រដ្ឋាភិបាលកម្ពុជា បានសម្រេចដាក់បញ្ចូលថ្ងៃទី២៩ ខែធ្នូ «ទិវានយោបាយឈ្នះឈ្នះ» ទៅក្នុងប្រតិទិនប្រចាំឆ្នាំរបស់កម្ពុជា ខណៈអ្នកឃ្លាំមើលស្ថានការណ៍នយោបាយនៅកម្ពុជាយល់ថា កម្ពុជាបានបញ្ចប់សង្គ្រាមប្រដាប់អាវុធក៏ពិតមែន ក៏ប៉ុន្តែជម្លោះនយោបាយនៅតែបន្តកើតមាននៅឡើយ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ បានថ្លែងនៅថ្ងៃអង្គារនេះថា បើនិយាយពីសង្គ្រាមប្រដាប់អាវុធ គឺកម្ពុជាមិនមានទៀតទេ ក៏ប៉ុន្តែសង្គ្រាមផ្លូវចិត្ត និងសង្គ្រាមនយោបាយនៅតែបន្តកើតមាន។
បើតាមអ្នកឃ្លាំមើលរូបនេះយល់ថា រដ្ឋាភិបាលគួរតែធ្វើយ៉ាងណាធានាឱ្យមានការបើកលំហរប្រជាធិបតេយ្យ ការគោរពសិទ្ធិមនុស្ស ហើយគ្រប់ភាគីពាក់ព័ន្ធ ជាពិសេសគ្រប់គណបក្សនយោបាយ ឬអ្នកដែលមាននិន្នាការនយោបាយផ្សេងៗគ្នា អាចធ្វើនយោបាយ ឬធ្វើសកម្មភាពនយោបាយដោយសេរី ដោយគ្មានការចាប់ចង គ្មានការបំភិតបំភ័យ ឬមានការញុះញង់ ការចោទប្រកាន់ណាមួយ ដែលខុសពីច្បាប់រដ្ឋធម្មនុញ្ញ ឬច្បាប់ជាតិជាដើម។
លោក សេក សុជាតិ ថ្លែងថា៖ «ការពិតទៅ [ថ្ងៃ២៩ ធ្នូ] វាគ្រាន់តែជារូបភាពនៃការបញ្ចប់សង្គ្រាមស៊ីវិលដែលគ្មានភាគីប្រឆាំងដែលមានកាំភ្លើង ឬអាវុធ ពីគ្រប់ភាគីដែលអាចច្បាំងគ្នា ឬធ្វើឱ្យមនុស្សស្លាប់ជារៀងរាល់ថ្ងៃ អាហ្នឹងគឺជាអ្វីដែលយើងមើលឃើញ ក៏ប៉ុន្តែចំពោះសង្គ្រាមផ្លូវចិត្ត ឬក៏សង្គ្រាមផ្នែកនយោបាយ គឺវានៅតែបន្តមានរហូត ហើយវាមិនទាន់បានបញ្ចប់នៅឡើយទេ ហើយយើងសង្កេតឃើញថា បញ្ហានេះ វាមិនមែនបង្ហាញពីសមិទ្ធផលរួមថាវាមានគ្រប់យ៉ាងនោះទេ ពាក់ព័ន្ធនឹងរឿងដែលយើងមើលឃើញនោះទេ»។
ទោះយ៉ាងណាក្តី អ្នកតាមដានស្ថានការណ៍នយោបាយនៅកម្ពុជារូបនេះ នៅតែយល់ថា ថ្ងៃ២៣ ខែតុលា ឆ្នាំ១៩៩១ នៅតែសំខាន់ ត្បិតជាថ្ងៃស្ថាបនិកសន្តិភាពនៅកម្ពុជា។
លោកថា៖ «ក៏ប៉ុន្តែអ្វីដែលសំខាន់គឺយើងនៅតែឃើញថា ថ្ងៃ២៣ តុលា ឆ្នាំ១៩៩១ គឺជាថ្ងៃកំណើតនៃសន្តិភាព ឬការបង្រួបបង្រួមជាតិរបស់ខ្មែរដដែល ទោះបីជាគេមិនរំលឹកក៏ដោយ ក៏ប៉ុន្តែវានៅតែជាបិតា ឬក៏ស្ថាបនិកនៃសន្តិភាពនិងការបង្រួបបង្រួមជាតិ ហើយថ្ងៃ២៩ ខែធ្នូ ដែលប្រមុខរដ្ឋាភិបាលសម្រេចដាក់ហ្នឹង វាគ្រាន់តែផលដែលទទួលបានតាមរយៈ២៣ តុលា ឆ្នាំ១៩៩១ឯណោះទេ»។
