រដ្ឋាករស្វយ័តដឹកជញ្ជូនសាធារណៈរាជធានីភ្នំពេញ បានបើកដំណើរការទូកដឹកអ្នកដំណើរតាមផ្លូវទឹកឡើងវិញ បន្ទាប់ពីផ្អាកដំណើរការដោយការរាតត្បាតជំងឺកូវីដ-១៩។
តាមការជូនដំណឹងរបស់រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ បានឱ្យដឹងថា ប្រជាពលរដ្ឋទាំងអស់ដែលមានបំណងចង់ប្រើប្រាស់សេវាដឹកជញ្ជូនតាមផ្លូវទឹក តាមរយៈ Taxi Boat ពីស្ថានីយចំណតសួនឫស្សីកែវ រាជធានីភ្នំពេញ ដល់ស្ថានីយចំណតក្នុងក្រុងតាខ្មៅ ខេត្តកណ្ដាល គឺចំណាយថ្លៃសំបុត្រត្រឹមតែ២ ០០០រៀលប៉ុណ្ណោះក្នុងមួយលើក។
រដ្ឋាករស្វយ័តដឹកជញ្ជូន ក៏បានបញ្ជាក់ផងដែរថា សេវាដឹកជញ្ជូននេះមិនតម្រូវឱ្យបង់ប្រាក់ចំពោះព្រះសង្ឃ ជនពិការ សិស្សនិស្សិត មនុស្សចាស់មានអាយុចាប់ពី៧០ឆ្នាំឡើង កុមារកម្ពស់ក្រោម១ម៉ែត្រ កម្មកររោងចក្រ គ្រូបង្រៀន និងកីឡាករ-កីឡាការិនីឡើយ។
សេវាដឹកជញ្ជូនអ្នកដំណើរតាមផ្លូវទឹកនេះមាន៥ស្ថានីយចំណត រួមមាន ស្ថានីយចំណតផែឫស្សីកែវ ស្ថានីយចំណតផែផ្សារចាស់ ស្ថានីយចំណតផែចតុមុខ ស្ថានីយចំណតផែច្បារអំពៅ និងស្ថានីយចំណតផែតាខ្មៅ ព្រមទាំងមានបុគ្គលិកបម្រើសេវាកម្ម មានបន្ទប់ទឹក និងកៅអីអង្គុយដល់អ្នកដំណើរនៅលើទូកផងដែរ។
គួរបញ្ជាក់ថា សេវាដឹកជញ្ជូនអ្នកដំណើរសាធារណៈតាមផ្លូវទឹកនេះបានផ្អាកជាបណ្ដោះអាសន្ន ចាប់តាំងពីចុងខែមីនា ឆ្នាំ២០២១ ក្រោយមានការឆ្លងរាលដាលជំងឺកូវីដ-១៩ ក្នុងសហគមន៍៕
