មន្ត្រីសង្គមស៊ីវិលផ្នែកបរិស្ថាន និងសិទ្ធិមនុស្ស បារម្ភពីផលប៉ះពាល់នៃគម្រោងអភិវឌ្ឍន៍តំបន់ឆ្នេររបស់អាជ្ញាធរនៅខេត្តកែប ដោយថា គម្រោងអភិវឌ្ឍន៍នេះហាក់មិនបានផ្សព្វផ្សាយទូលំទូលាយឱ្យប្រជាពលរដ្ឋបានដឹងជាមុនឡើយ។
ការលើកឡើងនេះ ក្រោយពេលរដ្ឋបាលខេត្តកែបឱ្យដឹងពីសកម្មភាពកាយភ្នំមួយកន្លែង យកដីយកថ្មចាក់ចូលឆ្នេរសមុទ្រ ដើម្បីអភិវឌ្ឍពង្រីកឆ្នេរប្រវែង២ ៧០០ម៉ែត្រ ស្ថិតក្នុងភូមិថ្មី សង្កាត់ព្រៃធំ ក្រុងកែប។
មន្ត្រីឃ្លាំមើលការរំលោភសិទ្ធិមនុស្សអង្គការលីកាដូប្រចាំខេត្តកំពត និងកែប លោក ប៉ែន វុទ្ធា មានប្រសាសន៍ថា គម្រោងអភិវឌ្ឍន៍ឆ្នេរសមុទ្រនៅខេត្តកែបនេះ ខាងអាជ្ញាធរហាក់មិនបានផ្សព្វផ្សាយឱ្យទូលំទូលាយដល់ប្រជាពលរដ្ឋនៅមូលដ្ឋានឱ្យបានដឹងច្បាស់ពីផលប៉ះពាល់បរិស្ថាន និងសង្គមទេ។ បញ្ហានេះ លោកបារម្ភពីការបាត់បង់ផលប្រយោជន៍របស់ប្រជាពលរដ្ឋនិងសាធារណៈទៅវិញ។
លោក ប៉ែន វុទ្ធា បន្តថា រូបលោកក៏ដូចជាប្រជាពលរដ្ឋនៅមូលដ្ឋាន មិនជំទាស់នឹងការអភិវឌ្ឍរបស់អាជ្ញាធរនោះទេ ប៉ុន្តែពួកគេក៏ចង់ដឹងពីព័ត៌មានច្បាស់លាស់ និងការចូលមតិយោបល់ជុំវិញគម្រោងអភិវឌ្ឍន៍នេះដែរ ដើម្បីឱ្យប្រាកដថា ការអភិវឌ្ឍនោះមិនប៉ះពាល់ផលប្រយោជន៍របស់ពួកគេ និងសាធារណៈ។
លោកបន្ថែមថា៖ «អាជ្ញាធរគួរតែធ្វើការផ្សព្វផ្សាយឱ្យបានទូលំទូលាយមុននឹងធ្វើការអភិវឌ្ឍ ជាពិសេសប្រជាពលរដ្ឋនៅមូលដ្ឋានដែលនៅខាងលើគម្រោងអភិវឌ្ឍន៍ហ្នឹង ពីព្រោះយើងដឹងហើយថា ប្រជាពលរដ្ឋដែលរស់នៅជាប់មាត់សមុទ្រ គឺគាត់រស់នៅពឹងផ្អែកលើរបរនេសាទ អ៊ីចឹងហើយនៅពេលដែលអភិវឌ្ឍមិនបានផ្សព្វផ្សាយឱ្យបានទូលំទូលាយដល់ពួកគាត់ទេ ដូចជា ការចាក់ដីដើម្បីពង្រីកឆ្នេរជាដើមហ្នឹង វាធ្វើឱ្យប៉ះពាល់ទៅដល់ធនធានសមុទ្រ ដែលធ្វើឱ្យពួកគេពិបាកក្នុងការនេសាទជាដើមហ្នឹង»។
ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា (CYN) លោក ហេង គីមហុង មានប្រសាសន៍ថា ប្រសិនបើគម្រោងអភិវឌ្ឍន៍ឆ្នេរនេះមិនត្រូវបានសិក្សាឱ្យបានច្បាស់លាស់ទេ លោកបារម្ភពីផលប៉ះពាល់បរិស្ថាន ជីវចម្រុះបាតសមុទ្រ ធនធានមច្ឆជាតិ និងការអភិវឌ្ឍមិនមានតម្លាភាព ជាដើម។
លោកបន្តថា ការអភិវឌ្ឍមួយប្រកបដោយតម្លាភាព គឺរដ្ឋនិងក្រុមហ៊ុនឯកជនដែលទទួលបានសិទ្ធិអភិវឌ្ឍន៍នោះ ត្រូវសិក្សាផលប៉ះពាល់បរិស្ថាននិងសង្គមជាមុន ហើយការវាយតម្លៃផលប៉ះពាល់នេះត្រូវមានការចូលរួមពីគ្រប់ភាគីពាក់ព័ន្ធ ជាពិសេសប្រជាពលរដ្ឋនៅមូលដ្ឋានតែម្តង។
