ឯកអគ្គរាជទូតអូស្ត្រាលីប្រចាំកម្ពុជា ប្រាថ្នាចង់ឃើញរឿងក្ដីរបស់លោក កឹម សុខា ប្រធានគណបក្សសង្រ្គោះជាតិដែលតុលាការកំពូលរំលាយ ត្រូវបានដោះស្រាយប្រកបដោយតម្លាភាពនិងយុត្តិធម៌ ដើម្បីអាចបើកផ្លូវឱ្យអ្នកនយោបាយចាស់វស្សារូបនេះបានចូលរួមក្នុងជីវភាពនយោបាយជាថ្មីទៀត។
ឯកអគ្គរាជទូតអូស្រ្តាលីប្រចាំកម្ពុជា លោក ប៉ាប្លូ កង់ (Pablo Kang) បានលើកឡើងនៅក្នុងបណ្ដាញសង្គម Twitter របស់លោកនៅថ្ងៃទី៣ ខែកុម្ភៈ ថាអូស្រ្តាលីពិតជាចង់ឃើញរឿងក្ដីរបស់លោក កឹម សុខា នេះត្រូវបានដោះស្រាយឆាប់ៗ ហើយដំណោះស្រាយនយោបាយនេះត្រូវឈរលើគោលការណ៍តម្លាភាពនិងយុត្តិធម៌។
បើតាមលោក ប៉ាប្លូ កង់ (Pablo Kang) នៅក្នុងជំនួបទ្វេភាគីជាមួយលោក កឹម សុខា នៅថ្ងៃទី៣ ខែកុម្ភៈ លោកក៏បានលើកឡើងពីសំណុំរឿងរបស់លោក កឹម សុខា ដែលត្រូវបានអូសបន្លាយពេលដ៏យូរ ហើយកំពុងស្ថិតនៅក្នុងដៃតុលាការនៅឡើយដែរ ខណៈមន្រ្តីស្ថានទូតអូស្រ្តាលីតែងឃ្លាំមើលដោយផ្ទាល់ពីសវនាការដ៏ចាំបាច់មួយនេះជាបន្តបន្ទាប់មក។
Met @KemSokha7 today to discuss his ongoing trial which the Embassy has been attending. 🇦🇺 has consistently called for a transparent, fair and expedited resolution to Kem Sokha’s political situation + emphasising the importance of genuinely contested local elections in 2022 pic.twitter.com/cpaGlt40il
— Pablo Kang 🇦🇺🇰🇭 (@AusEmbPP) February 3, 2022
ក្នុងពេលជាមួយគ្នា នៅលើបណ្ដាញសង្គមហ្វេសប៊ុកផ្លូវការរបស់លោក កឹម សុខា ឯណេះវិញ ក៏បង្ហាញពីជំនួបផ្លូវការរបស់អ្នកទាំងពីរកាលពីថ្ងៃម្សិលមិញដែរ។
ប្រធានគណបក្សប្រឆាំងដែលត្រូវបានរំលាយដោយអំណាចសាលដីកាតុលាការកំពូល បញ្ជាក់ថា អូស្រ្តាលីក្នុងនាមជាប្រទេសម្ចាស់ហត្ថលេខី នៃកិច្ចព្រមព្រៀងសន្តិភាពទីក្រុងប៉ារីសដែរ នឹងនៅតែបន្តតាមដានយ៉ាងដិតដល់ក្នុងរឿងក្ដីរបស់លោក។ ជាងនេះទៀត លោកថា ដំណើរការការទូតកន្លងទៅ និងពេលនេះរបស់អូស្រ្តាលី គឺបញ្ជាក់ពីការឃ្លាំមើលនិងយកចិត្តទុកដាក់ពីសិទ្ធិសេរីភាពនិងយុត្តិធម៌សម្រាប់រូបលោកផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា សាររបស់មន្រ្តីស្ថានទូតនេះគ្រាន់តែជាទស្សនៈនៃការយល់ឃើញរបស់បុគ្គលម្នាក់ៗប៉ុណ្ណោះ ហើយវាក៏មិនជះឥទ្ធិពលអ្វីទៅដល់ដំណើរការរឿងក្ដីរបស់តុលាការទេ។ លោកចាត់ទុកជំហររបស់ឯកអគ្គរាជទូតអូស្រ្តាលីប្រចាំនៅកម្ពុជានៅពលនេះ ថាគ្រាន់តែជាសមានចិត្តរបស់ទូតដែលមានចំពោះលោក កឹម សុខា ដូចបណ្ដាអង្គទូតផ្សេងទៀតធ្លាប់មានប៉ុណ្ណោះ។
លោកបន្តថា៖ «អត់ទេ! អាហ្នឹងវាជារឿងធម្មតាទេ មន្រ្តីការទូតមិនមែនលើកឡើងតែម្ដងណា! លើកឡើងច្រើនដងហើយតើ! ប៉ុន្តែវាមិនមានអ្វីប៉ះពាល់ទៅដល់ដំណើរការកាត់ក្ដី និងនីតិវិធីរបស់តុលាការទេ តុលាការចេះតែទៅមុខហើយ។ អស់លោកទូតដែលមានមនោសញ្ចេតនាជាមួយសាម៉ីជន អាហ្នឹងវាជារឿងមួយដាច់ដោយឡែករបស់គាត់»។
