សមត្ថកិច្ចរាជធានីភ្នំពេញបានអះអាងថា ពួកគេកំពុងតាមស្វែងរកកូដករក្រុមហ៊ុនណាហ្គាវើលដ៍ចំនួន ៤នាក់បន្ថែមទៀត ដើម្បីចូលខ្លួនបំភ្លឺពាក់ព័ន្ធរឿងរារាំងដល់ការអនុវត្តវិធានការទប់ស្កាត់ជំងឺកូវីដ-១៩ ខណៈកូដករ៣នាក់ទៀតដែលត្រូវបានឃាត់ខ្លួនកាលពីម្សិលមិញនៅមិនទាន់ត្រូវបានដោះលែងនៅឡើយ។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានជម្រាបទៅសារណជន តាមរយៈទំព័រហ្វេសប៊ុកស្នងការដ្ឋានគរបាលរាជធានីភ្នំពេញនៅថ្ងៃអាទិត្យនេះថា កាលពីវេលាម៉ោងជាង ៧យប់ ថ្ងៃទី០៥ ខែកុម្ភ: ឆ្នាំ២០២២ សមត្ថកិច្ច បានធ្វើការនាំខ្លួនកូដករណាហ្គាវើលដ៍ចំនួន៣នាក់។ កូដករទាំងនោះ រួមមានឈ្មោះ ជួប ចាន់ណាត ឈ្មោះ សេង វណ្ណរិទ្ធ និងឈ្មោះ សៅ សម្បត្តិ តាមដីកាបញ្ជាឱ្យចូលខ្លួនរបស់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ពាក់ព័ន្ធករណីរារាំងដល់ការអនុវត្តវិធានការទប់ស្កាត់ជំងឺកូវីដ-១៩ ដោយយោងលើមាត្រាទី១១ នៃច្បាប់ប្រយុទ្ធប្រឆាំងកូវីដ។
ជាមួយគ្នានេះ សមត្ថកិច្ចកំពុងតាមស្វែងរកកូដករចំនួន ៤នាក់ផ្សេងទៀត ដើម្បីចូលខ្លួនបំភ្លឺជុំវិញបញ្ហានេះដែរ ដោយអ្នកទាំងនោះជាស្ត្រីទាំងអស់ រួមមានឈ្មោះ ខេង ចិន្តា ឈ្មោះ អ៊ុក សុភ័ក្រម៉ូលីកា ឈ្មោះ ម៉េង កាក់នីកា និងឈ្មោះ អេង ស្រីបូ។
ទំព័រហ្វេសប៊ុករបស់ស្នងការដ្ឋាននគរបាលរាជធានីភ្នំពេញសរសេរថា៖ «រហូតមកដល់ពេលនេះ សមត្ថកិច្ចនៃស្នងការដ្ឋាននគរបាលរាជធានីភ្នំពេញ កំពុងតែខិតខំអនុវត្តដីការបញ្ជាឱ្យចូលខ្លួនរបស់ព្រះរាជអាជ្ញាអមសាលាដំបូងរាជធានីភ្នំពេញ ពាក់ព័ន្ធករណីរារាំងដល់អនុវត្តវិធានការទប់ស្កាត់ជំងឺកូវីដ១៩ ដោយយោងលើមាត្រា១១ នៃច្បាប់ប្រឆាំងកូវីដ» ។
ក្នុងដីកាបង្គាប់ឱ្យចូលខ្លួនរបស់ព្រះរាជអាជ្ញារងអមសាលាដំបូងរាជធានីភ្នំពេញ លោក សេង ហៀង កាលពីម្សិលមិញចំនួន ៤ដាច់ដោយឡែកពីគ្នា បានតម្រូវឱ្យកូដករទាំង ៤នាក់នេះ ត្រូវចូលខ្លួនបំភ្លឺឱ្យបានមុនថ្ងៃទី១៩ ខែកុម្ភៈ ឆ្នាំ២០២២ ដើម្បីសាកសួរអំពីដំណើររឿង «រារាំងដល់ការអនុវត្តវិធានការ»។
