រដ្ឋាករស្វយ័តដឹកជញ្ជូនសាធារណៈរថយន្តក្រុង (City-Bus) រាជធានីភ្នំពេញ ហៅអ្នកបើកបររថយន្តក្រុងសាធារណៈម្នាក់ទៅធ្វើការអប់រំនិងពង្រឹងសុជីវធម៌ឡើងវិញ បន្ទាប់ពីអ្នកបើកបររូបនេះបានបង្កជម្លោះជាមួយអ្នកបើកបរម៉ូតូមួយគ្រឿង។
សេចក្ដីប្រកាសព័ត៌មានរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង (City-Bus) រាជធានីភ្នំពេញ ចុះថ្ងៃទី២៦ ខែមករា បានចាត់ទុកទង្វើនិងកាយវិការគ្មានសុជីវធម៌របស់អ្នកបើកបររថយន្តក្រុងរបស់រដ្ឋឈ្មោះ ម៉ៅ សុផល ថាបានធ្វើឱ្យប៉ះពាល់ដល់កិត្តិយសអង្គភាពបម្រើសេវាដឹកជញ្ជូនសាធារណៈ ជាពិសេសបានធ្វើឱ្យប៉ះពាល់ដល់សេចក្ដីថ្លៃថ្នូរសុជីវធម៌សម្រាប់អ្នកបើកបររថយន្តក្រុងរបស់រដ្ឋាករដទៃទៀត។
សេចក្ដីប្រកាសព័ត៌មានដដែលបានរៀបរាប់ថា ការឈ្លោះប្រកែកគ្នារវាងអ្នកបើកបរម៉ូតូ និងអ្នកបើកបររថយន្តក្រុងសាធារណៈ ឈ្មោះ ម៉ៅ សុផល កាលពីថ្ងៃទី២៥ ខែមករា ឆ្នាំ២០២២ បានកើតឡើងដោយសារអ្នកបើកបររថយន្តក្រុងបានស៊ីផ្លេទៅលើអ្នកបើកបរម៉ូតូដែលកំពុងបើកបរនៅលើទ្រូងផ្លូវដែលជាគន្លងសម្រាប់រថយន្តធ្វើចរាចរណ៍ ដែលបានធ្វើឱ្យភាគីខាងម៉ូតូមានការខឹងសម្បាក៏ជិះតាម និងប្រើពាក្យសម្ដីប្រមាថមើលងាយមួយចំនួនលើអ្នកបើកបររថយន្តក្រុង។ នៅពេលនោះ អ្នកបើកបររថយន្តក្រុងក៏ទប់អារម្មណ៍ខឹងពុំបាន ក៏ឈ្លោះប្រកែកគ្នារកឈ្នះចាញ់រៀងៗខ្លួន ដោយប្រើកាយវិការនិងពាក្យសម្ដីមិនសមរម្យ។
យ៉ាងណាក្ដី រដ្ឋាករស្វយ័តបានអំពាវនាវឱ្យពលរដ្ឋអ្នកបើកបរម៉ូតូទាំងឡាយទុកគន្លងផ្លូវរថយន្តក្រុងសាធារណៈធ្វើចរាចរណ៍ ដើម្បីចៀសវាងគ្រោះថ្នាក់កើតឡើងជាយថាហេតុ។
ពលរដ្ឋរស់នៅរាជធានីភ្នំពេញម្នាក់ លោក យ៉ែម វិរោធ និយាយថា តាមការសង្កេតរបស់លោកបច្ចុប្បន្ន គឺពុំមានការគោរពគន្លងធ្វើចរាចរណ៍នោះទេ ដោយអ្នកបើកបរម៉ូតូខ្លះបានជិះលើគន្លងផ្លូវរបស់រថយន្ត ខណៈរថយន្តខ្លះក៏ជិះលើគន្លងរបស់ម៉ូតូដែរ។
លោក យ៉ែម វិរោធ បន្តថា៖ «វាអាចមកពីកង្វះការយល់ដឹងរបស់គាត់ទាក់ទងនឹងរឿងទាំងអស់ហ្នឹង អ៊ីចឹងបើសិនជាអាច យើងគួរតែមានវីដេអូណែនាំខ្លីៗនៅលើបណ្ដាញសង្គមអ៊ីចឹង ឱ្យគាត់បានឃើញពីគុណវិបត្តិនៃការមិនគោរពច្បាប់។ ឧទាហរណ៍ដូចជា ម៉ូតូជិះនៅលើគន្លងឡាន វាមានផលប៉ះពាល់យ៉ាងម៉េច! វាមានលទ្ធផលយ៉ាងម៉េច! ឱ្យគាត់បានឃើញអ៊ីចឹងទៅ គាត់ក៏អាចកាត់បន្ថយការមិនគោរពច្បាប់របស់គាត់បានខ្លះដែរ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា មិនមែនតែម៉ូតូទេដែលជិះលើគន្លងរថយន្ត រថយន្តក៏ជិះលើគន្លងម៉ូតូដែរ។ យ៉ាងណា លោកថា នៅលើដងផ្លូវចំណុចខ្លះមិនមានគន្លង ពោលគឺទទេស្អាត ដែលពិបាកសម្គាល់ថា តើជាផ្លូវរថយន្តឬម៉ូតូ ដោយសារពុំមានគំនូសនិងសញ្ញា ដែលធ្វើឱ្យពិបាកដល់អ្នកធ្វើដំណើរអនុវត្ត។
លោក យង់ គិមអេង មានប្រសាសន៍ថា៖ «ការលើកឡើងជាការល្អ ប៉ុន្តែត្រូវតែរៀបចំលក្ខណៈសម្បត្តិចរាចរណ៍ហ្នឹងឱ្យបានត្រឹមត្រូវ ទី១ គំនូសចរាចរណ៍ ហើយនិងទី២ គឺគ្រប់យានយន្តទាំងអស់ត្រូវតែគោរពដូចគ្នា។ ហើយមិនអ៊ីចឹងទេ ទាល់តែហ៊ានធ្វើការផាកពិន័យឱ្យបានច្បាស់លាស់ អាហ្នឹងក៏អាចជួយជំរុញឱ្យមានការគោរពច្បាប់ចរាចរណ៍ហ្នឹងបានទាំងអស់គ្នាដែរ»។
សូមជម្រាបថា វីដេអូឃ្លីបស្ដីពីការប៉ះពាក្យសម្ដីគ្នារវាងអ្នកជិះម៉ូតូនិងអ្នកបើកបររថយន្តក្រុងសាធារណៈនេះ ត្រូវបានគេចែករំលែកតៗគ្នាយ៉ាងព្រោងព្រាតនៅលើបណ្ដាញសង្គម (Facebook) ដែលបង្ហាញពីការខ្វះខាតសីលធម៌និងការគោរពគ្នាទៅវិញទៅមករវាងអ្នកបើកបរម៉ូតូនិងរថយន្តក្រុងសាធារណៈ៕