រដ្ឋមន្ត្រីក្រសួងមហាផ្ទៃ លោក ស ខេង បានចេញបញ្ជាផ្ទាល់មាត់ឱ្យស្ថាប័នពាក់ព័ន្ធស្វែងរកអ្នកទទួលខុសត្រូវដែលបានអនុញ្ញាតឱ្យនាំចូលដោយស្របច្បាប់នូវសារធាតុញៀនរាប់រយតោនចូលកម្ពុជា ដើម្បីទប់ស្កាត់ការបំផ្លាញសុខភាពសាធារណៈ។
ក្នុងពិធីប្រគល់រថយន្តដល់មន្ត្រី ធ្វើឡើងនៅរាជធានីភ្នំពេញ នាថ្ងៃអង្គារនេះ លោក ស ខេង ថ្លែងថា កាលពី៣ថ្ងៃមុននេះ មន្ត្រីជំនាញបានបង្ក្រាបសារធាតុញៀនជាង១០០តោនដែលនាំចូលប្រទេសកម្ពុជាដោយស្របច្បាប់ និងមានការចុះហត្ថលេខាទទួលស្គាល់ពីក្រសួងពាក់ព័ន្ធថែមទៀតផង។
លោកគូសបញ្ជាក់ថា បញ្ហានេះបានបង្កឱ្យមានគ្រោះថ្នាក់ដល់សុខភាពសាធារណៈ ហើយអាជ្ញាធរពាក់ព័ន្ធគួរតែនាំគ្នារកឱ្យឃើញអ្នកទទួលខុសត្រូវដែលនាំគ្នាស៊ីញ៉េឱ្យនាំចូលសារធាតុញៀន ដើម្បីទប់បញ្ហានេះ។
លោក ស ខេង គូសបញ្ជាក់ថា៖ «អ៊ីចឹងហើយសុំឱ្យក្រសួងដែលជាក្រសួងផ្ដល់អាជ្ញាបណ្ណ ខ្ញុំមិនបាច់ចេញឈ្មោះក៏ដឹងដែរ ក្រសួងអាជ្ញាបណ្ណ! សុំឯកឧត្ដមរដ្ឋមន្ត្រីមើលរឿងហ្នឹង! បើមិនអ៊ីចឹងឯកឧត្តមជាប់ជំពាក់ចំពោះសង្គមកម្ពុជា ពាក់ព័ន្ធនឹងការបំផ្លាញសុខភាពសាធារណៈ»។
បន្ថែមពីនេះ លោក ស ខេង ក៏បានក្រើនរម្លឹកដល់អាជ្ញាធរជាតិប្រយុទ្ធប្រឆាំងគ្រឿងញៀន ត្រូវសហការជាមួយក្រសួងពាក់ព័ន្ធ ប្រាប់ពីសារធាតុណាខ្លះដែលគេអាចយកមកផ្គុំគ្នាផលិតជាគ្រឿងញៀនបាននោះ ដើម្បីទប់ស្កាត់កុំឱ្យមានការនាំចូលដោយស្របច្បាប់បែបនេះបន្តទៀត។
អ្នកនាំពាក្យក្រសួងពាណិជ្ជកម្ម លោក ប៉ែន សុជាតិ មានប្រសាសន៍ថា ក្រសួងនឹងពិនិត្យមើលឡើងវិញ ក្រោយពីទទួលបានការណែនាំពីថ្នាក់ដឹកនាំ។
លោកបញ្ជាក់ថា ការពិនិត្យទំនិញមួយចំនួនដែលស្ថិតនៅក្នុងបញ្ជីហាមឃាត់ចូលមកកម្ពុជាកន្លងមកនោះ ក្រសួងពាណិជ្ជកម្មបានសហការជាមួយអាជ្ញាធរ គយ និងរដ្ឋាករ ហើយចំពោះករណីនាំចូលសារធាតុញៀនដែលពាក់ព័ន្ធនឹងថ្នាំញៀននោះ ក្រសួងមិនទាន់ពិនិត្យនៅឡើយទេ។
លោកថា៖ «សូមជម្រាបថា កាតព្វកិច្ចសំខាន់បំផុតរបស់ស្ថាប័នពាក់ព័ន្ធហ្នឹង គឺស្ថិតនៅក្នុងដៃរបស់អគ្គនាយកគយនិងរដ្ឋាករដែលជាអ្នកធ្វើកិច្ចការងារនេះផ្ទាល់នៅតាមច្រកព្រំដែន»។
អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម មានប្រសាសន៍ថា កន្លងមក ការនាំទំនិញគីមី និងទំនិញជាប់កម្រិតកំណត់មួយចំនួនចូលកម្ពុជា មិនមែនអគ្គនាយកគយជាអ្នកសម្រេចឱ្យនាំចូលនោះទេ ប៉ុន្តែក្រសួងជំនាញជាអ្នកផ្ដល់អាជ្ញាបណ្ណឱ្យ ទើបខាងគយអនុញ្ញាតជាក្រោយ។
លោកថា៖ «តាមមុខទំនិញ ដោយទំនិញខ្លះគ្រប់គ្រងដោយក្រសួងឧស្សាហកម្ម ទំនិញខ្លះគ្រប់គ្រងដោយក្រសួងពាណិជ្ជកម្ម ហើយទំនិញខ្លះគ្រប់គ្រងដោយសុខាភិបាល ឬក្រសួងរ៉ែ អ៊ីចឹងទៅ។ យើងមានអនុក្រឹត្យមួយ អនុក្រឹត្យ១៧ ស្ដីពីការទំនិញជាប់អាយ័ត្នហ្នឹង។ ទំនិញជាប់អាយ័ត្នហ្នឹង គឺជាទំនិញទាំងឡាយ មុននឹងនាំចូល ត្រូវមានអាជ្ញាបណ្ណពីក្រសួងជំនាញ។ អគ្គនាយកគយ និងរដ្ឋាករ មិនអនុញ្ញាតឱ្យនាំចូលទេ បើសិនជាមិនមានអាជ្ញាបណ្ណ ឬលិខិតអនុញ្ញាតពីក្រសួងដែលទទួលខុសត្រូវក្នុងការចេញអាជ្ញាបណ្ណហ្នឹង»។
នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី ចាត់ទុកការចេញបញ្ជារបស់លោក ស ខេង ជាសញ្ញាវិជ្ជមានមួយក្នុងការទប់ស្កាត់បទល្មើសគ្រឿងញៀន ខណៈគ្រឿងញៀនកំពុងបង្កផលប៉ះពាល់ធ្ងន់ធ្ងរដល់សង្គម។ ប៉ុន្តែលោកថា សាររបស់រដ្ឋមន្ត្រីក្រសួងមហាផ្ទៃអាចនឹងធ្វើឱ្យប្រជាពលរដ្ឋបាត់បង់ជំនឿបន្ថែមទៀតលើរដ្ឋាភិបាល បើសិនមន្ត្រីមិនអាចចាប់ខ្លួនអ្នកពាក់ព័ន្ធយកមកផ្ដន្ទាទោសបានទេនោះ។
លោក ប៉ិច ពិសី មានប្រសាសន៍ថា៖ «ក្នុងន័យថា យើងត្រូវរកឫសគល់បញ្ហាហ្នឹងឱ្យឃើញ ហើយអ្នកពាក់ព័ន្ធទាំងអស់ដែលជាប់ពាក់ព័ន្ធហ្នឹង រកឱ្យឃើញជាសំណាញ់។ ហើយបើសិនជាមានការពាក់ព័ន្ធជាមួយមន្ត្រីធំៗ អ្នកមានសែស្រឡាយអ្នកមានអី យើងមិនគួរលើកលែង អាហ្នឹងបានដោះស្រាយបញ្ហាបាន» ។
បើតាមអាជ្ញាធរប្រយុទ្ធប្រឆាំងគ្រឿងញៀន ប្រាប់វីអូឌីកាលពីថ្ងៃទី២ ខែមករា ឆ្នាំ២០២២ ថាការបង្ក្រាបបទល្មើសគ្រឿងញៀនកាលពីឆ្នាំ២០២១ សមត្ថកិច្ចចាប់ជនល្មើសបាន១២ ០០០នាក់ ក្នុងនោះ ៣០% ជាអ្នកប្រើប្រាស់ និង ៧០% ជាអ្នកប្រព្រឹត្តបទល្មើសគ្រឿងញៀន ដូចជា ជួញដូរ រក្សាទុក និងដាំដុះ ខណៈគ្រឿងញៀនសមត្ថកិច្ចរឹបអូសបានជាង៤តោន។ ចំនួនគ្រឿងញៀនដែលបង្ក្រាបបាននៅឆ្នាំ២០២១ បើធៀបកាលពីឆ្នាំ២០២០ មានការកើនឡើងប្រហែល ៣០%៕
កែតម្រូវ៖ […] សារធាតុញៀនជាង៣០០តោន […] ទៅជា […] សារធាតុញៀនជាង១០០តោន […]
