រដ្ឋាភិបាលកម្ពុជាផ្ញើសារថ្លែងអំណរគុណដល់បណ្ដាប្រទេសដែលបានផ្ដល់វ៉ាក់សាំងដល់កម្ពុជា ក្នុងការចូលរួមប្រយុទ្ធប្រឆាំងជំងឺកូវីដ-១៩។
ការថ្លែងរបស់លោកនាយករដ្ឋមន្ត្រី ហ៊ុន សែន នេះធ្វើឡើងក្នុងពិធីសម្ពោធបើកឱ្យប្រើប្រាស់កំណាត់ផ្លូវជាតិលេខ៧ នៅខេត្តក្រចេះ នាព្រឹកថ្ងៃចន្ទនេះ។
ក្នុងពិធីនោះ លោកបញ្ជាក់ថា មកដល់ពេលនេះ ការផ្ដល់វ៉ាក់សាំងប្រឆាំងនឹងកូវីដ-១៩ រដ្ឋាភិបាលនៅតែមិនតម្រូវឱ្យបង់ថ្លៃ ដើម្បីធានាដល់សុខភាពសាធារណៈ។
លោកថា៖ «ខ្ញុំសូមអរគុណចំពោះសាធារណរដ្ឋប្រជាមានិតចិន ដែលជាបង្អែកយុទ្ធសាស្ត្រក្នុងការផ្គត់ផ្គង់វ៉ាក់សាំងសម្រាប់ប្រជាជនកម្ពុជា និងថ្លែងអំណរគុណប្រភពគាំទ្រទាំងឡាយដែលបានផ្ដល់វ៉ាក់សាំងមកដល់កម្ពុជា មានជប៉ុន សហរដ្ឋអាមេរិក ចក្រភពអង់គ្លេស ហូឡង់ ប៉ូឡូញ អូស្ត្រាលី ដែលបានផ្ដល់វ៉ាក់សំាង»។
យ៉ាងណា លោកនាយករដ្ឋមន្ត្រីបន្តអំពាវនាវឱ្យពលរដ្ឋគោរពវិធានសុខាភិបាល ដើម្បីកុំឱ្យកម្ពុជាវិលទៅរកស្ថានភាពធ្ងន់ធ្ងរវិញ ដោយសម្អាងថា ពេលនេះខេត្តមួយចំនួនបានកាត់ផ្ដាច់រលកចម្លងជំងឺកូវីដ-១៩បានទាំងស្រុងហើយ លើកលែងតែរាជធានី-ខេត្តមួយចំនួនប៉ុណ្ណោះ ដែលលោកថា នៅថ្ងៃនេះមាន១០៨នាក់ឆ្លង ប្រភេទអូមីក្រុងទាំងអស់៕
