មន្ត្រីជាន់ខ្ពស់ក្រសួងយុត្តិធម៌ អះអាងថា ការរំលាយគណបក្សសង្គ្រោះជាតិ កាលពីឆ្នាំ២០១៧ ដោយសារសកម្មភាពរបស់ថ្នាក់ដឹកនាំ និងសកម្មជនគណបក្ស ប៉ុន្តែការរំលាយនេះ មិនជាប់ពាក់ព័ន្ធនឹងសំណុំរឿងលោក កឹម សុខា ឡើយ។
អ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់ វីអូឌី នៅថ្ងៃសុក្រនេះថា ការរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ កន្លងមក មិនជាប់ពាក់ព័ន្ធនឹងសំណុំរឿងលោក កឹម សុខា ដែលតុលាការកំពុងដំណើរការបើកសវនាការនាពេលបច្ចុប្បន្ននេះឡើយ។
លោកបញ្ជាក់ថា ទោះបីតុលាការរកឃើញ លោក កឹម សុខា មានទោស ឬមិនមានទោសនោះ ក៏មិនពាក់ព័ន្ធនឹងការរំលាយគណបក្សសង្រ្គោះជាតិដែរ។ បន្ថែមពីនេះ លោកថា គណបក្សសង្គ្រោះជាតិ មិនអាចរស់ឡើងវិញបានទេ ដោយសារការរំលាយនេះ ជាប់ពាក់ព័ន្ធសកម្មភាពថ្នាក់ដឹកនាំ និងសកម្មជនបក្សដែលលោកថា បានធ្វើសកម្មភាពល្មើសនឹងច្បាប់។
លោកថា៖ «អ្នកមិនយល់ថា ការចោទថា កឹម សុខា មិនទាន់មានទោសផង បែរជាទៅរំលាយគណបក្សសង្រ្គោះជាតិ អ៊ីចឹងគេរំលាយគណបក្សសង្គ្រោះជាតិ ដោយសាលដីកាហ្នឹង មិនទាក់ទងនឹងរឿងលោក កឹម សុខា ហ្នឹងទេ គឺសកម្មភាពគណបក្សសង្គ្រោះជាតិទាំងមូល»។
ក៏ប៉ុន្តែបើផ្អែកលើកអង្គហេតុ លោក សម រង្ស៊ី លាលែងពីតំណែងប្រធានគណបក្ស និងពីសមាជិកភាពរបស់គណបក្សសង្គ្រោះជាតិ ជាផ្លូវការនៅថ្ងៃទី១២ ខែកុម្ភៈ ឆ្នាំ២០១៧ ដោយផ្ទេរតំណែងជាប្រធានបក្សឱ្យទៅលោក កឹម សុខា ដែលជាអនុប្រធាន។
ក្រោយមកសមត្ថកិច្ចបានចាប់ខ្លួនលោក កឹម សុខា ដាក់ពន្ធនាគារកាលពីយប់រំលងអធ្រាត្រចូលថ្ងៃទី៣ ខែកញ្ញា ឆ្នាំ២០១៧ នៅគេហដ្ឋានរបស់លោក ស្ថិតក្នុងខណ្ឌទួលគោក រាជធានីភ្នំពេញ ក្រោមការចោទពីបទសន្និដ្ឋិភាពជាមួយបរទេស ឬត្រូវរ៉ូវជាមួយបរទេសដើម្បីផ្តួលរំលំរដ្ឋាភិបាល។ បន្ទាប់ពីការចាប់ខ្លួនលោក កឹម សុខា បានប្រហែល ២ខែ តុលាការកំពូលបានសម្រេចរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧។
នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា បើយោងតាមសាដីកាតុលាការរំលាយគណបក្សសង្គ្រោះជាតិកាលពីឆ្នាំ២០១៧ បានភ្ជាប់ករណី កឹម សុខា នឹងទៅការរំលាយបក្ស។ លោកបន្តថា បើសិនតុលាការរំលាយគណបក្សសង្គ្រោះជាតិហើយ ប៉ុន្តែតុលាការរកឃើញមិនឃើញកំហុសនោះ លោក កឹម សុខា មានសិទ្ធិប្ដឹងចំពោះការរំលាយគណបក្សសង្គ្រោះជាតិវិញ។
