សវនាការលើអង្គសេចក្ដីក្នុងសំណុំរឿងលោក កឹម សុខា នៅព្រឹកថ្ងៃអង្គារនេះ មានភាពចម្រូងចម្រាសនិងតឹងសរសៃកដាក់គ្នារវាងសហមេធាវីការពារក្ដីឱ្យជនជាប់ចោទ និងតំណាងអយ្យការ លើភស្តុតាងដាក់បន្ទុក។
លោក អាង ឧត្ដម សហមេធាវីម្នាក់ក្នុងចំណោមមេធាវី៤រូបដែលការពារក្ដីឱ្យលោក កឹម សុខា បានប្រាប់ក្រុមអ្នកសារព័ត៌មានក្រោយចេញពីបន្ទប់សវនាការថា ភស្តុតាងដាក់បន្ទុកប្រឆាំងកូនក្ដីរបស់ខ្លួនជាភស្តុតាងមួយដែលតុលាការធ្វើឡើងច្រំដែលៗ។ លោកបន្តថា ក្នុងនាមជាមេធាវី លោកបានព្យាយាមជំទាស់ដែរ ប៉ុន្តែត្រូវតុលាការបិទសិទ្ធិមិនឱ្យលោកមានឱកាសក្នុងការប្រតិកម្មតបទៅនឹងភស្តុតាងដែលតំណាំងអយ្យការបង្ហាញនៅក្នុងអង្គសវនាការទេ។
លោកបន្តថា៖ «តំណាងអយ្យការបានពន្លយពាក្យមួយ ពេលយើងជំទាស់ មេធាវីជំទាស់ធ្វើអី។ គ្រាន់តែភស្តុតាងប៉ុណ្ណឹង វាមិនមែនជាភស្តុតាងដាក់បន្ទុកទេ។ យើងចង់ឡើងឆ្លើយ តែតុលាការមិនឱ្យឱកាសឆ្លើយទេ។ ខ្ញុំចង់ឆ្លើយថា បើតំណាងអយ្យការយល់ថាភស្តុតាងណាមួយមិនត្រឹមត្រូវ និងជាភស្តុតាងដាក់បន្ទុក ដាក់មកធ្វើអី? ដកចេញទៅ! ហើយដកចេញហើយ បើសិនភស្តុតាងដាក់បន្ទុកលែងគ្រប់គ្រាន់ សូមតុលាការលើកឡើងចោទទៅ ព្រោះតំណាងអយ្យការខ្លួនឯងឥតមានភស្តុតាងគ្រប់គ្រាន់ និងឥតត្រឹមត្រូវទៀត»។
ក្រៅពីមេធាវី លោក អាង ឧត្ដម គឺអ្នកស្រី ម៉េង សុភារី លោក ចាន់ ចេន និងលោក ផែង ហេង ដែលជាសហមេធាវីការពារក្ដីឱ្យជនជាប់ចោទ លោក កឹម សុខា ក៏ប្រតិកម្មដូចគ្នានេះដែរ ទាក់ទងទៅនឹងភស្តុតាងដាក់បន្ទុកដែលស្នើឡើងដោយតំណាងអយ្យការនៅពេលនេះ។
វីអូឌី មិនអាចស្នើសុំការបំភ្លឺបន្ថែមបានទេពីអ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល នៅថ្ងៃអង្គារនេះ។
និយាយពីស្ថានភាពនៅក្នុងអង្គសវនាការឯណោះវិញ នៅក្នុងជុំទី២ ក្រោយពីសម្រាករយៈពេល១៥នាទី ប្រធានក្រុមប្រឹក្សាជំនុំជម្រះ លោក កូយ សៅ បានបន្តនីតិវិធីដោយផ្ដល់ឱកាសឱ្យតំណាងអយ្យការបានលើកឡើងពីភស្តុតាងដាក់បន្ទុកប្រឆាំងលោក កឹម សុខា។
ទាំងភាគីតំណាងអយ្យការ និងមេធាវីការពារក្ដីឱ្យជនជាប់ចោទ ចាប់ផ្ដើមផ្ទុះកំហឹងដាក់គ្នា និងឈានទៅរកការខ្វែងគំនិតគ្នាកាន់តែខ្លាំងឡើងៗ អំពីភស្តុតាងដាក់បន្ទុក ជាខ្សែអាត់វីដេអូ និងបតិចរិត ឬសម្រង់សម្ដីដែលត្រូវបានគេកត់ត្រាគ្រប់ម៉ាត់គ្រប់ឃ្លាតាមសំឡេងដើមរបស់ជនត្រូវចោទ នៅក្នុងបន្ទប់ជំនុំជម្រះ។
