ចៅក្រមសាលាដំបូងរាជធានីភ្នំពេញ បានកាត់ទោសសកម្មជនគណបក្សសង្គ្រោះជាតិ និងជាសកម្មជនការពារព្រៃឡង់ លោក វឿន វាសនា ឱ្យជាប់ពន្ធនាគារ២ឆ្នាំ និងពិន័យជាប្រាក់២លានរៀល ក្រោមបទចោទ «ញុះញង់» ដែលបានប្រព្រឹត្តលើបណ្ដាញសង្គម។
ការសម្រេចកាត់ទោសនេះ ធ្វើឡើងបន្ទាប់ពីចៅក្រមសាលាដំបូងរាជធានីភ្នំពេញ លោកស្រី ឈុន ដាវី នៅថ្ងៃព្រហស្បតិ៍នេះ បានបន្តសវនាការលើសំណុំរឿងលោក វឿន វាសនា ហៅ «គ្រញូងព្រៃឡង់» ពាក់ព័ន្ធនឹងការរិះគន់រដ្ឋាភិបាលលើបណ្ដាញសង្គម។
ក្នុងបន្ទប់សវនាការចៅក្រមជម្រះ លោកស្រី ឈុន ដាវី បានសាកសួរលោក វឿន វាសនា ថាតើលោកគិតឃើញអ្វីខ្លះ បន្ទាប់ពីតុលាការបានផ្អាកសវនាការ ខណៈលោកបានបដិសេធចំពោះរបាយការណ៍របស់សមត្ថកិច្ចដែលចាក់បង្ហាញវីដេអូ អំឡុងពេលសវនាការកាលពីថ្ងៃទី២៦ ខែមករា ឆ្នាំ២០២២ កន្លងមក។
ឈរនៅរង្វង់ក្រចកសេះ ក្នុងសម្លៀកបំពាក់ពណ៌ស្លាទុំ និងពាក់ម៉ាស់ លោក វឿន វាសនា សុំមិនឆ្លើយតបចំពោះការសាកសួររបស់ចៅក្រម ដោយសារមិនមានមេធាវីការពារក្ដីចូលរួម។
ក្រោយពីលោក វឿន វាសនា មិនមានអ្វីឆ្លើយតបនោះ ចៅក្រមបានឱ្យតំណាងអយ្យការធ្វើសេចក្ដីសន្និដ្ឋាន និងឱ្យជនជាប់ចោទសំណូមពរចុងក្រោយ។
តំណាងអយ្យការ លោក ម៉ុត ដារ៉ា បានឡើងធ្វើសេចក្ដីសន្និដ្ឋានថា តាមការសួរដេញដោលកាលពីថ្ងៃទី២៦ ខែមករា ឆ្នាំ២០២២ ជនជាប់ចោទ លោក វឿន វាសនា មិនទទួលស្គាល់កំហុសទេ ប៉ុន្តែបើតាមរបាយការណ៍សមត្ថកិច្ចក្នុងអង្គហេតុនោះ គាត់ពិតជាបានញុះញង់និងបំផុសបំផុលប្រាកដមែន។ ករណីនេះ លោកបានស្នើទៅចៅក្រមជម្រះផ្ដន្ទាទោសជនជាប់ចោទឈ្មោះ វឿន វាសនា ទៅតាមច្បាប់។
លោកថា៖ «តាមការសួរដេញដោល ជនជាប់ចោទមិនព្រមទទួលស្គាល់កំហុសទេ ប៉ុន្តែតាមរបាយការណ៍សមត្ថកិច្ចដែលបានបញ្ជាក់នៅក្នុងអង្គហេតុ និងដាក់បង្ហាញវីដេអូកាលពីសប្ដាហ៍មុន បានញុះញង់និងបំផុសបំផុលធ្វើឱ្យប៉ះពាល់ដល់រដ្ឋាភិបាល»។
អំឡុងពេលតំណាងអយ្យការធ្វើសេចក្ដីសន្និដ្ឋាន លោក វឿន វាសនា ដែលជនជាប់ចោទ បានលើកឡើងថា រូបលោកមិនមានអ្វីនិយាយបញ្ជាក់ទៅចៅក្រមទេ ដោយសារលោកមានមេធាវីត្រឹមត្រូវ ប៉ុន្តែតុលាការបែរអត់បានអញ្ជើញមេធាវីការពារក្ដីឱ្យលោកចូលរួមសវនាការទៅវិញ។
ចៅក្រមជម្រះ លោកស្រី ឈុន ដាវី ឆ្លើយតបករណីនេះថា៖ «បើសិនជាតុលាការទទួលបានពាក្យរបស់មេធាវី [សុំការពារក្ដី] តុលាការនឹងអញ្ជើញមេធាវីឱ្យមកចូលរួមសវនាការហើយ ព្រោះតុលាការបានទុករយៈពេលឱ្យលោក១ខែហើយ ប៉ុន្តែពុំមានមេធាវីដាក់ពាក្យមកតុលាការ ដើម្បីកាពារក្ដីទេ»។
