លោកនាយករដ្ឋមន្ត្រី ហ៊ុន សែន ប្ដេជ្ញាចិត្តប្រារព្ធពិធីបុណ្យចូលឆ្នាំខ្មែរឱ្យបាន និងស្នើសុំឱ្យពលរដ្ឋទាំងអស់បន្តគោរពនិងអនុវត្តវិធានសុខាភិបាលឱ្យបានគ្រប់ៗគ្នា ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩។
ក្នុងឱកាសសម្ពោធដាក់ឱ្យប្រើប្រាស់ផ្លូវការកំណាត់ផ្លូវជាតិលេខ៧ ពីចំណុចរង្វង់មូលខ្លាស្ទុះ ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ លោកនាយករដ្ឋមន្ត្រី ហ៊ុន សែន បានថ្លែងថា ដើមចមដែលនាំឱ្យលោកប្ដេជ្ញាចិត្តរៀបចំប្រារព្ធពិធីបុណ្យប្រពៃណីជាតិខ្មែរនេះ ដោយសារកម្ពុជាខកខានប្រារព្ធពិធីបុណ្យនេះអស់រយៈពេល២ឆ្នាំមកហើយ។
ទោះជាយ៉ាងណា លោកនាយករដ្ឋមន្ត្រី ហ៊ុន សែន ថ្លែងបញ្ជាក់ថា បើកម្ពុជាប្រារព្ធពិធីបុណ្យប្រពៃណីជាតិខ្មែរមែន ប្រជាពលរដ្ឋទាំងអស់ ជាពិសេសអ្នកដែលចូលចិត្តសប្បាយរាំលេងនិងច្រៀង ត្រូវរក្សាគម្លាតគ្នា និងបន្តអនុវត្តវិធានសុខាភិបាលឱ្យបានគ្រប់ៗគ្នា ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩។
គួររំឭកថា កម្ពុជាខកខានប្រារព្ធពិធីបុណ្យប្រពៃណីជាតិខ្មែរអស់រយៈពេល២ឆ្នាំកន្លងមកហើយ ចាប់ពីឆ្នាំ២០២០ ដល់ឆ្នាំ២០២១ ដោយសារការឆ្លងរាលដាលនៃជំងឺកូវីដ-១៩។
តាមប្រតិទិន ពិធីបុណ្យប្រពៃណីជាតិខ្មែរ នឹងប្រព្រឹត្តទៅចាប់ពីថ្ងៃទី១៤, ១៥ និងថ្ងៃទី១៦ ខែមេសា ឆ្នាំ២០២២នេះ៕