លោក ប្លង់ សុផល តំណាងអយ្យការម្នាក់ក្នុងចំណោមតំណាងអយ្យការទាំង៣រូបដែលជាដើមបណ្ដឹងអាជ្ញាក្នុងរឿងក្ដីព្រហ្មទណ្ឌនេះ បានដាក់ភស្តុតាងរូបភាពជាវីដេអូចំនួន៧វីដេអូ និងបតិចរិតចំនួន៦ ដែលមានភ្ជាប់សកម្មភាពលោក កឹម សុខា លោក សម រង្ស៊ី លោក ហូរ វ៉ាន់ និងសកម្មភាពនៃអំពើបាតុកម្មនៅអំឡុងឆ្នាំ២០១៣ផង។
ភ្លាមៗក្រោយពីតំណាងអយ្យការស្នើឱ្យចាក់រូបភាពជាវីដេអូដែលជាភស្តុតាងដាក់បន្ទុកនេះ លោក អាង ឧត្ដម ដែលជាសហមេធាវីការពារក្ដីឱ្យជនជាប់ចោទ បានឡើងជំទាស់ភ្លាមដែរ ដោយសម្អាងហេតុថា ពុំគួរណាតំណាងអយ្យការប្រញាប់ប្រញាល់ធ្វើសេចក្ដីសន្និដ្ឋាន ព្រោះតុលាការកំពុងតែបន្តនីតិវិធីនៅឡើយ។ ប៉ុន្តែទាំងតំណាងអយ្យការ និងក្រុមប្រឹក្សាជំនុំជម្រះ ថ្លែងការពារថា នេះមិនមែនជាការធ្វើសេចក្ដីសន្និដ្ឋានទុកជាមុនទេ ពោលគឺជាការពន្យល់អំពីសកម្មភាព ដើម្បីឱ្យអង្គសវនាការយល់តែប៉ុណ្ណោះ។
មិនយូរប៉ុន្មាន គេសង្កេតឃើញថា ភាពតានតឹងនៅក្នុងបន្ទប់សវនាការទាំងមូលបានកើតឡើង បន្ទាប់ពីលោក ចាន់ ចេន ប្រើសំឡេងខ្លាំងៗ និងចាត់ទុកវត្តមានតំណាងអយ្យការម្នាក់ទៀត គឺលោក ឆាយ ហុង ថាជាតំណាងអយ្យការមិនសូវយល់ពីសំណុំរឿង និងហាក់ដូចទើបតែចូលរួមនៅក្នុងសវនាការនេះជាលើកដំបូង។ ភ្លាមៗ លោក ឆាយ ហុង បានឡើងជំទាស់ដោយប្រើសំឡេងធ្ងន់ៗនិងឮខ្លាំងតបទៅវិញ ដោយចាត់ទុកក្រុមសហមេធាវីការពារក្ដីឱ្យជនជាប់ចោទថា «ចិត្តជាទេវទត្ត តែមាត់ជាទេវតា»។
បើទោះជាលោក កូយ សៅ យល់ឃើញថា ការបកស្រាយអមជាមួយរូបភាពវីដេអូរបស់តំណាងអយ្យការថាមិនមែនជាសេចក្ដីសន្និដ្ឋាន ប៉ុន្តែដើម្បីសម្រួលស្ថានភាពក្នុងសវនាការ ប្រធានក្រុមប្រឹក្សាជំនុំជម្រះហាក់ឯកភាពទៅនឹងការជំទាស់របស់សហមេធាវីការពារក្ដីឱ្យជនជាប់ចោទ និងបានប្រាប់ទៅតំណាងអយ្យការធ្វើយ៉ាងណាកុំឱ្យចូលទៅក្នុងសេចក្ដីសន្និដ្ឋាន។
បើទោះជាបែបណា សវនាការដែលប្រើពេលប្រមាណជាង៤ម៉ោង នៅព្រឹកថ្ងៃទី២៥ ខែមករា នេះជាលើកទី១ហើយដែលគេសង្កេតឃើញ សហមេធាវីដើមបណ្ដឹងរដ្ឋប្បវេណីបន្តអង្គុយស្ងៀមស្ងាត់មិនតបតសូម្បីមួយម៉ាត់ រហូតបិទបញ្ចប់សវនាការ។
