អង្គភាពប្រឆាំងអំពើពុករលួយ (ACU) ព្រមានប្រើប្រាស់កម្លាំងសាធារណៈ ដើម្បីបង្ខំបុគ្គល១១រូបឱ្យចូលបង្ហាញខ្លួននៅដើមខែក្រោយនេះ ជុំវិញការក្លែងបន្លំនិងប្រើប្រាស់ឯកសារសាធារណៈក្លែង រួមទាំងប្រឆាំងអ្នករាជការសាធារណៈនៅកោះរ៉ុង ខេត្តព្រះសីហនុ។
ក្នុងលិខិតកោះហៅចំនួន១១ផ្សេងៗគ្នារបស់អង្គភាពប្រឆាំងអំពើពុករលួយដែលវីអូឌីទទួលបាននៅថ្ងៃអង្គារនេះ បានឱ្យដឹងថា កន្លងមក អង្គភាពប្រឆាំងអំពើពុករលួយ ធ្លាប់បានចេញលិខិតកោះហៅបុគ្គលចំនួន១១រូបនោះឱ្យចូលបំភ្លឺកាលពីថ្ងៃទី១៦ ខែធ្នូ ឆ្នាំ២០២១ ម្ដងរួចមកហើយ ប៉ុន្តែពួកគេព្យាយាមគេចវេះពីលំនៅឋាន និងមិនបានទទួលលិខិតកោះហៅនោះទេ។
ក្រោយមក ACU បានចេញលិខិតកោះហៅបុគ្គល១១រូបនោះជាថ្មីទៀតឱ្យចូលខ្លួនបំភ្លឺនៅថ្ងៃទី៧ ខែកុម្ភៈ ឆ្នាំ២០២២ ជុំវិញអំពើក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែង, អំពើសមគំនិតក្នុងការក្លែងបន្លំឯកសារសាធារណៈ និងអំពើប្រឆាំងនឹងអ្នករាជការសាធារណៈមានស្ថានទម្ងន់ទោស ដោយសារពួកគេបានប្រព្រឹត្តស្ថិតនៅសង្កាត់កោះរ៉ុង ក្រុងកោះរ៉ុង ខេត្តព្រះសីហនុ។
បើតាមដីកាកោះ ក្នុងចំណោមបុគ្គលទាំង១១រូបដែលអង្គភាពប្រឆាំងអំពើពុករលួយកោះហៅនោះ មាន០៤នាក់ត្រូវឆ្លើយបំភ្លឺរឿងអំពើក្លែងបន្លំឯកសារសាធារណៈនិងប្រើប្រាស់ឯកសារសាធារណៈក្លែង ម្នាក់ត្រូវឆ្លើយបំភ្លឺអំពើសមគំនិតក្នុងការក្លែងបន្លំឯកសារសាធារណៈ និង ៦នាក់ទៀតត្រូវឆ្លើយបំភ្លឺអំពើប្រឆាំងនឹងអ្នករាជការសាធារណៈមានស្ថានទម្ងន់ទោស។
ករណីនេះ ACU ព្រមានថា បើសាម៉ីខ្លួននៅតែគេចវេះមិនចូលខ្លួនឆ្លើយបំភ្លឺតាមកាលបរិច្ឆេទដែលបានកំណត់ក្នុងលិខិតកោះហៅនេះទេ អង្គភាពប្រឆាំងអំពើពុករលួយនឹងចេញលិខិតបញ្ជាឱ្យចូលខ្លួន ដែលអនុញ្ញាតឱ្យមន្រ្ដីនគរបាលយុត្តិធម៌ប្រើប្រាស់កម្លាំងសាធារណៈ ដើម្បីបង្ខំឱ្យចូលបង្ហាញខ្លួនផងដែរ។
វីអូឌី មិនអាចសុំការបំភ្លឺពីប្រធានអង្គភាពប្រឆាំងអំពើពុករលួយ លោក ឱម យិនទៀង និងអ្នកនាំពាក្យអង្គភាពប្រឆាំងអំពើពុករលួយ លោក ឃាង សេង បានទេ នៅរសៀលថ្ងៃអង្គារនេះ។
ដោយឡែក អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ សុំមិនបកស្រាយជុំវិញករណីនេះឡើយ។
មាត្រា៦២៩ នៃក្រមព្រហ្មទណ្ឌចែងថា ការក្លែងបន្លំឯកសារសាធារណៈ ដែលប្រព្រឹត្តនៅក្នុងលិខិតយថាភូត ឬការក្លែងបន្លំប្រព្រឹត្តនៅក្នុងឯកសារដែលចេញឱ្យដោយរាជការសាធារណៈ ដើម្បីធ្វើការកត់សម្គាល់សិទ្ធិ អត្តសញ្ញាណ ឬឋានៈ ឬដើម្បីយល់ព្រមផ្ដល់ការអនុញ្ញាត ត្រូវផ្ដន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ។
មាត្រា២៣០នៃក្រមដដែលចែងថា បទប្រើប្រាស់ឯកសារសាធារណៈក្លែង ត្រូវផ្ដន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី៤ ០០០ ០០០រៀល ទៅ១០ ០០០ ០០០រៀល។
ចំណែកមាត្រា៥០៤ នៃក្រមព្រហ្មទណ្ឌដដែល ចែងថា ស្ថានទម្ងន់ទោសទាក់ទងនឹងការប្រឆាំងនឹងអ្នករាជការសាធារណៈ បានប្រព្រឹត្តដោយបុគ្គលច្រើនរូប ធ្វើសកម្មភាពក្នុងឋានៈជាចារី សហចារី អ្នកផ្ដើមគំនិត ឬជាអ្នកសមគំនិត និងចារីមានអាវុធ ត្រូវផ្ដន្ទាទោសដាក់ពន្ធនាគារពី៦ខែ ទៅ១ឆ្នាំ និងពិន័យជាប្រាក់ពី១ ០០០ ០០០រៀល ទៅ២ ០០០ ០០០រៀល៕
