អាជ្ញាធររាជធានីភ្នំពេញ បានបញ្ជាឱ្យបុគ្គលិកក្រុមហ៊ុនណាហ្គា វើលដ៍ បញ្ឈប់ការធ្វើកូដកម្មជាបន្ទាន់ និងបានព្រមានចាត់វិធានការផ្លូវច្បាប់លើបុគ្គលណាដែលមិនគោរពតាមវិធានសុខាភិបាល និងវិធានការរដ្ឋបាលរបស់អាជ្ញាធររាជធានីភ្នំពេញ។
សេចក្តីប្រកាសព័ត៌មានរបស់អាជ្ញាធររាជធានីភ្នំពេញចេញផ្សាយនៅយប់ថ្ងៃទី៤ ខែកុម្ភៈ នេះបានឱ្យដឹងថា គណៈកម្មការប្រយុទ្ធនឹងជំងឺកូវីដ-១៩ ថ្នាក់រាជធានីភ្នំពេញបានបញ្ជាឱ្យបុគ្គលិកក្រុមហ៊ុនកាស៊ីណូណាហ្គាវើលដ៍ទាំងអស់ បញ្ឈប់ការប្រមូលផ្តុំធ្វើកូដកម្មនេះជាបន្ទាន់ ដើម្បីទប់ស្កាត់ការឆ្លងរាលដាលជំងឺកូវីដ-១៩ ប្រភេទអូមីក្រុង ឬប្រភេទផ្សេងទៀត ចូលទៅក្នុងសហគមន៍ក្នុងទ្រង់ទ្រាយធំ តាមរយៈការប្រមូលផ្តុំធ្វើកូដកម្មនេះ។
គណៈកម្មការប្រយុទ្ធនឹងជំងឺកូវីដ-១៩ ថ្នាក់រាជធានីភ្នំពេញ បានអំពាវនាវដល់ក្រុមគ្រួសារ និងអ្នកពាក់ព័ន្ធជាមួយកូដករត្រូវទៅយកសំណាកនៅមជ្ឈមណ្ឌលកោះពេជ្រ ខណៈក្រសួងសុខាភិបាលបានទុកពេល៣ថ្ងៃសម្រាប់ការយកសំណាកធ្វើតេស្តរកវីរុសកូវីដ-១៩នេះ។
សេចក្តីប្រកាសព័ត៌មានរបស់អាជ្ញាធររាជធានីភ្នំពេញបានព្រមានថា៖ «ក្នុងករណីដែលបាតុករនៅតែចចេស រឹងរូស បន្តប្រមូលផ្តុំ ដែលជាហេតុបង្កឱ្យមានការឆ្លងរាលដាលជំងឺកូវីដ-១៩ ចូលក្នុងសហគមន៍ជាបន្តបន្ទាប់ទៀតនោះ បុគ្គលបង្កហេតុ ដែលមិនព្រមអនុវត្តវិធានការសុខាភិបាល និងវិធានការរដ្ឋបាល ត្រូវទទួលទោសតាមច្បាប់ ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដោយក្នុងនោះមានការផាកពិន័យ និងទោសដាក់ពន្ធនាគារ ដោយគ្មានការលើកលែងឡើយ»។
ការព្រមាននេះ បានធ្វើឡើងបន្ទាប់ពីក្រសួងសុខាភិបាលបានរកឃើញស្ត្រីមានផ្ទៃពោះជាកូដករម្នាក់បានឆ្លងជំងឺកូវីដ-១៩ ប្រភេទថ្មី «អូមីក្រុង» កាលពីថ្ងៃទី២៨ ខែមករា ឆ្នាំ២០២២។ លើសពីនេះទៀត កាលពីថ្ងៃទី០៣ និងទី០៤ ខែកុម្ភៈ អាជ្ញាធរបានអះអាងថា ក្រសួងសុខាភិបាលបានរកឃើញករណីវិជ្ជមានកូវីដ-១៩ ប្រភេទអូមីក្រុង លើកូដករជាបន្តបន្ទាប់បន្ថែមទៀត។
