កម្ពុជាថ្កោលទោសជាលើកដំបូងពីការប៉ះទង្គិចគ្នាដោយប្រដាប់អាវុធនៅរដ្ឋកាយ៉ាហ៍ (Kayah State) ក្នុងប្រទេសមីយ៉ាន់ម៉ា (ភូមា) បន្ទាប់ពីដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ខណៈអ្នកវិភាគយល់ថា ករណីនេះជាការបរាជ័យក្នុងការសម្របសម្រួលឱ្យមាន «បទឈប់បាញ់»។
តាមរយៈសេចក្ដីថ្លែងការណ៍ចុះថ្ងៃទី២០ ខែមករា ឆ្នាំ២០២២នេះ អ្នកនាំពាក្យក្រសួងការបរទេសកម្ពុជា បានសម្ដែងការព្រួយបារម្ភជាខ្លាំង ចំពោះការប៉ះទង្គិចគ្នាដោយប្រដាប់អាវុធយ៉ាងធ្ងន់ធ្ងរនៅរដ្ឋកាយ៉ាហ៍ (Kayah State) រវាងយោធានិងកងកម្លាំងប្រដាប់អាវុធផ្សេងទៀត។
សេចក្ដីថ្លែងការណ៍ដដែលបានចាត់ទុកថា អំពើហិង្សាដែលនៅតែបន្តកើតមាននេះកំពុងធ្វើឱ្យប៉ះពាល់ដល់វឌ្ឍនភាពដែលសម្រេចបានក្នុងដំណើរទស្សនកិច្ចការងារនាពេលថ្មីៗនេះរបស់លោកនាយករដ្ឋមន្ត្រី ហ៊ុន សែន។
សេចក្ដីថ្លែងការណ៍របស់កម្ពុជាបានអំពាវនាវឱ្យគ្រប់ភាគីពាក់ព័ន្ធទាំងអស់ត្រូវតែទទួលយកបទឈប់បាញ់ បញ្ចប់នូវរាល់សកម្មភាពហិង្សា អនុវត្តការអត់ធ្មត់ឱ្យបានខ្ពស់បំផុត និងចាប់ផ្ដើមកិច្ចសន្ទនា ដើម្បីបង្កើតនូវស្ថានភាពអំណោយផល សំដៅឈានទៅរកការកសាងឡើងវិញ នូវសន្តិភាពនៅក្នុងប្រទេស ដែលអាចត្រួសត្រាយផ្លូវសម្រាប់ការអនុវត្តការព្រមព្រៀងជាឯកច្ឆន្ទ៥ចំណុចរបស់អាស៊ាន។
អ្នកស្រាវជ្រាវផ្នែកភូមិសាស្ត្រនយោបាយ លោក វណ្ណ ប៊ុនណា បានចាត់ទុកករណីនេះថា ជាការបរាជ័យក្នុងការសម្របសម្រួលឱ្យមានបទឈប់បាញ់នៅភូមា។ លោកបន្តថា ការថ្កោលទោសរបស់កម្ពុជាយ៉ាងដូច្នេះ ក៏បានបង្ហាញពីការមិនពេញចិត្តចំពោះពួកយោធា ដែលកន្លងទៅបានសន្យាជាមួយប្រមុខរដ្ឋាភិបាលកម្ពុជាថានឹងអនុវត្តបទឈប់បាញ់ ប៉ុន្តែការផ្ទុះអាវុធនៅតែកើតឡើង។
