសាលារៀន។
ព្រះតេជគុណមានសង្ឃដីការថា៖ «ប្រសិនជាគ្រប់គ្រងមួយថ្នាក់ៗ គឺកុំឱ្យសិស្សនឹងឆ្លងទៅរកគ្នា។ ដូចថ្នាក់ទី៥ «ក» អញ្ចឹង គឺនៅតែក្នុងថ្នាក់ «ក», ថ្នាក់ «ខ» នៅតែ «ខ», «គ» នៅតែ «គ», «ឃ» នៅតែ «ឃ» អញ្ចឹងទៅ។ ហើយគ្រូត្រូវទទួលខុសត្រូវទៅលើសិស្សនៅក្នុងថ្នាក់នីមួយៗ បើធ្វើអញ្ចឹង អាត្មាមានភាពកក់ក្តៅៗជាជាងសិស្សជួបជុំគ្នា»។
កាលពីថ្ងៃទី១១ ខែមករា មានការរកឃើញគ្រូបង្រៀនម្នាក់ និងសិស្សសាលា៨នាក់ នៅក្នុងសាលារៀនឯកជនមួយនៅក្នុងខណ្ឌសែនសុខ រាជធានីភ្នំពេញ បានឆ្លងជំងឺកូវីដ-១៩បំប្លែងថ្មី អូមីក្រុង។ បន្ទាប់ពីរកឃើញឆ្លងនេះ សាលាក៏បានសម្រេចឱ្យគ្រូនិងសិស្សសម្រាកព្យាបាល និង រៀន-បង្រៀន តាមអនឡាញរហូតដល់ជាសះស្បើយ។ ហើយថ្នាក់ដែលសិស្សមានវិជ្ជមានទាំងអស់ត្រូវប្តូរមករៀនតាមប្រព័ន្ធអេឡិចត្រូនិកវិញក្នុងរយៈពេល២សប្តាហ៍។
គិតត្រឹមថ្ងៃទី១៥ ខែមករា ឆ្នាំ២០២២ នេះ កម្ពុជារកឃើញអ្នកឆ្លងជំងឺកូវីដ-១៩ សរុប ១២០ ៧៧៣ នាក់ ក្នុងនោះ ករណីនាំចូល ២០ ១៣៩ នាក់ ខណៈស្លាប់ចំនួន ៣ ០១៥ នាក់ និងអ្នកជំងឺជាសះស្បើយសរុប ១១៧ ០៨៩នាក់៕