រដ្ឋាភិបាលរម្លឹកពីវិធានមួយចំនួន ដើម្បីបង្ការទប់ស្កាត់ជំងឺឆ្លង និងផលប៉ះពាល់សុខភាពដែលកើតចេញពីការបរិភោគអាហារនិងគ្រឿងស្រវឹង អំឡុងពិធីបុណ្យចូលឆ្នាំចិនដែលនឹងចូលមកដល់នៅសប្ដាហ៍ក្រោយនេះ។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង តាមរយៈលិខិតចុះថ្ងៃទី២៤ ខែមករា ឆ្នាំ២០២២ បានក្រើនរម្លឹកឱ្យប្រជាពលរដ្ឋមានការប្រុងប្រយ័ត្នពីហានិភ័យសុខភាពក្នុងពិធីចូលឆ្នាំចិន និងពិធីបុណ្យចូលឆ្នាំខ្មែរ ដែលនឹងចូលមកដល់ខាងមុខ។
រដ្ឋមន្ត្រីរូបនោះបានគូសបញ្ជាក់ថា ជារៀងរាល់ឆ្នាំ នៅពេលដែលប្រជាពលរដ្ឋប្រារព្វពិធីបែបនេះ វាជំរុញឱ្យមានការចរាចរសត្វបក្សីពីតំបន់មួយទៅតំបន់មួយ និងកំណើនមនុស្សសម្រុកទៅកាន់ទីផ្សារច្រើន រួមទាំងការប្រើប្រាស់គ្រឿងស្រវឹងផងដែរ ខណៈកម្ពុជាកំពុងរកឃើញមេរោគបំប្លែងថ្មី «អូមីក្រុង» នៅឡើយ។
លោកថា៖ «ក្រសួងសុខាភិបាលសូមអំពាវនាវនិងធ្វើការក្រើនរម្លឹកដល់បងប្អូនប្រជាពលរដ្ឋគ្រប់រូបត្រូវបន្តប្រុងប្រយ័ត្នផ្ទាល់ខ្លួនប្រកបដោយស្មារតីទទួលខុសត្រូវ ក្នុងការការពារសុខភាពពីការចម្លងជំងឺកូវីដ-១៩ ពិសេសអូមីក្រុង ជំងឺផ្ដាសាយបក្សី និងជំងឺផ្សេងៗ រួមទាំងការបង្ការសុខភាពបណ្ដាលមកពីការពុលចំណីអាហារឬពុលស្រាស»។
ក្រៅពីនេះ ក្រសួងសុខាភិបាលក៏បានបន្តរម្លឹកពីវិធានរក្សាគម្លាតសង្គម ពាក់ម៉ាស សម្អាតដៃនឹងអាល់កុល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងប្រាប់លេខទូរសព្ទ១១៥ ដើម្បីសុំអន្តរាគមន៍បន្ទាន់ពីក្រសួងផងដែរ។ ពិធីសែនព្រេន ឬចូលឆ្នាំចិន នឹងចូលមកដល់នៅដើមសប្ដាហ៍ក្រោយនៃខែកុម្ភៈ ឆ្នាំ២០២២៕