លោក វណ្ណ ប៊ុនណា លើកឡើងថា៖ «ក្នុងសេចក្ដីថ្លែងការណ៍របស់កម្ពុជានាពេលនេះ បង្ហាញថា អ្វីដែលកម្ពុជាសន្យាជាមួយពួកយោធាភូមាហ្នឹង វាបរាជ័យ ទោះបីមានការសន្យាមែន ប៉ុន្តែពួកយោធាមិនមានឆន្ទៈក្នុងការគោរពនោះទេ។ អ៊ីចឹងទេ កម្ពុជាហាក់ដូចជាអន់ចិត្តទៅលើចំណុចហ្នឹង ហើយកម្ពុជាមើលឃើញថា បើទោះបីជាខ្លួនខិតខំចូលរួមរកដំណោះស្រាយក៏ដោយ ក៏ប៉ុន្តែភាគីភូមាហ្នឹងហាក់ដូចជាសរសេរនឹងដៃលុបនឹងជើង។ អ៊ីចឹងហើយធ្វើឱ្យមុខមាត់កម្ពុជាហ្នឹងវាកាន់តែធ្លាក់ចុះ ជាពិសេសនៅក្នុងក្រសែភ្នែកសមាជិកអាស៊ានផងដែរ»។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ថ្លែងថា កម្ពុជាមិនបានដឹងទេថាតើក្រុមណាមួយជាអ្នកបង្កការផ្ទុះអាវុធនោះ។ យ៉ាងណា លោកបង្ហាញសុទិដ្ឋិនិយមថា ការដែលលោកនាយករដ្ឋមន្ត្រី ហ៊ុន សែន ធ្វើដំណើរទៅមីយ៉ាន់ម៉ា គឺដើម្បីបញ្ចប់ការប្រើហិង្សាដាក់គ្នា ការស្លាប់របស់ប្រជាជនមីយ៉ាន់ម៉ា និងមិនមែនដើម្បីកាន់ជើងភាគីណាមួយនោះទេ។
លោក ផៃ ស៊ីផាន អះអាងថា៖ «កម្ពុជាថ្កោលទោសនូវអំពើហិង្សានោះ ក៏ប៉ុន្តែកម្ពុជាមិនទាន់អស់សង្ឃឹមទេនៅក្នុងការចូលរួម ដើម្បីធ្វើយ៉ាងដូចម្ដេចការពារអាយុជីវិតរបស់ប្រជាជាតិភូមាដែលជាមិត្ត។ អាហ្នឹងជាផលសង្ឃឹមទុករបស់យើង»។
លោកនាយករដ្ឋមន្ត្រី ហ៊ុន សែន បានជម្នះរាល់ការរិះគន់នានា ដើម្បីធ្វើទស្សនកិច្ចទៅកាន់ប្រទេសមីយ៉ាន់ម៉ាកាលពីថ្ងៃទី៧ ខែមករា ឆ្នាំ២០២២ ដោយបានអះអាងថា ជាដំណើរទស្សនកិច្ចដ៏ជោគជ័យ តាមរយៈការសន្យារបស់របបសឹកយោធាភូមាថានឹងអនុវត្តបទឈប់បាញ់រហូតដល់ចុងឆ្នាំ២០២២។ ប៉ុន្តែផ្ទុយទៅវិញ អំពើហិង្សានិងការប៉ះទង្គិចគ្នាដោយប្រដាប់អាវុធរវាងកងកម្លាំងយោធានិងកងកម្លាំងប្រដាប់អាវុធផ្សេងទៀតនៅតែបន្តកើតមាន។
យោងតាមប្រភពនានាបានចុះផ្សាយថា ការប៉ះទង្គិចគ្នានៅរដ្ឋកាយ៉ាហ៍ (Kayah State) នៃប្រទេសភូមា បានកើតឡើងកាលពីថ្ងៃពុធសប្ដាហ៍នេះ រវាងកងយោធានិងកងកម្លាំងប្រដាប់អាវុធផ្សេងទៀត ដែលបណ្ដាលឱ្យជនស៊ីវិល៣នាក់ស្លាប់ ក្នុងនោះមានក្មេងម្នាក់ផងដែរ។
តាមសេចក្ដីរាយការណ៍ ក្នុងការវាយប្រហារនេះក៏បានបណ្ដាលឱ្យកងយោធារបបសឹកភូមា១៥នាក់ទៀតបានស្លាប់បាត់បង់ជីវិតដែរ៕