ប្រជាសហគមន៍មួយចំនួននៅខេត្តជុំវិញតំបន់ព្រៃឡង់លើកឡើងស្រដៀងគ្នាថា អាជ្ញាធរ និងមន្ត្រីជំនាញនៅតែបន្តបំបិទសិទ្ធិសេរីភាពរបស់ពួកគាត់ ដោយពួកគេមិនអនុញ្ញាតឱ្យចូលរួមការពារព្រៃឈើនៅតំបន់ព្រៃឡង់តាមរយៈសកម្មភាពចុះល្បាតឡើយ ស្របពេលបទល្មើសបន្តកើតឡើងជាហូរហែក្នុងដែនជម្រកសត្វព្រៃមួយនេះ។
ចាប់តាំងពីដើមឆ្នាំ២០២០ បណ្តាញសហគមន៍ព្រៃឡង់ យុវជន និងអង្គការសង្គមស៊ីវិល ត្រូវបានមន្ត្រីក្រសួងបរិស្ថាន និងអាជ្ញាធរមូលដ្ឋាន ហាមឃាត់ទាំងស្រុងមិនឱ្យចូលល្បាតព្រៃក្នុងតំបន់ការពារមួយនេះបន្តទៀត ក្រោមហេតុផលសហគមន៍មិនបានចុះបញ្ជីនៅក្រសួងមហាផ្ទៃ។
ប្រជាសហគមន៍ការពារព្រៃឡង់ខេត្តក្រចេះ លោក គឹម សូខន មានប្រសាសន៍ថា ចាំតាំងពីឆ្នាំ២០១៩ បទល្មើសកើតឡើងជាហូរហែ ស្របពេលពួកគេមិនអាចចូលរួមការពារព្រៃឈើបាននោះទេ ដោយថាអាជ្ញាធរមិនអនុញ្ញាតឱ្យចូលល្បាតក្នុងព្រៃនោះទេ។
លោកថា៖«គេកាប់ក្នុងព្រៃឡង់ហ្នឹង ហូរហែមិនចេះឈប់ គេចូលទៅកាប់ហើយសហគមន៍យើងអត់មានលទ្ធភាពអីទៅហាមឃាត់គេបានទេ ព្រោះយើងចូលអត់បានទេ តាចូលគេហាមឃាត់ហើយ ជាពិសេសខាងមន្រ្តីបរិស្ថាន»។
លោកបន្តថា៖«ឥឡូវមានទាំងចូលទៅកាត់ថ្ម ខួងរ៉ែអីទៀតណោះហូរហែ។ ហើយមិនឃើញមានការទប់ស្កាត់អី មន្រ្តីបរិស្ថានបើកឡាន ម៉ូតូ រាល់ថ្ងៃ ឈើចេញតែពីច្រកហ្នឹង ច្រកបរិស្ថាន។ ចឹងបរិស្ថានហាក់ដូចថាការពារតែអ្នកការពារព្រៃឈើទៅវិញ មិនមែនការពារបទល្មើសឯណា»។
ប្រជាសហគមន៍ដដែលបន្ថែមថា មូលហេតុដែលអាជ្ញាធរារាំងមិនឱ្យប្រជាពលរដ្ឋ ឬសកម្មជនចូលល្បាតដោយខ្លាចបែកធ្លាយពីសកម្មភាពបទល្មើសព្រៃឈើទាំងនោះ។
សកម្មជនព្រៃឡង់នៅខេត្តស្ទឹងត្រែងកញ្ញា ឈាង លី បានអះអាងថា ជាមធ្យមទំហំនៃការកាប់បំផ្លាញព្រៃឡង់កើនឡើងប្រមាណ ៥ហិកតាក្នុងមួយថ្ងៃ។ កញ្ញាបន្តថា បើទោះបីជាបទល្មើសព្រៃឈើទាំងនោះ អាជ្ញាធរបានដឹងក៏ដោយ ក៏ប៉ុន្តែពួកគេមិនមានវិធានការណាមួយឱ្យមានប្រសិទ្ធភាពនោះដែរ។
កញ្ញាថា៖«អត់បានទេ ដោយសារមន្រ្តីនៅហ្នឹងយើងចេញចូលអត់បានទេ។ គេខ្លាចយកព័ត៌មានឬបង្ហោះរូបរញ៉េរញៃអ៊ីចឹងណា»។
សកម្មជនបរិស្ថានព្រៃឡង់នៅខេត្តព្រះវិហារលោក ខេម សុខឃី បានលើកឡើងថា ចំពោះការកាប់បំផ្លាញព្រៃឈើនៅក្នុងភូមិសាស្ត្រខេត្តមួយនេះ នៅតែបន្តកើតមានឥតឈប់ឈរពីមួយថ្ងៃទៅមួយថ្ងៃ ហើយមិនឃើញខាងអាជ្ញាធរ ឬក្រសួងបរិស្ថាន វិធានការនោះឡើយ។
លោកថា៖« ភាគច្រើនគាត់[ជនល្មើស]ដឹកដោយមិនមានការព្រួយបារម្ភអីទេ! ពេលយប់ក៏គាត់ដឹក ពេលថ្ងៃក៏ដឹក ប៉ុន្តែដឹកមិនមែនជាលក្ខណៈចេញមកពីក្រៅទេណា! ចេញមកពីដែនផ្សេងមក មិនដឹងគាត់ដឹកទៅទុកណាទៀតទេ ព្រោះខ្ញុំតាមដាននៅក្នុងតំបន់ព្រៃឡង់។ ចឹងគាត់ដឹកមកចែកតាមច្រកព្រៃឡង់ច្រើនណាស់ ទៅខាងស្រុកជ័យសែន មកស្រុករវៀង ហើយមួយទៀតចេញទៅខាងកំពង់ធំហើយសឹងមានគ្រប់ច្រក និយាយទៅការដឹកជញ្ជូនឈើហ្នឹងមិនស្រាកស្រាន្តទេ»។