យោងតាមសារាចរណែនាំរបស់រដ្ឋាភិបាលកម្ពុជា ចុះថ្ងៃទី១៤ ខែមករា ប៉ុន្តែទើបផ្សព្វផ្សាយឱ្យដឹងនៅថ្ងៃទី១៨ ខែមករានេះថា រដ្ឋាភិបាលបានណែនាំឱ្យគ្រប់ក្រសួង ស្ថាប័ន រាជធានី-ខេត្ត និងគ្រឹះស្ថានសាធារណៈឯកជនទាំងអស់ ត្រូវកំណត់យកទិវា «នយោបាយឈ្នះ ឈ្នះ» ថ្ងៃទី២៩ ខែធ្នូ ទៅក្នុងប្រតិទិនប្រចាំឆ្នាំ ដោយមិនឈប់សម្រាក ចាប់ពីឆ្នាំ២០២២នេះតទៅ។
សារាចរណែនាំក៏បានបង្គាប់ឱ្យគ្រប់ក្រសួង ស្ថាប័ន រាជធានី-ខេត្តទាំងនោះ ត្រូវរៀបចំចងបដា ពាក្យស្លោក ដើម្បីអបអរសាទរទិវានយោបាយឈ្នះឈ្នះនេះ ដែលមានខ្លឹមសារថា «អរគុណសន្តិភាព! អរគុណនយោបាយឈ្នះឈ្នះ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ!» ជាដើម។
បើតាមសារាចររដ្ឋាភិបាលដដែល ការកំណត់យកទិវា «នយោបាយឈ្នះឈ្នះ» ទៅក្នុងប្រតិទិនប្រចាំឆ្នាំនេះ គឺជាការដឹងគុណ កតញ្ញូ និងការចងចាំចំពោះគុណបំណាច់របស់រដ្ឋាភិបាលដែលបានបញ្ចប់សង្គ្រាមនៅកម្ពុជាទាំងស្រុង តាមរយៈនយោបាយឈ្នះឈ្នះ នៅថ្ងៃទី២៩ ខែធ្នូ ឆ្នាំ១៩៩៨។
ប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានចាត់ទុកទិវានយោបាយឈ្នះឈ្នះនេះថា ជាមោទនភាពដែលកម្ពុជាខ្លួនឯង មានសមត្ថភាពក្នុងការបញ្ចប់សង្គ្រាមស៊ីវិល។ លោកបន្តថា កិច្ចព្រមព្រៀងសន្តិភាពទីក្រុងប៉ារីស បានបរាជ័យដោយសារភាគីខ្មែរក្រហមមិនយល់ព្រមចូលរួមបោះឆ្នោត ដែលធ្វើឱ្យទឹកដីខ្មែរមួយផ្នែក ត្រូវបានគ្រប់គ្រងដោយពួកខ្មែរក្រហម។
លោកថា៖ «ហ្នឹងស្រេចតែគេយល់ឃើញ ប៉ុន្តែបងប្អូនខ្មែរដែលនៅចំហៀងខាងណោះ [ខ្មែរក្រហម] ដែលនៅជាមួយខ្មែរក្រហមហ្នឹង គឺគាត់ឱ្យតម្លៃទិវាឈ្នះឈ្នះណាស់ ហើយអ្នកដែលរស់នៅជាប់ហ្នឹងតំបន់ខ្មែរក្រហមហើយប្រជាពលរដ្ឋខ្មែរឱ្យតម្លៃហ្នឹង រីឯអ្នកដែលមាននិន្នាការនយោបាយ មិនដែលឱ្យតម្លៃអ្វីដល់វឌ្ឍនភាព ឬមោទនភាពរបស់ខ្មែរទេ គឺឱ្យតម្លៃទៅលើបរទេស»។
ការសម្រេចដាក់បញ្ចូលថ្ងៃទី២៩ ខែធ្នូ «ទិវានយោបាយឈ្នះឈ្នះ» ទៅក្នុងប្រតិទិនប្រចាំឆ្នាំរបស់កម្ពុជានេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានស្នើកាលពីថ្ងៃទី២៩ ខែធ្នូ ឆ្នាំ២០២១ ឱ្យដាក់បញ្ចូលទិវានយោបាយឈ្នះឈ្នះនេះ នៅក្នុងប្រតិទិនចាប់ពីឆ្នាំ២០២២ ដោយមិនឈប់សម្រាក។ បើតាមលោកនាយករដ្ឋមន្ត្រី ហ៊ុន សែន ការដាក់បញ្ចូលទិវានយោបាយឈ្នះឈ្នះទៅក្នុងប្រតិទិន គឺសម្រាប់អបអរជ័យជម្នះដែលកម្ពុជាបានបិទបញ្ចប់សង្គ្រាមទាំងស្រុង ហើយបន្តការអភិវឌ្ឍដល់ពេលបច្ចុប្បន្ន៕
