រដ្ឋាភិបាលបានកាត់ផ្ទៃបឹងតាមោកចំនួន៤២៥ ហិកតាបន្ថែមទៀត ប្រគល់ឱ្យឧកញ៉ា និងគ្រួសារឧត្ដមសេនីយ៍ផ្កាយពីរនៅអង្គភាព“ង៧០” បន្ថែមទៀត ដែលធ្វើឱ្យចំនួនផ្ទៃបឹងតាមោកដែលត្រូវបានកាត់និងកំពុងចាក់ដីលុបមានទំហំជាង២ ០០០ ហិកតាហើយ។
អនុក្រឹត្យដាច់ដោយចំនួន ៤ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៧ ខែវិច្ឆិកា ឆ្នាំ២០២១កន្លងមក បានកាត់ដីផ្ទៃបឹងតាមោកចំនួន១៨០ ហិកតា (១.៨០៧.៥៩៧ ម៉ែត្រក្រឡា) ស្ថិតនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ប្រគល់ឱ្យលោកស្រី អ៊ុំ បុប្ឆា ខណៈផ្ទៃដីចំនួន ៦៥ ហិកតា (៦៥៤.៩៣៤ ម៉ែត្រក្រឡា) ស្ថិតនៅសង្កាត់សំរោង ខណ្ឌព្រែកព្នៅ រាជធានីភ្នំពេញ ប្រគល់ឱ្យលោកស្រី ឈូ សុខយូ។
អនុក្រឹត្យដដែល ក៏បានកាត់ដីផ្ទៃបឹងតាមោកចំនួន១០០ ហិកតា (១.០០០.១៦៨ ម៉ែត្រក្រឡា)ស្ថិតនៅសង្កាត់គោករកា សង្កាត់ពញាពន់ និងសង្កាត់សំរោង ខណ្ឌព្រែកព្នៅ ប្រគល់ឱ្យលោកស្រី ជឹង ធានសេង ហើយដីបឹងចំនួន១៥៥ ហិកតា (១.៥៥៣.៨៣២ ម៉ែត្រក្រឡា)ទៀត ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ប្រគល់ឱ្យលោក កុក អាន ដោយពន្ធ និងអាករផ្សេងៗជាបន្ទុករបស់រដ្ឋ។
ចំណែកនៅខែធ្នូ ឆ្នាំ២០២១ លោកនាយករដ្ឋមន្ត្រី ហ៊ុន សែន ក៏បានកាត់ដីផ្ទៃបឹងតាមោកចំនួន ៣ ហិកតា ស្ថិតនៅក្នុងសង្កាត់ពញាពន់ ខណ្ឌព្រែកព្នៅ ប្រគល់ទៅឱ្យគណៈកម្មាធិការជាតិរៀបចំការបោះឆ្នោត(គ.ជ.ប) និងដីផ្ទៃបឹងតាមោកចំនួន ៧៥ ហិកតាដែលនៅទីតាំង ៤ ស្ថិតក្នុងសង្កាត់សំរោង សង្កាត់ពញាពន់ និងសង្កាត់គោករកា ខណ្ឌព្រែកព្នៅ រាជធានីភ្នំពេញ ប្រគល់ទៅឱ្យលោកស្រីសាយ សោភា ដើម្បីធ្វើជាកម្មសិទ្ធិ។
លោកឧកញ៉ា ជឹង ធានសេង ត្រូវបានគេស្គាល់ថា ជាត្រូវប្អូនរបស់លោកស្រី ជឹង សុភាព ហៅយាយភូ ខណៈឧកញ៉ា កុក អាន គឺជាសមាជិកព្រឹទ្ធសភាគណបក្សប្រជាជនកម្ពុជា។ ចំណែកលោកស្រី សាយ សោភា ដែលជាអគ្គនាយិកាសាលាអន្តរជាតិ វើលដ៍កម្ពុជា និងជាភរិយារបស់ឧត្ដមសេនីយ៍ផ្កាយពីរនៅអង្គភាព “ង៧០” លោក ភឿន ផល្លា ដែលគិតមកដល់ថ្ងៃនេះ លោកស្រី សាយ សោភា ទទួលបានផ្ទៃដីបឹងតាមោកសរុបជាង ១០០ ហិកតា។
ប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន មានប្រសាសន៍ថា រដ្ឋាភិបាលកាត់ដីផ្ទៃបឹងតាមោកឱ្យក្រុមហ៊ុនឯកជននិងឧកញ៉ា អាចបណ្ដាលមកពីប្រជាពលរដ្ឋដែលអាស្រ័យផលនៅទីតាំងនោះលក់ទៅក្រុមហ៊ុនឯកជននិងឧកញ៉ាទាំងនោះ។ ដីមួយផ្នែកទៀត ដែលរដ្ឋាភិបាលកាត់ប្រគល់ឱ្យក្រសួង ដើម្បីឱ្យស្ថាប័នទាំងនោះ សាងសងអគារសម្រាប់ធ្វើការឱ្យបានត្រឹមត្រូវតែប៉ុណ្ណោះ។
លោកថា៖ «ជួនកាលឯកជននោះទិញពីប្រជាពលរដ្ឋដែលលោកប្រើប្រាស់ ដែលយើងឆ្វៀលទៅឱ្យហ្នឹងទៅ ដែលប្រជាពលរដ្ឋប្រើប្រាស់លក់ទៅឱ្យឯកជន ហើយឯកជនមានសិទ្ធិកាន់កាប់ប្រើប្រាស់នៅលើដីហ្នឹង។ នៅលើដីរបស់ប្រជាពលរដ្ឋក្លាយជាដីរបស់ឯកជន យើងអត់ដឹងឯកជនណាខ្លះទទួលបានដីហើយ ហើយដីនៅកន្លែងចំពោះខ្ញុំអត់ដឹងទេ»។