ប្រជាសហគមន៍រូបនេះ ស្នើទៅរដ្ឋមន្ត្រីក្រសួងបរិស្ថានឱ្យមានចំណាត់ការច្បាស់លាស់ក្នុងការទប់ស្កាត់បទល្មើសព្រៃឈើ ដែលកើតមានក្នុងភូមិសាស្រ្តព្រៃឡង់។
តបនឹងសំណួររបស់វីអូឌីក្នុងសន្និសីទសារព័ត៌មានស្តីពី «ការដាក់ឱ្យអនុវត្តផែនការខ្យល់ស្អាតកម្ពុជា» នៅថ្ងៃទី២៥ ខែមករា ឆ្នាំ២០២២នេះ អ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា ក្រសួងស្វាគមន៍នូវរាល់ការចូលរួមការពារព្រៃឈើ និងតំបន់ការពារធម្មជាតិពីសំណាក់សហគមន៍ ប្រជាពលរដ្ឋ ប៉ុន្តែការចូលរួមធ្វើសកម្មភាពណាមួយនៅតំបន់ការពារធម្មជាតិ ត្រូវតែសុំការអនុញ្ញាតពីក្រសួងបរិស្ថានជាមុន។
លោកថា៖ «ប្រសិនជាបងប្អូនប្រជាពលរដ្ឋចូលនៅក្នុងទិសដៅមួយដើម្បីចូលរួមផ្សព្វផ្សាយកិច្ចការងារដោយ ស្មោះត្រង់ៗ តម្កល់ផលប្រយោជន៍រួមជាធំ សូមអញ្ជើញ! ក៏ប៉ុន្តែក្រសួងបរិស្ថានដាច់ខាតក្នុងការអនុវត្តច្បាប់ចំពោះជនទាំងឡាយណាដែលប្រើប្រាស់សកម្មភាពបរិស្ថាន និងធនធានធម្មជាតិបម្រើឱ្យនយោបាយ»។
មន្រ្តីសម្របសម្រួលគម្រោងនៃបណ្ដាញយុវជនកម្ពុជា(CYN) លោក អូត ឡាទីន មានប្រសាសន៍ថាសម្រាប់ដើមឆ្នាំ២០២២នេះ ទាំងបទល្មើសព្រៃឈើ និងសកម្មភាពរារាំងការចុះល្បាតព្រៃពីសំណាក់អាជ្ញាធរនៅតំបន់ព្រៃឡង់នៅតែកើតមានឡើងដដែល ជាពិសេសតំបន់ដែលមានបទល្មើសខ្លាំង ដូចជា ខេត្តព្រះវិហារ និងខេត្តក្រចេះជាដើម។
លោកបន្ថែមថា រយៈពេលជាង២ឆ្នាំកន្លងមកនេះ អាជ្ញាធរបានរារាំងសកម្មជនបណ្ដាញព្រៃឡង់មិនឱ្យចុះល្បាតដោយលើកហេតុផលថា បណ្ដាញព្រៃឡង់មិនស្របច្បាប់ឬត្រូវការអនុញ្ញាតជាមុន បើទោះបីជាមិនមានណាច្បាប់តម្រូវឱ្យបណ្ដាញសហគមន៍ត្រូវចុះបញ្ជីក៏ដោយ។
លោកថា៖«កាតព្វកិច្ចក្នុងការការពារធនធានធម្មជាតិមិនចាំបាច់ទាល់តែយើងចុះបញ្ជីទើបអាចចូលរួមការពារបានទេ ព្រោះយើងអនុវត្តទៅតាមសិទ្ធិសេរីភាពរដ្ឋធម្មដែលយើងមានសិទ្ធិចូលរួមការពារធនធានធម្មជាតិ»។
សេចក្តីថ្លែងការណ៍របស់សមាជិកបណ្តាញសហគមន៍ព្រៃឡង់ទាំង ៤ខេត្ត ក្នុងឱកាស ទិវាព្រៃឈើអន្តរជាតិ ២១ មីនា ឆ្នាំ២០២១ បញ្ជាក់ថា មានមូលហេតុចម្បងមួយ ដែលធ្វើឱ្យបាត់បង់ព្រៃឈើនៅតំបន់ដែនជម្រកសត្វព្រៃមួយនេះបន្ថែមទៀត គឺការហាមឃាត់មិនឱ្យប្រជាសហគមន៍ចូលរួមការពារ។
យោងតាមទិន្នន័យពីផ្កាយរណបកាលពីឆ្នាំមុនបង្ហាញថា ដែនជម្រកសត្វព្រៃព្រៃឡង់មានការកាប់ឈើដ៏អាក្រក់បំផុតក្នុងចំណោមតំបន់ការពារផ្សេងទៀត ដោយបានបាត់បង់គម្របព្រៃឈើជិត១ម៉ឺនហិកតា (៩ ១១៩) ក្នុងឆ្នាំ២០២០ ដែលកើនឡើង ២១ភាគរយ បើធៀបនឹងឆ្នាំ២០១៩៕