តែយ៉ាងណា លោក វឿន វាសនា នៅតែយល់ថា តុលាការមិនបានជូនដំណឹងទៅលោក សំ សុគង់ ដែលលោកថាជាមេធាវីការពារក្ដីឱ្យរូបនោះទេ ខណៈក្នុងដំណាក់កាលចៅក្រមស៊ើបសួរ លោក សំ សុគង់ បានចូលរួមជាមួយដែរ។
លោកថា៖ «ខ្ញុំមានមេធាវី ប៉ុន្តែមកពីតុលាការអត់បានជូនដំណឹងទៅមេធាវីការពារក្ដីខ្ញុំប៉ុណ្ណោះ។ ខ្ញុំសំណូមពរឱ្យចៅក្រមទម្លាក់ចោលបទចោទប្រកាន់ទាំងអស់លើរូបខ្ញុំ។ ខ្ញុំមិនបានធ្វើខុសទេ ខ្ញុំជាបុគ្គលស្អាតស្អំ»។
ក្រោយពីតំណាងអយ្យការធ្វើសេចក្ដីសន្និដ្ឋាន និងឱ្យជនជាប់ចោទសំណូមពរចុងក្រោយរួច លោកស្រី ឈុន ដាវី ចៅក្រមជម្រះ បានសម្រេចសម្រាក១៥នាទី ដើម្បីថយទៅពិចារណាមុននឹងប្រកាសសាលក្រម។
ខណៈចៅក្រមសម្រាកនោះ លោក វឿន វាសនា បាននិយាយមកកាន់អ្នកសារព័ត៌មានវីអូឌីដោយរៀបរាប់ថា លើកទី១ តុលាការបានពន្យារពេលសវនាការម្ដងរួចមកហើយ ខណៈលើកទី២ តុលាការបានបន្តសវនាការដោយមិនមានមេធាវីការពារក្ដីឱ្យលោកចូលរួមទេ រហូតដល់ថ្ងៃទី៣ ខែកុម្ភៈនេះ ដែលជាថ្ងៃតុលាការបើកសវនាការលើកទី៣ ឈានទៅប្រកាសសាលក្រមសម្រេច ក៏មិនមានមេធាវីដែរ។
ទោះបីជាមិនមានមេធាវីការពារសិទ្ធិឱ្យជនជាប់ចោទនោះ ចៅក្រមជម្រះបានសម្រេចផ្ដន្ទាទោសលោក វឿន វាសនា ដាក់ពន្ធនាគារ២ឆ្នាំ ពិន័យប្រាក់២លានរៀល និងបង្គាប់ឱ្យសមត្ថកិច្ចឃុំខ្លួននៅពន្ធនាគារពីបទ «ញុះញង់ឱ្យប្រព្រឹត្តបទល្មើសជាអាទិ៍»។
បន្ទាប់ស្ដាប់ចៅក្រមប្រកាសសាលក្រមរួច លោក វឿន វាសនា ស្រែកថា «អយុត្តិធម៌» និងមិនព្រមផ្ដិតមេដៃទទួលស្គាល់ ដោយថា ខ្លួនមិនបានប្រព្រឹត្តបទល្មើសដូចតុលាការចោទប្រកាន់ឡើយ។ លោកបានហៅតុលាការថា «តុលាការតេឡេ» បន្ទាប់ពីឆ្មាំនាំទៅកាន់ពន្ធនាគារវិញនោះ។
លោកថា៖ «អយុត្តិធម៌សម្រាប់ខ្ញុំណាស់! ខ្ញុំមិនផ្ដិតមេដៃទេ តុលាការតេឡេ»។
លោកមេធាវី សំ សុគង់ មានប្រសាសន៍ថា គាត់បានការពារក្ដីឱ្យលោក វឿន វាសនា ប៉ុន្តែក្នុងសំណុំរឿង «រួមគំនិតក្បត់» ពាក់ព័ន្ធនឹងការគាំទ្រដំណើរវិលត្រលប់របស់លោក សម រង្ស៊ី និងមន្ត្រីបក្សប្រឆាំងផ្សេងទៀត ខណៈសំណុំរឿង «ញុះញង់» នេះ លោកមិនបានការពារក្ដីឱ្យទេ។
លោកថា៖ «ការប្រព្រឹត្តនៅឆ្នាំ២០២១ ទាក់ទងនឹងលោកជំទាវ មូរ សុខហូរ វិលត្រលប់មកប្រទេសខ្មែរវិញ ការផុសតាមហ្វេសប៊ុកគាំទ្រការវិលត្រលប់ និងមួយទៀតពាក់ព័ន្ធនឹងការទិញសញ្ជាតិទិញអីហ្នឹង»។
