ប្រភពពីមន្ត្រីសហជីពឱ្យដឹងថា សមត្ថកិច្ចរាជធានីភ្នំពេញបានដោះលែងកូដករណាហ្គាវើលដ៍៣នាក់ឱ្យត្រលប់ទៅផ្ទះវិញហើយនៅយប់ថ្ងៃទី៥ ខែកុម្ភៈនេះ ខណៈ៣នាក់ទៀតបានបន្តឃុំខ្លួននៅស្នងការដ្ឋាននគរបាលរាជធានីភ្នំពេញ ដើម្បីសាកសួរពីបទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ លោក ឃុន ថារ៉ូ បានប្រាប់វីអូឌីតាមដំណឹងចុងក្រោយដែលលោកទើបទទួលបាននៅយប់ថ្ងៃសៅរ៍នេះថា សមត្ថកិច្ចបានឃាត់ខ្លួនកូដករ៣នាក់ រួមមាន លោក សេង វណ្ណារិទ្ធ លោក ជួន ចាន់ណាត និងលោក សៅរ៍ សម្បត្តិ។ ចំណែកកូដករ៣នាក់ទៀត រួមមាន លោកស្រី អ៊ុក សោភ័ណ អ្នកនាង ទូច ដាណែត និងអ្នកនាង ឯម គន្ធា ត្រូវបានដោះលែងមកវិញ។
លោកថា សមត្ថកិច្ចបានឃាត់ខ្លួនពួកគេ នៅពេលកំពុងជិះម៉ូតូកង់បីទៅផ្ទះ ចេញពីកន្លែងធ្វើតេស្តរកកូវីដ-១៩ នៅមជ្ឈមណ្ឌលកោះពេជ្រ។
លោកថា៖ «ក្នុងចំណោម៦នាក់ហ្នឹង មានពីរនាក់ គឺគាត់មានដីកាពីតុលាការ ហើយផ្សេងទៀតហ្នឹង មិនទាន់ឃើញមានដីកាអីទេ ប៉ុន្តែពួកគាត់ហ្នឹងជិះ Tuk Tuk ជាមួយគ្នា។ ពួកគាត់ត្រូវបានចាប់ខ្លួននៅត្រង់ចំណុចស្ពានឥន្ធនូរ នៅពេលដែលពួកគាត់ចេញពីទីតាំងយកសំណាកហ្នឹង»។
ប៉ុន្តែអ្នកនាំពាក្យស្នងការដ្ឋាននគរបាលរាជធានីភ្នំពេញ បានអះអាងប្រាប់ វីអូឌី នៅយប់ថ្ងៃសៅរ៍នេះដែរថា គិតត្រឹមម៉ោង ៧ និង ៣០នាទីយប់ សមត្ថកិច្ចបានឃាត់ខ្លួនកូដករណាហ្គាវើលដ៍តែពីរនាក់ប៉ុណ្ណោះ ទៅតាមដីការបស់អយ្យការអមសាលាដំបូងរាជធានីភ្នំពេញ។
លោកថា៖ «គិតត្រឹមម៉ោង ៧ និង ៣០នាទីហ្នឹង គឺសមត្ថកិច្ចជំនាញយើងបាននាំខ្លួនតែបុរសពីរនាក់ទេ គឺជួប ចាន់ណាត និងសេង វណ្ណារិទ្ធ ទាក់ទងបទរារាំងនៃការអនុវត្តវិធានការប្រយុទ្ធប្រឆាំងកូវីដ១៩ ដោយអនុវត្តតាមដីកាបញ្ជាឱ្យនាំខ្លួនរបស់ព្រះរាជអាជ្ញាអមសាលាដំបូងរាជធានីភ្នំពេញ ដោយយោងទៅលើមាត្រាទី១១នៃច្បាប់ ប្រយុទ្ធប្រឆាំងនឹងជំងឺកូវីដ»។
វីអូឌី បានព្យាយាមទាក់ទងសុំការបញ្ជាក់ពីលោក សាន សុខសីហា ជាថ្មី ប៉ុន្តែមិនមានការឆ្លើយតបនៅឡើយទេ៕