អាជ្ញាធររាជធានីភ្នំពេញ បានដាក់ចេញវិធានការមួយចំនួនទៅលើក្រុមកូដករណាហ្គាវើលដ៍ និងបានព្រមានចាត់វិធានការច្បាប់ទៅលើពួកគេក្នុងករណីមិនអនុវត្តតាម ក្រោយពីក្រសួងសុខាភិបាលរកឃើញមានឆ្លងជំងឺកូវីដ-១៩ បំប្លែងថ្មីប្រភេទ «អូមីក្រុង» ជាបន្តបន្ទាប់ក្នុងចំណោមកូដករដែលកំពុងធ្វើការតវ៉ា។
ក្នុងសេចក្ដីណែនាំចុះថ្ងៃទី៦ ខែមករា ឆ្នាំ២០២២ រដ្ឋបាលរាជធានីភ្នំពេញ បានឱ្យដឹងថា រយៈពេល១ថ្ងៃ គឺនៅថ្ងៃទី៦ ខែកុម្ភៈ ម្សិលមិញ ក្រុមគ្រូពេទ្យបានរកឃើញកូដករណាហ្គាវើលដ៍ចំនួន២៩នាក់ វិជ្ជមានជំងឺកូវីដ-១៩ បំប្លែងថ្មីប្រភេទ «អូមីក្រុង» ដោយថាចំនួននេះជាចំនួនដ៏ច្រើន និងគួរឱ្យព្រួយបារម្ភយ៉ាងខ្លាំងចំពោះសុខភាពរបស់ពួកគេ និងការឆ្លងរាលដាលបន្ត។
សេចក្ដីណែនាំដដែលបន្តថា ដើម្បីថែរក្សាអាយុជីវិតក្រុមកូដករនិងក្រុមគ្រួសារ រួមទាំងចៀសវាងការឆ្លងរាលដាលក្នុងសហគមន៍ជាទ្រង់ទ្រាយធំ រដ្ឋបាលរាជធានីភ្នំពេញតម្រូវឱ្យក្រុមកូដករដែលមិនទៅយកសំណាក និងអ្នកពាក់ព័ន្ធផ្សេងទៀតត្រូវទៅយកសំណាកតេស្តរកជំងឺកូវីដ-១៩ជាដាច់ខាត។
រដ្ឋបាលរាជធានីភ្នំពេញ បញ្ជាក់ថា ក្រោយយកសំណាករួច ក្រុមកូដករនិងអ្នកជាប់ពាក់ព័ន្ធដោយផ្ទាល់ឬប្រុយោល ត្រូវធ្វើចត្តាឡីស័ករយៈពេល៧ថ្ងៃ និងបញ្ឈប់ការប្រមូលផ្ដុំតវ៉ា ដោយអនុវត្តតាមវិធានការសុខាភិបាល ហើយព្រមានចាត់វិធានការច្បាប់ក្នុងករណីមិនអនុវត្តតាម។
រដ្ឋបាលរាជធានីភ្នំពេញ ក៏បានបញ្ជាឱ្យមន្ទីរការងាររាជធានីភ្នំពេញ សហការជាមួយរដ្ឋបាលខណ្ឌទាំង១៤ តាមដានឃ្លាំមើលនិងចាត់វិធានការនៅតាមទីតាំងស្នាក់នៅរបស់ក្រុមកូដករនៅតាមមូលដ្ឋាននីមួយៗផងដែរ ដូចជាដាស់តឿនឱ្យពួកគេនិងអ្នកពាក់ព័ន្ធត្រូវទៅយកសំណាកឱ្យទាន់ពេលវេលា និងធ្វើចត្តាឡីស័កឱ្យបានត្រឹមត្រូវជាដើម។
សេចក្ដីណែនាំនេះក៏បញ្ជាឱ្យអាជ្ញាធររាជធានីភ្នំពេញដែលពាក់ព័ន្ធ ចាត់វិធានការរដ្ឋបាលនិងវិធានការច្បាប់ចំពោះបុគ្គលទាំងឡាយណាដែលបន្តប្រមូលផ្ដុំឬជួបប្រជុំដោយមិនគោរពតាមវិធានការសុខាភិបាល ហើយបង្ករការរាំងស្ទះដល់ការបំពេញការងាររបស់ក្រុមគ្រូពេទ្យនិងអាជ្ញាធរ រួមទាំងវិធានការផ្សេងៗទៀត។
កាលពីថ្ងៃទី៤ ខែកុម្ភៈនេះ ក្រសួងសុខាភិបាលចេញសេចក្ដីប្រកាសព័ត៌មានមួយឱ្យក្រុមកូដករណាហ្គាវើលដ៍ទាំងអស់ទៅយកសំណាក ដើម្បីធ្វើតេស្តរកវីរុសកូវីដ-១៩ ក្រោយរកឃើញស្ត្រីជាកូដករមានផ្ទៃពោះម្នាក់បានឆ្លងជំងឺកូវីដ-១៩ ប្រភេទ «អូមីក្រុង» កាលពីថ្ងៃទី២៨ ខែមករា ឆ្នាំ២០២២។
ស្របពេលក្រុមកូដករក្រុមហ៊ុនណាហ្គាវើលដ៍នាំគ្នាចូលរួមធ្វើតេស្តសំណាករកមេរោគកូវីដ-១៩ តាមការចង់បានរបស់មន្ត្រីជំនាញ និងអាជ្ញាធររាជធានីភ្នំពេញ យ៉ាងហោចណាស់មានកូដករ៣នាក់ត្រូវបានសមត្ថកិច្ចឃាត់ខ្លួននិងមិនទាន់ដោះលែងនៅឡើយ ខណៈ៤នាក់ទៀតប្រឈមនឹងការចាប់ខ្លួន ក្រោមការចោទប្រកាន់ថា បានរារាំងការអនុវត្តវិធានការទប់ស្កាត់ជំងឺកូវីដ-១៩។
ការចោទប្រកាន់នោះ កូដករអះអាងថា ពួកគាត់មិនបានប្រឆាំងឬញុះញង់មិនឱ្យអនុវត្តវិធានការសុខាភិបាលនោះទេ ដោយពួកគាត់គ្រាន់តែស្នើឱ្យពន្យារពេលធ្វើតេស្តសំណាកមកធ្វើនៅថ្ងៃទី៥ ខែកុម្ភៈ តែប៉ុណ្ណោះ៕
