ក្រុមប្រឹក្សាឃ្លាំមើលកម្ពុជា (CWC) បានអំពាវនាវឱ្យតុលាការនិងរដ្ឋាភិបាលកម្ពុជាដោះលែងអ្នកទោសនយោបាយនិងសកម្មជនសង្គម ខណៈខ្លួនមានការព្រួយបារម្ភពីការឆ្លងជំងឺកូវីដ-១៩ ប្រភេទថ្មី «អូមីក្រុង» ចូលទៅក្នុងពន្ធនាគារ។
តាមរយៈសេចក្ដីថ្លែងការណ៍ចុះថ្ងៃទី១៩ ខែមករា ក្រុមប្រឹក្សាឃ្លាំមើលកម្ពុជា បានលើកឡើងថា ពួកគេព្រួយបារម្ភពីការឆ្លងរីករាលដាលជំងឺកូវីដ-១៩ ចូលទៅក្នុងពន្ធនាគារព្រៃស និងពន្ធនាគារនានានៅទូទាំងប្រទេស ដោយមិនបានប្រតិបត្តិត្រឹមត្រូវតាមវិធានសុខាភិបាល។ សេចក្ដីថ្លែងការណ៍ដដែលបានលើកឡើងមូលហេតុថា ដោយសារតែនៅក្នុងបន្ទប់ពន្ធនាគារនីមួយៗមានផ្ទុកមនុស្សច្រើនជាង២០នាក់ ដែលជាកត្តាងាយរងគ្រោះបំផុត ប្រសិនបើមេរោគអូមីក្រុងឆ្លងចូលទៅក្នុងពន្ធនាគារជាយថាហេតុណាមួយ។
ក្រុមប្រឹក្សាឃ្លាំមើលកម្ពុជា បានអំពាវនាវដល់ក្រសួងសុខាភិបាល និងមន្ត្រីពន្ធនាគារ យកចិត្តទុកដាក់ផ្ដល់សេវាសុខភាពតាមវិធានសុខាភិបាលជូនដល់អ្នកដែលកំពុងជាប់ឃុំនៅក្នុងពន្ធនាគារឱ្យមានប្រសិទ្ធភាពខ្ពស់ ដើម្បីបង្ការការឆ្លងរីករាលដាលនៃជំងឺកូវីដ-១៩ ប្រភេទអូមីក្រុង។ បន្ថែមលើនេះ ក្រុមប្រឹក្សាឃ្លាំមើលកម្ពុជា ក៏បានអំពាវនាវដល់តុលាការនិងរដ្ឋាភិបាលកម្ពុជាឱ្យទម្លាក់ចោលការចោទប្រកាន់នានា ហើយត្រូវផ្ដល់យុត្តិធម៌ និងដោះលែងក្រុមសកម្មជនសង្គម សកម្មជននយោបាយ និងអ្នកទោសមនសិការឱ្យមានសេរីភាពឡើងវិញ ស្របតាមខ្លឹមសាររដ្ឋធម្មនុញ្ញ គោលការណ៍ច្បាប់ និងសេចក្ដីប្រកាសជាសកលស្ដីពីសិទ្ធិមនុស្ស សិទ្ធិពលរដ្ឋ និងសិទ្ធិនយោបាយ។
ជាងនេះទៀត ក្រុមប្រឹក្សាឃ្លាំមើលកម្ពុជាបានកត់សម្គាល់ថា សកម្មជនសង្គម នយោបាយ និងអ្នកទោសមនសិការភាគច្រើនត្រូវបានឃុំខ្លួនលើសនីតិវិធីកំណត់ (លើស១៨ខែ) ដោយគ្មានការជំនុំជម្រះត្រឹមត្រូវ និងមិនបានទទួលយុត្តិធម៌។
តាមរបាយការណ៍របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) កម្ពុជា នៅមានអ្នកទោសនយោបាយ សង្គម និងដីធ្លី ប្រមាណជា៦០នាក់ទៀតដែលកំពុងជាប់ឃុំនៅក្នុងពន្ធនាគារ៕
