និយ័តករទូរគមនាគមន៍កម្ពុជា (ន.ទ.ក.) សហការជាមួយអគ្គស្នងការដ្ឋាននគរបាលជាតិនៃក្រសួងមហាផ្ទៃ ទ.ទ.ក. បានចាត់វិធានការបិទខ្ទប់គេហទំព័រចំនួន ១២៣ ដែលកំពុងធ្វើប្រតិបត្តិការនិងផ្ដល់សេវាល្បែងស៊ីសងអនឡាញ និងល្បែងឆ្នោត ខុសច្បាប់នៅកម្ពុជា។
យោងតាមសេចក្តីប្រកាសព័ត៌មានរបស់និយ័តករទូរគមនាគមន៍កម្ពុជា(ន.ទ.ក.) នៅថ្ងៃទី២៨ ខែមករា នេះ ឱ្យដឹងថា កន្លងមក ខ្លួនក៏ធ្លាប់បានចាត់វិធានការបិទខ្ទប់គេហទំព័រដែលដំណើរការអាជីវកម្មប្រភេទនេះចំនួន ៧៩ រួចមកហើយ។
និយ័តករទូរគមនាគមន៍កម្ពុជា(ន.ទ.ក.) បានបញ្ជាក់ថា នឹងបន្តសហការជាមួយស្ថាប័នពាក់ព័ន្ធដើម្បីលុបបំបាត់រាល់គេហទំព័រដែលប្រតិបត្តិការផ្តល់សេវាល្បែងអនឡាញ និងល្បែងឆ្នោតខុសច្បាប់នៅកម្ពុជា។
នេះជាការអនុវត្តតាមសារាចរណែនាំរបស់រដ្ឋាភិបាលស្តីពីការពង្រឹងការគ្រប់គ្រងអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៊ីនធឺណិតអនឡាញក្នុង និងក្រៅប្រទេសគ្រប់ប្រភេទ៕