អគ្គលេខាធិការរងនៃគណៈកម្មាធិការជាតិរៀបចំការបោះឆ្នោតហៅកាត់ គ.ជ.ប លោក សោម សូរីដា បញ្ជាក់ថា ដី ៣ ហិកតាដែលរដ្ឋាភិបាលផ្ដល់ឱ្យនេះ ដើម្បីសាកសងអគារ គ.ជ.ប ថ្មី ខណៈអគារចាសបច្ចុប្បន្ន លោកមិនទាន់ដឹងថា នឹងយកទៅណាទេ ដោយអាស្រ័យលើការសម្រេចរបស់រដ្ឋាភិបាល និងប្រធាន គ.ជ.ប។
លោកថា៖ «អគារចាស់នេះ ដោយសារនៅជិតណាហ្គាទី២ ដើម្បីការងារសន្តិសុខសុវត្ថិភាព សណ្ដាប់ធ្នាប់ គ.ជ.ប ជាពិសេសគោលការណ៍នៃដំណើរការអនុវត្តរបស់គ.ជ.ប អ៊ីចឹង គ.ជ.ប គ្រោងនឹងទៅនៅតំបន់ដែលមានសុវត្ថិភាព»។
បឹងតាមោកមានផ្ទៃដីសរុប ៣ ២៣៩ ហិកតា ជាអាងស្ដុកទឹកកខ្វក់និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បតិ្តសាធារណៈរបស់រដ្ឋ។
ប៉ុន្តែបើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោកសរុបជាង២ ០០០ ហិកតាហើយ ត្រូវបានរដ្ឋាភិបាលកាត់ ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជន ដែលគេដឹងថា ជាអ្នកមានប្រាក់និងមានអំណាច សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន។
ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការសមាគមធាងត្នោតលោក ស៊ាង មួយឡៃ បានប្រាប់វីអូឌីកាលពីថ្ងៃទី២០ ខែមករា ឆ្នាំ២០២២ថា បើសិនជាបឹងធម្មជាតិត្រូវបានកាត់ និងលុបជាបន្តបន្ទាប់ទៀតនោះ រាជធានីភ្នំពេញប្រឈមនឹងជំនន់ទឹកភ្លៀង ដោយថា ការសាងសង់ប្រឡាយ ធ្វើប្រព័ន្ធលូមិនអាចដោះស្រាយបញ្ហាទឹកជំនន់ឡើយ កាលណាបើមានភ្លៀងធ្លាក់ច្រើន ឬទឹកធំនៅរដូវវស្សា។
ក្រោយពីមានការកាត់ផ្ទៃដីបឹងតាមោកជាបន្តបន្ទាប់នេះ សកម្មជនយុវជនបរិស្ថាន៣នាក់ រួមមានកញ្ញា ឡុង គន្ធា កញ្ញា ភួន កែវរស្មី និងលោក ថុន រដ្ឋា បាននាំគ្នាធ្វើយុទ្ធនាការដើរថ្មើជើងពីវត្តភ្នំទៅកាន់ផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីសុំអន្តរាគមន៍ឱ្យបញ្ឈប់ការលុបបឹងធម្មជាតិមួយនេះបន្តទៀត។ ប៉ុន្តែ ពួកគេត្រូវបានសមត្ថកិច្ចចាប់ខ្លួនពួកគេ ដោយចោទប្រកាន់ពីបទ «ញុះញង់»។ ក្រោយមកសកម្មជនបរិស្ថានទាំង៣រូប ត្រូវបានដោះលែងវិញ កាលពីថ្ងៃទី៥ ខែវិច្ឆិកា ឆ្នាំ២០២១ ក្រោយសាលាឧទ្ធរណ៍រាជធានីភ្នំពេញកាត់តម្រឹមទោសឱ្យជាប់ពន្ធនាគារ១ ឆ្នាំ២ខែ ចំណែកទោសដែលនៅសល់ត្រូវព្យួរ។
កាលពីថ្ងៃទី៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានថ្លែងថា បញ្ហាទឹកជំនន់ ដែលបង្កឱ្យលិចរាជធានីភ្នំពេញ មិនមែនបណ្ដាលមកពីការលុបបឹងធម្មជាតិនោះទេ ដោយថា កន្លងមក ទោះបីជាមិនលុបបឹង រាជធានីភ្នំពេញក៏មានទឹកជំនន់ដែរ ដែលករណីនេះ លោកថា គួរតែឈប់រិះគន់ពីបញ្ហានេះ។ ផ្ទុយពីអ្វីដែលលោកហ៊ុន សែន អះអាង កាលពីខែឧសភា ឆ្នាំ២០២០ រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានចេញលិខិតមួយដោយព្រមានអំពីគ្រោះមហន្តរាយដោយសារទឹកជំនន់ ក្រោយពីក្រសួងមើលឃើញថា មានការចាក់ដីលុប និងការសាងសង់សំណង់ផ្សេងៗ បិទផ្លូវទឹក និងកន្លែងស្តុកទឹកនានាជាបន្តបន្ទាប់៕