នាយកខុទ្ទកាល័យលោក កឹម សុខា គឺលោក មុត ចន្ថា បដិសេធក្នុងការអត្ថាធិប្បាយជុំវិញជំហររបស់មន្រ្តីស្ថានទូតអូស្រ្តាលីនៅពេលនេះ។ តែយ៉ាងណា លោកថា ជាជំហរនៅក្នុងជំនួបទ្វេភាគីកន្លងទៅ គឺទាំងលោក កឹម សុខា និងមន្រ្តីឯកអគ្គរាជទូត ចង់ឃើញសំណុំរឿងនេះមានភាពជឿនលឿន ហើយឈានទៅបញ្ចប់ឱ្យបានឆាប់។ ជាងនេះទៀត លោកថា គ្រប់ភាគីពាក់ព័ន្ធគួរមានភាពចាស់ទុំផ្នែកនយោបាយ ហើយលើកបញ្ហាមកដោះស្រាយរួមគ្នា ដើម្បីធានាបាននូវប្រជាធិបតេយ្យ និងការគោរពសិទ្ធិមនុស្សពេញលេញ ជាពិសេសជំរុញឱ្យមានសន្តិភាពមួយដ៏ពិតប្រាកដ។
លោកបន្តថា៖ «ប្រជាពលរដ្ឋខ្មែរ និងអ្នកនយោបាយ លោកយល់គ្រប់គ្រាន់ហើយអត្ថន័យហ្នឹង គឺលោកចង់បានដំណោះស្រាយដោយតម្លាភាព ដោយយុត្តិធម៌ ដោយឆាប់រហ័ស ចំពោះស្ថានភាពនយោបាយរបស់ឯកឧត្ដម កឹម សុខា ហ្នឹង។ គឺខ្ញុំថាន័យហ្នឹង គឺច្បាស់លាស់ហើយ។ យើងក៏ចង់បានបែបហ្នឹងដែរ ដើម្បីជាផលប្រយោជន៍ប្រទេសជាតិរបស់យើង»។
លោក ប៉ាប្លូ កង់ (Pablo Kang) ឯកអគ្គរាជទូតអូស្រ្តាលីប្រចាំកម្ពុជា ក៏បានលើកឡើងបន្ថែមទៀតនៅក្នុងបណ្ដាញសង្គម Twitter របស់ខ្លួនផងដែរ ពីភាពចាំបាច់នៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅចំពោះមុខលោក កឹម សុខា ដែលគ្រោងនឹងចាប់ផ្ដើមនៅខែមិថុនា ឆ្នាំ២០២២ខាងមុខនេះ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ យល់ឃើញថា អ្វីដែលប្រទេសម្ចាស់ជំនួយបង្ហាញពីកង្វល់នេះ គឺជាធាតុចូលមួយដ៏សំខាន់ ដែលកម្ពុជាគួរយកទៅពិចារណា។ អ្នកវិភាគរូបនេះថ្លែងថា កម្ពុជាល្មមដល់ពេលដូរឥរិយាបថរបស់ខ្លួនពីភាពព្រងើយកន្តើយចំពោះការរិះគន់ពីសហគមន៍អន្តរជាតិហើយ ដើម្បីចៀសវាងពីភាពអាម៉ាស់នៅលើពិភពលោកក្នុងពេលណាមួយ។
លោកបន្តថា៖ «បើទោះបីជាអន្តរជាតិគេមិនលូកដៃ គេមិននិយាយក្ដី យើងគួរតែដឹងខ្លួន ហើយយើងគួររហ័សបញ្ចប់វា ដើម្បីកុំឱ្យបញ្ហានេះក្លាយទៅជាបញ្ហាមួយដែលអន្តរជាតិអាចលើកនៅក្នុងសេចក្ដីថ្លែងការណ៍ណាមួយ ឬក៏ទីតាំងណាមួយ នៅពេលដែលកម្ពុជានៅលើឆាកអន្តរជាតិនោះ»។
ក្នុងរឿងក្ដីព្រហ្មទណ្ឌប្រឆាំងលោក កឹម សុខា នេះ សាលាដំបូងរាជធានីភ្នំពេញបានបើកសវនាការចំនួន២៩លើកមកហើយ គិតត្រឹមថ្ងៃទី២ ខែកុម្ភៈ ឆ្នាំ២០២២។ ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ គ្រោងនឹងជម្រះក្ដីបន្តទៀត នៅថ្ងៃទី៩ ខែកុម្ភៈ ខាងមុខនេះ។ បញ្ហានេះ ទាំងសហគមន៍ជាតិ និងអន្តរជាតិ រួមទាំងមេធាវីការពារក្ដីឱ្យជនជាប់ចោទនេះផង ចាត់ទុករឿងក្ដីមួយនេះថាជារឿងនយោបាយ ហើយបើឱ្យដោះស្រាយតាមបច្ចេកទេសតុលាការ គឺមិនងាយនឹងដោះស្រាយចប់ទេ។ ប៉ុន្តែទាំងតំណាងអយ្យការ និងមេធាវីដើមបណ្ដឹងរដ្ឋប្បវេណី អះអាងថា ប្រសិនបើចង់ឱ្យសំណុំរឿងនេះដំណើរការបានលឿន គឺជនជាប់ចោទសារភាពថា ខ្លួនមានកំហុសទៅគឺចប់ហើយ៕