នៅក្នុងបន្ទប់សវនាការលើកទី២៨នេះដែរ គេសង្កេតឃើញមានតំណាងអង្គទូតមកពីបណ្ដាប្រទេសជឿនលឿនមួយចំនួនចូលរួមអង្កេតការណ៍ ដូចជា សហរដ្ឋអាមេរិក បារាំង អាល្លឺម៉ង់ សហភាពអឺរ៉ុប ជប៉ុន អូស្រ្តាលី និងតំណាងអង្គការសហប្រជាជាតិប្រចាំនៅកម្ពុជា រួមទាំងអង្គការមិនមែនរដ្ឋាភិបាល។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលបានចូលរួមស្ដាប់សវនាការដោយផ្ទាល់ ក៏ឯកភាពដែរថា ភស្តុតាងដាក់បន្ទុកដែលស្នើឡើងដោយតំណាងអយ្យការនៅពេលនេះ ហាក់មានភាពស្មុគស្មាញ និងមិនមានអ្វីជឿនលឿនទេ។
លោកបន្តថា៖ «ការដេញដោលដាក់ភស្តុតាងហ្នឹងហាក់ដូចជាវិលចុះវិលឡើងដែរ បើតាមខ្ញុំតាមដានកន្លងទៅ។ ការដាក់វីដេអូថ្មីៗបន្តបន្ទាប់មកទៀតនេះ ហើយក៏មិនដូចជាវីដេអូដែលធ្លាប់ចាក់មុនៗមកដែរ»។
លោក កឹម សុខា ដែលចូលរួមស្ដាប់សវនាការដោយផ្ទាល់នៅថ្ងៃនេះ អង្គុយនៅក្នុងរង្វង់ក្រចកសេះ ក្នុងឯកសណ្ឋានអាវធំពណ៌ខ្លាញ់ក្ដាម។ ប្រធានគណបក្សសង្រ្គោះជាតិដែលត្រូវបានតុលាការកំពូលរំលាយរូបនេះ ត្រូវបានតុលាការរៀបចំតុ៤ជ្រុងតូចមួយនៅពីមុខរបស់លោក ក្នុងបរិវេណរង្វង់ក្រចកសេះនោះ។ មន្រ្តីឆ្មាំប្រចាំតុលាការបញ្ជាក់ថា ការរៀបចំតុដ៏កម្រសម្រាប់លោក កឹម សុខា នេះ គឺដើម្បីបង្កភាពងាយស្រួល សម្រាប់លោក កឹម សុខា ដាក់ឯកសាររបស់លោកប៉ុណ្ណោះ។
ប្រធានក្រុមប្រឹក្សាជំនុំជម្រះ លោក កូយ សៅ សម្រេចលើកពេលបន្តសវនាការក្នុងរឿងក្ដីព្រហ្មទណ្ឌនេះ ទៅព្រឹកថ្ងៃទី២ ខែកុម្ភៈ បន្តទៀត។ ប៉ុន្តែសេចក្ដីសម្រេចរបស់ប្រធានក្រុមប្រឹក្សាជំនុំជម្រះនេះ ក៏បានបង្កើតឱ្យមានការខ្វែងគំនិតបន្តទៀតនៅចុងម៉ោងនៃការបិទបញ្ចប់សវនាការ។
ក្រុមសហមេធាវីការពារក្ដីឱ្យជនជាប់ចោទ លោក កឹម សុខា បានស្នើជាថ្មីទៀតថា តុលាការគួរបន្តពន្លឿននីតិវិធីនេះឱ្យបានច្រើនថ្ងៃក្នុងមួយសប្ដាហ៍ ប៉ុន្តែត្រូវបានជំទាស់ភ្លាមដែរពីតំណាងអយ្យការ លោក ប្លង់ សុផល ដោយចាត់ទុកថា នេះមិនមែនជារឿងក្ដីប្រភេទចោរកម្មទេ វាជាសំណុំរឿងដែលប៉ះពាល់ដល់ទៅសន្តិសុខជាតិ ដូច្នេះ គ្រប់ភស្តុតាងត្រូវតែលើកមកសួរដេញដោលគ្រប់នីតិវិធីនៃការជំនុំជម្រះ។ ជាថ្មីម្ដងទៀត តំណាងអយ្យការបានព្រលយពាក្យថា ប្រសិនបើចង់បញ្ចប់រឿងក្ដីនេះឱ្យឆាប់ ជនជាប់ចោទត្រូវសារភាពថាខ្លួនបានប្រព្រឹត្តកំហុស ប៉ុន្តែសហមេធាវីការពារក្ដីរបស់លោក កឹម សុខា នៅតែអះអាងថា កូនក្ដីរបស់ខ្លួនមិនបានប្រព្រឹត្តបទល្មើសដូចការចោទប្រកាន់នេះទេ៕