លោក សម រង្ស៊ី សហស្ថាបនិកគណបក្សសង្គ្រោះជាតិដែលត្រូវបានតុលាការរំលាយបានអះអាងថា តុលាការបារាំងបានចេញដីកាឱ្យចាប់ខ្លួនលោក ហ៊ីង ប៊ុនហៀង និងលោក ហ៊ុយ ពិសិដ្ឋ តែសាមីខ្លួនបានអះអាងថា មិនខ្វល់ពីការលើកឡើងរបស់លោក សម រង្ស៊ី នេះឡើយ។
លោក សម រង្ស៊ី ដែលកំពុងនិរទេសខ្លួននៅប្រទេសបារាំង បានសរសេរនៅលើទំព័រហ្វេសប៊ុករបស់លោកនៅថ្ងៃទី២២ ខែមករា ចំខួប១៨ឆ្នាំនៃឃាតកម្មលើមេដឹកនាំសហជីពសេរីកម្មករកម្ពុជាលោក ជា វិជ្ជា ថា៖ «ថ្ងៃនេះ យើងប្រារព្ធពិធីរំលឹកខួបទី១៨ នៃការបាញ់សម្លាប់ លោក ជា វិជ្ជា នៅទីក្រុងភ្នំពេញ កាលពីថ្ងៃ២២ ខែមករា ឆ្នាំ២០០៤។ លោក ជា វិជ្ជា ជាប្រធានសហជីពកម្មករខ្មែរ ដែលមានប្រជាប្រិយភាពខ្ពស់បំផុតនៅពេលនោះ។ មកដល់ពេលនេះ អ្នកដែលបានបាញ់សម្លាប់លោក ជា វិជ្ជា នៅតែទទួលបាននិទណ្ឌភាព គឺការរួចផុតពីទោសពៃរ៍ ដូចជា ជនឧក្រិដ្ឋដទៃទៀតជាច្រើនដែលបានបាញ់សម្លាប់ប្រជាពលរដ្ឋស្លូតត្រង់នៅកម្ពុជា»។
ភ្ជាប់ជាមួយខួប១៨ឆ្នាំនៃឃាតកម្មបាញ់សម្លាប់លោក ជា វិជ្ជា ទៅនឹងព្រឹត្តិការណ៍គប់គ្រាប់បែកកាលពីថ្ងៃទី៣០ ខែមីនា ឆ្នាំ១៩៩៧ នោះ លោក សម រង្ស៊ី បានលើកឡើងថា តុលាការទីក្រុងប៉ារីស បានសម្រេចចោទប្រកាន់ លោក ហ៊ីង ប៊ុនហៀង និងលោក ហ៊ុយ ពិសិដ្ឋ ដែលជាអ្នកទទួលខុសត្រូវពីរនាក់ធំជាងគេ ក្នុងអង្គភាពអង្គរក្សរបស់លោកនាយករដ្ឋមន្ត្រី ហ៊ុន សែន ពីបទ «សមគំនិត ប៉ុនប៉ងសម្លាប់មនុស្ស»។
លោក សម រង្ស៊ី បានបន្ថែមថា៖ «តុលាការទីក្រុងប៉ារីស កាលពីថ្ងៃ៣០ ខែធ្នូ ឆ្នាំ២០២១ បានសម្រេចចោទប្រកាន់ពីបទ “សមគំនិត ប៉ុនប៉ងសម្លាប់មនុស្ស” លោក ហ៊ីង ប៊ុនហៀង និងលោក ហ៊ុយ ពិសិដ្ឋ ដែលជាអ្នកទទួលខុសត្រូវពីរនាក់ធំជាងគេ ក្នុងអង្គភាពអង្គរក្ស លោកនាយករដ្ឋមន្ត្រី ហ៊ុន សែន។ តុលាការ ក៏បានសម្រេចយកបុគ្គលពីរនាក់នេះទៅកាត់ទោសនៅចំពោះមុខតុលាការព្រហ្មទណ្ឌ ដែលផ្តន្ទាទោសឧក្រិដ្ឋជន (Cour d’Assises)។ សេចក្តីប្រកាសរបស់តុលាការបារាំងបានឲ្យដឹងថា តុលាការនេះ បានចេញដីកាឲ្យចាប់ខ្លួន លោក ហ៊ីង ប៊ុនហៀង និងលោក ហ៊ុយ ពិសិដ្ឋ ចុះថ្ងៃ១៩ ខែមីនា ឆ្នាំ២០២០ ហើយដីកាឲ្យចាប់ខ្លួននេះ នៅតែមានសុពលភាពដដែល យោងមាត្រា ១៨៦-៣ នៃក្រមនីតិវិធីព្រហ្មទណ្ឌ»។
