ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បានឱ្យដឹងនៅថ្ងៃចន្ទនេះថា សហភាពអឺរ៉ុបមិនមានគម្រោងប្រាប់ដល់គ្រួសារអ្នកការទូតរបស់ខ្លួនឱ្យចាកចេញពីអ៊ុយក្រែននៅពេលនេះនោះទេ។
ការថ្លែងរបស់ប្រធានគោលនយោបាយការបរទេសរូបនេះ បានធ្វើឡើងបន្ទាប់ពីសហរដ្ឋអាមេរិកកាលពីថ្ងៃអាទិត្យម្សិលមិញ បានប្រកាសពីសកម្មភាពនេះ ដោយពួកគេលើកឡើងថា ការវាយប្រហារយោធាពីសំណាក់រុស្ស៊ីអាចកើតមានឡើងគ្រប់ពេលទាំងអស់។
ទាក់ទិននឹងករណីនេះ ទីភ្នាក់ងារសារព័ត៌មាន Reuters បានស្រង់សម្ដីលោក Josep Borrell ដែលបានថ្លែងប្រាប់អ្នកយកព័ត៌មានថា៖ «យើងនឹងមិនធ្វើសកម្មភាពដូចគ្នានេះនោះទេ ដោយសារតែយើងគ្មានហេតុផលជាក់លាក់ណាមួយក្នុងការធ្វើវា»។
ប្រធានគោលនយោបាយការបរទេសដដែល បន្ថែមថា៖ «ការចរចានានាកំពុងតែបន្ត។ យើងមិនមានហេតុផលណាមួយដើម្បីចាកចេញពីអ៊ុយក្រែននោះទេ»។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលប៉ុន្មានខែចុងក្រោយនេះបានចាប់ផ្ដើមកើនឡើង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចល័តទ័ពរបស់ខ្លួននៅក្បែរព្រំដែនរបស់ប្រទេសមួយនេះ។
ទោះជាយ៉ាងណា រុស្ស៊ីកាលពីពេលកន្លងទៅ ធ្លាប់បានបដិសេធគម្រោងរៀបចំការវាយប្រហារណាមួយលើអ៊ុយក្រែន ខណៈដែលពួកគេបានលើកឡើងថា កងទ័ពទាំងឡាយរបស់ពួកគេ គឺមិនបានបង្កការគំរាមកំហែងដល់នរណាម្នាក់ឡើយ។
គួរបញ្ជាក់ថា ប្រធានគណៈកម្មការអឺរ៉ុប កាលពីពេលកន្លងទៅ ក៏ធ្លាប់បានបញ្ជាក់ឱ្យដឹងផងដែរថា សហភាពអឺរ៉ុបបានត្រៀមខ្លួនរួចជាស្រេច ក្នុងការដាក់ទណ្ឌកម្មធ្ងន់ធ្ងរលើប្រទេសរុស្ស៊ី ប្រសិនបើយោធារបស់ប្រទេសមួយនេះឈ្លានពានអ៊ុយក្រែន៕