លោកបន្តថា លោក វឿន វាសនា អាចមិនមែនមានតែសំណុំរឿង «ញុះញង់ឱ្យប្រព្រឹត្តបទល្មើស និងរួមគំនិតក្បត់» ឡើយ។
នាយករងអង្គការឃ្លាំមើលការរំលោភសិទ្ធិមនុស្សលីកាដូ លោក អំ សំអាត យល់ថា ការសម្រេចនេះមិនទាន់មានយុត្តិធម៌ទេសម្រាប់ជនជាប់ចោទ ទោះបីជាសំណុំរឿងរបស់លោក វឿន វាសនា ជាបទមជ្ឈិម ដែលអាចមានមេធាវីបាន ឬអត់មេធាវីបានក្ដី។
លោកបន្តថា ភាពមិនទាន់មានយុត្តិធម៌នោះ ដោយសារគាត់មិនឆ្លើយនឹងសំណួរចៅក្រមដោយអត់មានមេធាវី ប៉ុន្តែការមិនឆ្លើយរបស់គាត់មានភាពវិជ្ជមាននិងអវិជ្ជមាន ខណៈសំណុំរឿងនេះក៏មានពាក់ព័ន្ធនឹងរឿងនយោបាយ ព្រោះការចាប់បញ្ជូនពីថៃមកកម្ពុជាធ្វើឡើងបន្ទាប់ពីគាត់បានរិះគន់រដ្ឋាភិបាលកម្ពុជា។
លោកថា៖ «មកដល់ពេលនេះ សាលក្រមដែលប្រកាសនេះ វាហាក់ដូចបទល្មើស[ស្មើ]នឹង២ឆ្នាំ ហើយបទល្មើសនេះ វាជាអតិបរមា មិនមានការបន្ធូរបន្ថយទេ។ តែយើងឃើញថា ការវិនិច្ឆយនេះ ការកាត់ទោសនេះ វាកម្រិតធ្ងន់ធ្ងរណាស់ ព្រោះអតិបរមាទៅទៀត មិនមានការបន្ធូរបន្ថយ ហើយការផាកពិន័យក៏វាមានកម្រិតធ្ងន់ធ្ងរដែរ។ អ៊ីចឹងបើយើងមានភាពអយុត្តិធម៌ វា២ទៅ៣ នៅក្នុងហ្នឹងរួចទៅហើយ»។
លោក វឿន វាសនា បានភៀសខ្លួនទៅកាន់ប្រទេសថៃ នៅដើមឆ្នាំ២០២០ បន្ទាប់ពីមានការបង្ក្រាបលើអ្នកនយោបាយគណបក្សសង្គ្រោះជាតិដែលត្រូវបានតុលាការរំលាយ។
ប៉ុន្តែលោក វឿន វាសនា ត្រូវបានអាជ្ញាធរថៃចាប់បញ្ជូនខ្លួនពីទីក្រុងបាងកកជាមួយសកម្មជនបក្សប្រឆាំងម្នាក់ទៀត ឈ្មោះ វឿង សំណាង កាលពីថ្ងៃទី៨ ខែវិច្ឆិកា ឆ្នាំ២០២១។
កាលពីខែមេសា ឆ្នាំ២០២១ លោក វឿន វាសនា (ក្រញូងព្រៃឡង់) ត្រូវបានអាជ្ញាធរកម្ពុជាចោទប្រកាន់ពីបទ «ញុះញង់ឱ្យវឹកវរដល់សន្តិសុខសង្គម» តាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា និងមាត្រា១១ នៃច្បាប់ស្ដីពីការប្រយុទ្ធប្រឆាំងនឹងជំងឺកូវីដ-១៩។
នៅថ្ងៃទី៩ ខែតុលា ឆ្នាំ២០២១ លោក វឿន វាសនា បានប្រើគណនីហ្វេសប៊ុកឈ្មោះ «ព្រៃឡង់ ក្រញូង» ចូលទៅបញ្ចេញមតិរិះគន់លោកនាយករដ្ឋមន្ត្រី ហ៊ុន សែន ថាបានដឹកនាំប្រទេសឱ្យមានវិនាសកម្មព្រៃឈើ ការកែច្បាប់រដ្ឋធម្មនុញ្ញ និងការអនុវត្តច្បាប់មិនត្រឹមត្រូវនៅកម្ពុជា រហូតធ្វើឱ្យលោកនាយករដ្ឋមន្ត្រីខឹងសម្បារ និងបានបញ្ជាឱ្យតាមរកចាប់ខ្លួនលោក វឿន វាសនា មកកាត់ទោស៕