ប៉ុន្តែស្ត្រីដែលក្រសួងសុខាភិបាលថា បានឆ្លងជំងឺកូវីដ-១៩ នោះ បានចេញមកអះអាងថា អ្នកស្រីមិនបានឆ្លងជំងឺកូវីដ-១៩នេះពីកន្លែងធ្វើកូដកម្មរបស់បុគ្គលិកក្រុមហ៊ុនណាហ្គាវើលដ៍ដូចការប្រកាសរបស់ក្រសួងសុខាភិបាលឡើយ។ ស្ត្រីរូបនេះ បានអះអាងថា អ្នកស្រីបានខកខានទៅចូលរួមធ្វើកូដកម្មជាមួយបុគ្គលិកក្រុមហ៊ុនណាហ្គាវើលដ៍ ចាប់តាំងពីថ្ងៃទី១៥ ខែមករាមក ហើយនៅថ្ងៃទី២៨ ខែមករា ទើបអ្នកស្រីធ្វើតេស្តរកឃើញជំងឺកូវីដ-១៩។
មន្ត្រីក្រសួងសុខាភិបាល នៅល្ងាចថ្ងៃទី៤ ខែកុម្ភៈនេះ បានចុះទៅយកសំណាកក្រុមកូដករណាហ្គាវើលដ៍ដល់ទីកន្លែងតវ៉ា ក្បែរក្រុមហ៊ុនណាហ្គាវើលដ៍ផងដែរ ក៏ប៉ុន្តែតំណាងកូដករបានស្នើសុំទៅធ្វើនៅថ្ងៃស្អែកវិញ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សរបស់អង្គការសង់ត្រាល់ លោក ឃុន ថារ៉ូ បានប្រាប់ វីអូឌី កាលពីរសៀលថ្ងៃសុក្រថា សេចក្ដីប្រកាសព័ត៌មានរបស់ក្រសួងសុខាភិបាលហាក់មានភាពមិនប្រក្រតី ដោយសារចន្លោះថេរវេលាវិធានសុខាភិបាលនៃការធ្វើតេស្តលើស្ត្រីម្នាក់ដែលឆ្លងកូវីដ-១៩ និងការស្វែងរកអ្នកពាក់ព័ន្ធ មានគម្លាតយូរខុសពីធម្មតា ស្របពេលក្រសួងប្រើខ្លឹមសារផ្លូវច្បាប់ព្រមានលើអ្នកតវ៉ា ក្នុងករណីពួកគេមិនទៅធ្វើតេស្តតាមការប្រកាស។
លោក ថារ៉ូ ថា៖ «ខ្ញុំគិតថា វាអាចជាទម្រង់នៃការគំរាមកំហែងមួយផ្នែកផ្លូវអារម្មណ៍របស់ពួកគាត់ ហើយ[ខ្លឹមសារនៃ]ការអនុវត្តនោះទៀតសោត ក៏មើលទៅមិនមានលក្ខណៈស្មើភាពគ្នាក្នុងការអនុវត្តករណីវិធានការគ្រប់គ្រងនិងទប់ស្កាត់នូវវីរុសចម្លងថ្មី»។
បុគ្គលិកក្រុមហ៊ុនកាស៊ីណូណាហ្គាវើលដ៍ជិត១ ០០០នាក់ បានធ្វើកូដកម្មអស់រយៈពេលជិត៥០ថ្ងៃមកហើយ ដើម្បីទាមទារឱ្យដោះលែងតំណាងរបស់ពួកគេ ៨នាក់ ពីពន្ធនាគារ និងទាមទារឱ្យដោះស្រាយវិវាទការងារនៅក្នុងក្រុមហ៊ុនល្បែងមួយនេះដែលបានអូសបន្លាយអស់រយៈពេលជិតមួយឆ្នាំមកហើយ៕