វីអូឌី មិនអាចស្វែងរកការបញ្ជាក់បន្ថែមពីលោក សម រង្ស៊ី និងពីតុលាការប្រទេសបារាំងបាននៅឡើយទេ ចំពោះការលើកឡើងរបស់លោក សម រង្ស៊ីនេះ។
ប៉ុន្តែ លោក ហ៊ីង ប៊ុនហៀង មេបញ្ជាការរងកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្សរបស់លោកនាយករដ្ឋមន្ត្រី ហ៊ុន សែន បានប្រាប់វីអូឌីនៅថ្ងៃសៅរ៍នេះថា លោកមិនខ្វល់ចំពោះការលើកឡើងរបស់លោក សម រង្ស៊ី នោះឡើយ។ លោកបានចាត់ទុកការចោទប្រកាន់របស់លោក សម រង្ស៊ី ថា គ្មានមូលដ្ឋានច្បាស់លាស់ ដោយចេះតែដើរចោទប្រកាន់លោកផ្ដេសផ្ដាស។
លោកថា៖ «ដាក់បណ្ដឹងទៅណាទៅមានទើសក្បាលអីខ្ញុំ! ខ្ញុំមិនមានពាក់ព័ន្ធអីនឹងសម រង្ស៊ី ទេ។ ខ្ញុំគ្មានទៅខ្វល់អីនឹងវាទេ ទាក់ទងអីខ្ញុំមិនដឹងអីផង ចេះតែចោទខ្ញុំផ្ដេសផ្ដាសម៉េចអ៊ីចឹង ។ វាប្ដឹងបារាំង ចុះខ្ញុំខ្មែរ ម៉េចប្ដឹងបារាំងវិញ។ ខ្ញុំអត់យល់ ប្ដឹងណាប្ដឹងទៅ ខ្ញុំគ្មានទៅខ្វល់អីខ្ញុំទេ វាអត់មានការពាក់ព័ន្ធអី។ ចោទម៉េចចោទទៅព្រោះខ្ញុំអត់ដឹងអីផង ចេះតែនិយាយបំភ្លើសផ្ដេសផ្ដាស»។
យ៉ាងណាក្តី លោក សម រង្ស៊ី បានអះអាងថា លោកបានដាក់ពាក្យបណ្តឹងនេះទៅតុលាការបារាំងក្នុងនាមលោក និងភរិយារបស់លោក គឺលោកស្រី ជូឡុង សូមួរ៉ា មានសញ្ជាតិបារាំង ក្នុងគោលបំណងវែកមុខជនឧក្រិដ្ឋ ដែលបានវាយប្រហារដោយគ្រាប់បែកមកលើប្រជាពលរដ្ឋស្លូតត្រង់ នៅទីក្រុងភ្នំពេញ កាលពីថ្ងៃ៣០ ខែមីនា ឆ្នាំ១៩៩៧។
លោក សម រង្ស៊ី បានសរសេរថា លោក និងភរិយា គឺជាគោលដៅ នៃការវាយប្រហារនោះ ដែលបណ្តាលឲ្យមានអ្នកស្លាប់យ៉ាងតិច ១៦ នាក់ និងអ្នករបួសធ្ងន់ជាង ១០០ នាក់ ក្នុងនោះ មានទាំងលោក ជា វិជ្ជា ផងដែរ ដែលបានចូលរួមជាមួយលោក នៅក្នុងបាតុកម្មមួយដោយសន្តិវិធី៕