លោកបន្ថែមថា៖ «ដើម្បីធានាថា ការអភិវឌ្ឍមួយប្រាកដជាចំណេញទៅដល់គ្រប់ភាគី ទាំងក្រុមហ៊ុន ទាំងរដ្ឋ ទាំងប្រជាពលរដ្ឋ ទាំងសហគមន៍មូលដ្ឋានទៅបាន លុះត្រាណាមានការចូលរួមជជែកពិភាក្សាគ្នាជាមុន ហើយមួយទៀតនោះក៏ត្រូវបានការផ្ដល់ទីតាំង ឬកន្លែងគ្រប់គ្រាន់សម្រាប់អ្នកដែលគាត់ធ្លាប់អាស្រ័យផលនៅទីនោះ។ មិនមែនការអភិវឌ្ឍទាល់តែមានការភ្ញាក់ផ្អើលហើយទើបមានការពន្យល់ ឬមានការបកស្រាយជាក្រោយនោះទេ ការធ្វើបែបនេះ វាមិនមែនជាការអភិវឌ្ឍប្រកបដោយតម្លាភាពនោះទេ»។
ទោះបីជាយ៉ាងនេះក្ដី អភិបាលខេត្តកែប លោក សោម ពិសិដ្ឋ មានប្រសាសន៍ថា គម្រោងអភិវឌ្ឍន៍ឆ្នេរសមុទ្រកែបនេះ ខាងអាជ្ញាធរបានផ្សព្វផ្សាយច្រើនទៅដល់ប្រជាពលរដ្ឋនៅក្នុងមូលដ្ឋាន។ លោកបានទទួលស្គាល់ថា គម្រោងនេះពិតជាបានប៉ះពាល់ដល់ក្បាលដីប្រជាពលរដ្ឋមួយចំនួន ប៉ុន្តែពលរដ្ឋទាំងនោះបានគាំទ្រគម្រោងនេះ ក្រោយពីមានការសម្របសម្រួលដោះស្រាយពីអាជ្ញាធរ។
អភិបាលខេត្តរូបនេះអះអាងថា ការអភិវឌ្ឍតំបន់ឆ្នេរនេះជាគម្រោងរបស់រដ្ឋាភិបាលដែលអនុវត្តដោយគណៈកម្មាធិការជាតិគ្រប់គ្រង និងអភិវឌ្ឍន៍តំបន់សមុទ្រកម្ពុជា ដោយបានសិក្សាពីផលប៉ះពាល់បរិស្ថាននិងសង្គមច្បាស់លាស់។
លោក សោម ពិសិដ្ឋ បន្ថែមថា ការអភិវឌ្ឍតំបន់ឆ្នេរនេះ វានឹងផ្ដល់ប្រយោជន៍បន្ថែមទៀតសម្រាប់វិស័យទេសចរណ៍នៅខេត្តកែប ផ្ដល់ចំណូលបន្ថែមសម្រាប់ថ្នាក់ខេត្តនិងថ្នាក់ជាតិផងដែរ តាមរយៈទទួលបានកម្រៃពីវិស័យទេសចរណ៍។
លោកបន្ថែមថា៖ «ធម្មតាគម្រោងនិងសមិទ្ធផលមួយៗ គឺយើងគិតអំពីតម្លៃ គោលដៅ គោលបំណង ចក្ខុវិស័យដែលវិជ្ជមានដែលមានប្រយោជន៍ចំពោះប្រទេសជាតិ។ អ៊ីចឹងប្រវែង២ ៧០០ម៉ែត្រនេះ វាពិតជាមានសារៈសំខាន់ចំពោះភ្ញៀវជាតិនិងអន្តរជាតិដែលមកសម្រាកលំហែកម្សាន្តនៅខេត្តកែប។ មួយទៀត តែភ្ញៀវទេសចរជាតិអន្តរជាតិមកលេង គឺចំណូលបានមកប្រជាជននៅក្នុងសហគមន៍ អ៊ីចឹងផលប្រយោជន៍វាមិនមែនត្រឹមតែថ្នាក់ខេត្តទេ វាបានផ្ដល់ដល់កម្រិតប្រទេសកម្ពុជាយើងទាំងមូល ដែលទទួលបានសមិទ្ធផលថ្មីបន្ថែមទៀតទៅលើឆ្នេរដែលសួនច្បារ និងមានការចាក់ខ្សាច់ស្តង់ដារ»។
បើតាមលោក សោម ពិសិដ្ឋ ខេត្តកែបមានប្រវែងឆ្នេរសរុបជាង២៦គីឡូម៉ែត្រ ក្នុងនោះ ឆ្នេរដែលអាចលេងកម្សាន្តឬងូតទឹកបាន មានប្រវែងជាង៣០០ម៉ែត្រប៉ុណ្ណោះ។ បញ្ហានេះហើយ លោកថា ទើបរដ្ឋបាលខេត្តខិតខំអភិវឌ្ឍកែច្នៃឆ្នេរបន្ថែមទៀតនោះ។
កាលពីថ្ងៃទី១៨ ខែសីហា ឆ្នាំ២០២១ គណៈកម្មាធិការជាតិគ្រប់គ្រង និងអភិវឌ្ឍន៍តំបន់សមុទ្រកម្ពុជា បានចេញសេចក្ដីសម្រេចមួយឱ្យរដ្ឋបាលខេត្តកែបចាក់ដីពង្រីកឆ្នេរប្រវែង២ ៧០០ម៉ែត្រ ក្នុងនោះមានឆ្នេរខ្សាច់កម្សាន្តសាធារណៈកម្រិតខ្ពស់ប្រវែង៣០ម៉ែត្រ និងសួនច្បារតាមចំណីឆ្នេរសមុទ្រមានទទឹង៥០ម៉ែត្រ ស្ថិតនៅភូមិថ្មី សង្កាត់ព្រៃធំ ក្រុងកែប៕