កូដករក្រុមហ៊ុនណាហ្គាវើលដ៍ម្នាក់ ដែលមានឈ្មោះក្នុងដីកាបញ្ជាឱ្យចូលខ្លួននោះឈ្មោះ ម៉េង កាក់នីកា បានចេញវីដេអូផ្សាយផ្ទាល់ ឬឡាយនៅបណ្តាញសង្គមហ្វេសប៊ុកដោយអះអាងថា នាងបានមកធ្វើតេស្ត ឬយកសំណាករកមេរោគកូវីដ-១៩ នៅមជ្ឈមណ្ឌលកម្សាន្តកោះពេជ្រនារសៀលថ្ងៃទី៦ ខែកុម្ភៈ នេះដែរ។
នាងភ្ញាក់ផ្អើលក្រោយឃើញដីកាបញ្ជាឱ្យចូលខ្លួននេះ ដោយថានាងមិនបានញុះញង់ ឬរារាំងកូដករផ្សេងទៀតមិនឱ្យទៅធ្វើតេស្តតាមការចោទប្រកាន់នោះឡើយ។
នាងអះអាងក្នុងវីដេអូផ្សាយផ្ទាល់ថា៖ «ខ្ញុំអត់មានញុះញង់អីទេ។ ខ្ញុំក៏ជាអ្នកកូដករមួយ(ម្នាក់) មកចូលរួមធ្វើសំណាក ធ្វើតេស្ត ចូលរួមជាមួយក្រសួងសុខាភិបាលដែរ។ ចាស៎! ខ្ញុំអត់មានពាក្យអីទៀតទេ ព្រោះអីខ្ញុំមិនមែនអ្នកញុះញង់អីផងហ្នឹង ហើយខ្ញុំនៅហ្នឹងអង្គុយធ្វើតេស្តជាមួយបងប្អូនយើងទាំងអស់គ្នានៅហ្នឹងដែរនេះ។ ហើយញុះញង់អី?»។
ប្រភពដដែលបញ្ជាក់ទៀតថា កាលពីយប់ថ្ងៃទី ៤ខែកុម្ភៈ ក្រុមកូដករបានស្នើឱ្យមន្ត្រីជំនាញពន្យារពេលក្នុងការចូលធ្វើតេស្តរកមេរោគកូវីដ-១៩ ដោយស្នើធ្វើនៅថ្ងៃទី៥ ខែកុម្ភៈ តែប៉ុណ្ណោះ មិនបានញុះញង់ ឬរារាំងការអនុវត្តវិធានការសុខាភិបាលអ្វីនោះឡើយ។
នៅព្រឹកថ្ងៃអាទិត្យនេះ សកម្មភាពធ្វើតេស្តសំណាករកមេរោគកូវីដ-១៩ ទៅលើកូដករណាហ្គាវើលដ៍បានធ្វើឡើងក្នុងភាពស្ងប់ស្ងាត់ត្បិតមិនសូវមានអ្នកទៅធ្វើតេស្តនោះទេ ប៉ុន្តែរហូតដល់រសៀលថ្ងៃដដែលនេះក៏មានកូដករជាច្រើននាំគ្នាទៅធ្វើតេស្តរកមេរោគកូវីដ-១៩ ក្រោមការឃ្លាំមើលពីសមត្ថកិច្ច មន្ត្រីជំនាញ ព្រមទាំងអង្គការជាតិ និងអន្តរជាតិមួយចំនួនផងដែរ។
ភាពចម្រូងចម្រាសនៃការធ្វើតេស្តរកមេរោគសកលនេះ ស្របពេលដំណោះស្រាយវិវាទការងារក្រុមហ៊ុនល្បែងមួយនេះមិនទាន់មានដំណោះស្រាយផងនោះ សមត្ថកិច្ចរាជធានីភ្នំពេញកាលពីល្ងាចម្សិលមិញ បានឃាត់ខ្លួនកូដករក្រុមហ៊ុនណាហ្គាវើលដ៍ ៦នាក់ ដើម្បីសាកសួរក្រោមការចោទថាពួកគេ រារាំងដល់ការអនុវត្តវិធានការប្រយុទ្ធជំងឺកូវីដ-១៩ ប៉ុន្តែកូដករ ៣នាក់ត្រូវបានដោះលែងវិញនៅយប់ថ្ងៃដដែលនោះ។
កាលពីថ្ងៃទី៤ខែកុម្ភៈ គណៈកម្មការប្រយុទ្ធនឹងជំងឺកូវីដ-១៩ រាជធានីភ្នំពេញ បានអំពាវនាវដល់ក្រុមគ្រួសារ និងអ្នកពាក់ព័ន្ធជាមួយកូដករណាហ្គាវើលដ៍ត្រូវទៅយកសំណាកនៅមជ្ឈមណ្ឌលកម្សាន្តកោះពេជ្រ ខណៈក្រសួងសុខាភិបាលបានទុកពេល ៣ថ្ងៃសម្រាប់ការយកសំណាកធ្វើតេស្តរកវីរុសកូវីដ-១៩នេះ៕