លោកថា៖ «ចាប់ឯកឧត្ដម កឹម សុខា ហើយបានរំលាយគណបក្ស អ៊ីចឹងចាប់គេ ចោទគេហើយ បើសិនជារកមិនឃើញ បើទម្លាក់បទចោទវាទៅមិនរួចទេ។ ទៅមិនរួចស្មើនឹងអ្នកចាប់ និងអ្នករំលាយ អ្នកដកកៅអីគេ អ្នករំលាយសមាជិកក្រុមប្រឹក្សាឃុំសង្កាត់ខុសទាំងអស់។ អាហ្នឹង វាទៅអត់រួចទេ វាធ្ងន់ធ្ងរណាស់ អ៊ីចឹងការកាត់វាត្រុវតែមានហើយ ប៉ុន្តែអាចលើកលែងទោសអ៊ីចឹង មិនដឹងទេ»។
អ្នកវិភាគនយោបាយ លោក គឹម សុខ បានលើកឡើងថា ការដែលបង្កើតសេណារីយូថ្មីរបស់ក្រសួងយុត្តិធម៌ គ្រាន់តែដើម្បីសម្រួលស្ថានការណ៍ដែលជាប់គាំងតែប៉ុណ្ណោះ។ ជាងនេះទៀត លោកថា បើសិនរដ្ឋាភិបាលមិនធ្វើបែបនេះទេ កម្ពុជាកាន់តែរងសម្ពាធខ្លាំងលើវិបត្តិនយោបាយ។ លោកថា នេះជាឆាកល្ខោន ដែលគណបក្សប្រជាជនកម្ពុជា ធ្វើឡើងដោយមិនមានភាពអៀនខ្មាសដែរ បើទោះបីជាគេដឹងថា ការរំលាយគណបក្សសង្គ្រោះជាតិពាក់ព័ន្ធនឹងលោក កឹម សុខាក្ដី។
លោកថា៖ «គ្មានហេតុផលអ្វីក្រៅពីនិតីមាត់ទេ គឺគេនិយាយដោយភាសារបស់គេ ហើយគេចង់បានយ៉ាងណាគេនិយាយអ៊ីចឹង ដោយអត់មានភស្តុតាង និងអត់មានអង្គហេតុត្រឹមត្រូវទេ ដូចគេចោទប្រកាន់លោក កឹម សុខាពីដំបូងថា ពាក់ព័ន្ធនឹងសហរដ្ឋអាមេរិក ដល់ប្រតិកម្មសហរដ្ឋអាមេរិកខ្លាំងពេក ទប់មិនបានក៏បែរជាក្រឡះសម្ដីថា គេមិនបានចោទសហរដ្ឋអាមេរិក ពាក់ព័ន្ធនឹងរឿងក្ដីក្ដាំងលោក កឹម សុខា ទេ ដូច្នេះរឿងចុងក្រោយក៏វាដូច្នេះដែរ នៅពេលដែលគេសម្រួលស្ថានការណ៍លោក កឹម សុខា ដោយកម្រិតណាមួយ គេនឹងបង្កើតនូវការតែងសេចក្ដីសម្រាប់សូត្រថា រឿងលោក កឹម សុខា ដោយឡែក និងរឿងគណបក្សសង្គ្រោះជាតិដោយឡែក»។
គណបក្សសង្គ្រោះជាតិ មុនតុលាការកំពូលរំលាយ ទទួលបានសំឡេងឆ្នោតជាង ៤៣ភាគរយ ប្រហាក់ប្រហែលនឹងគណបក្សប្រជាជនកម្ពុជា។
ទោះយ៉ាងណា សហរដ្ឋអាមេរិក កាលពីថ្ងៃទី១៥ ខែកុម្ភៈ ឆ្នាំ២០១៩ តាមរយៈស្ថានទូតរបស់ខ្លួនប្រចាំនៅកម្ពុជា បានចាត់ទុកលោក កឹម សុខា ជាមនុស្សស្អាតស្អំ តែត្រូវបានគេចាប់ដាក់ពន្ធនាគារទាំងអយុត្តិធម៌។ មួយវិញទៀត នៅចុងខែកញ្ញា ឆ្នាំ២០២០ អ្នកជំនាញសិទ្ធិមនុស្សអង្គការសហប្រជាជាតិ អ្នកស្រី រ៉ូណា ស្មីត បានចាត់ទុកសំណុំរឿងចោទប្រកាន់លើលោក កឹម សុខា នេះថា «ជារឿងនយោបាយ ដែលនេះក្លាយទៅជាគំរូអាក្រក់មួយឆ្លុះបញ្ចាំងពីការអនុវត្តច្បាប់មិនត្រឹមត្រូវទៅលើគូប្រជែងនយោបាយ»៕
