លោកនាយករដ្ឋមន្រ្តី ហ៊ុន សែន បានហៅសហស្ថាបនិកគណបក្សសង្រ្គោះជាតិដែលត្រូវបានតុលាការកំពូលរំលាយ ថាជាអ្នកនយោបាយដែលវិភាគសាច់រឿង និងការសម្រេចចិត្តរបស់លោកក្នុងកិច្ចការនយោបាយមិនដែលត្រូវ សូម្បីកិច្ចប្រជុំកំពូលអាស៊ាន-អាមេរិកដែលគ្រោងនឹងចាប់ផ្ដើមក្នុងពេលខាងមុខនេះក្ដី។
ប្រតិកម្មរបស់លោកនាយករដ្ឋមន្ត្រី ហ៊ុន សែន ធ្វើឡើងក្នុងពេលដែលលោកចូលរួមសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ ក្នុងខេត្តក្រចេះ នៅថ្ងៃទី៧ ខែកុម្ភៈនេះ។
លោកនាយករដ្ឋមន្រ្តី ចំអកទៅលោក សម រង្ស៊ី ថាជាអ្នកនយោបាយអង្ករកំប៉ុង ដែលវិភាគសាច់រឿងមិនដែលត្រូវ សូម្បីកិច្ចប្រជុំកំពូលអាស៊ាន-អាមេរិក ដែលវាមិនមានអ្វីត្រូវស្មុគស្មាញផងនោះ។ លោកបន្តថា តាមពិតលិខិតជាផ្លូវការរបស់ប្រធានាធិបតីអាមេរិក លោក ចូ បៃឌិន បានបញ្ជូនមកដល់ដៃលោកជាច្រើនថ្ងៃមកហើយ។ ប៉ុន្តែលោកមិនបានបញ្ចេញវាភ្លាមៗទេ គឺលោកទុករង់ចាំមើលអ្នកធ្វើអត្ថាធិប្បាយដែលមិនដឹងខ្យល់អីចេញច្រកណាជាមុនសិន។
លោក ហ៊ុន សែន បានហៅលោក សម រង្ស៊ី នៅពេលនេះថាជាអ្នកនយោបាយមិនសូវគ្រប់ទឹក ដែលវិភាគខ្វះមូលដ្ឋានពិតប្រាកដ។
លោកបន្តថា៖ «ឥលូវនេះ វា[លោក សម រង្ស៊ី]ហ៊ានចាប់ផ្ដើមធ្វើអត្ថាធិប្បាយមួយទៀតហើយ។ វាថាឱ្យតែលោក ហ៊ុន សែន ហ៊ានទៅអាមេរិក គឺច្បាស់ជាចូលក្នុងកណ្ដាប់ដៃរបស់អាមេរិកស្អីណាទៀតហើយ។ វាទៅជាអញ្ចេះទៅ! បើថាវាឡប់ វាឡប់តែឯងទៅ អាធុនឡប់»។
លោក ម៉ែន សុថាវរិន្ទ្រ មនុស្សដែលស្និទ្ធនឹងលោក សម រង្ស៊ី ហើយក៏ជាតំណាងរាស្រ្តមណ្ឌលកំពង់ធំ មកពីគណបក្សសង្រ្គោះជាតិដែលត្រូវបានតុលាការរំលាយ ថ្លែងថា សារនយោបាយរបស់លោក ហ៊ុន សែន នៅពេលនេះលែងសំខាន់ទៀតហើយ ហើយទឹកមាត់របស់គាត់ហាក់សាប បើធៀបកាលពីមុន។
លោកបន្តថា៖ «ថ្ងៃអន្សាគាត់មកដល់ តាមខ្ញុំមើលទៅ! គាត់និយាយអ្វីក៏ខុសដែរពេលនេះ។ មិនថាតែលោក សម រង្ស៊ី ទេ ឱ្យតែគេនិយាយអ្វី មិនថាប្រជាពលរដ្ឋសាមញ្ញ ឬអ្នកវិភាគណានិយាយហ្នឹង គាត់ប្រតិកម្មភ្លាមៗតែម្ដង។ ក្នុងឋានៈជាថ្នាក់ដឹកនាំគ្រប់ប្រទេស គេមិនដែលប្រតិកម្មបែបហ្នឹងទេ។ អានេះជាទម្លាប់របស់គាត់ទៅហើយ ទៅប្រកាន់គាត់ធ្វើអ្វី»។
ទាក់ទងបញ្ហានេះ លិខិតផ្លូវការរបស់ប្រធានាធិបតីសហរដ្ឋអាមេរិក លោក ចូ បៃឌិន ដែលផ្ញើទៅលោកនាយករដ្ឋមន្រ្តី កាលពីថ្ងៃទី១៤ ខែមករា ហើយត្រូវបានគេចែកចាយជាសាធារណៈ បង្ហាញថា រដ្ឋបាលទីក្រុងវ៉ាស៊ីនតោនទន្ទឹងស្វាគមន៍ធ្វើការជាមួយកម្ពុជាក្នុងឋានៈជាប្រធានអាស៊ានប្ដូរវេន នៅលើទឹកដីអាមេរិកឆាប់ៗខាងមុខនេះ។
ទាក់ទិនរឿងនេះ លោក សម រង្ស៊ី ដែលជាសហស្ថាបនិកគណបក្សសង្រ្គោះជាតិដែលត្រូវបានតុលាការកំពូលរំលាយ បានលើកឡើងនៅក្នុងបណ្ដាញសង្គមហ្វេសប៊ុករបស់លោកកាលពីចុងខែមករា ថាលោក ហ៊ុន សែន ត្រូវបង្ខំចិត្តលុបចោលគម្រោងទស្សនកិច្ចរបស់ខ្លួនទៅសហរដ្ឋអាមេរិក។
លោកបន្តថា ការសម្រេចចិត្តនេះ ក្រោមហេតុផលមួយចំនួនដូចជា ខ្លាចមេដឹកនាំអាស៊ានមួយចំនួនស្ដីបន្ទោសនៅចំពោះមុខលោក ចូ បៃឌិន ពីទង្វើខុសឆ្គងរបស់ខ្លួនទាក់ទងប្រទេសមីយ៉ាន់ម៉ា បើកដៃឱ្យចិនកសាងមូលដ្ឋានសឹកនៅលើទឹកដីកម្ពុជា និងព្រួយបារម្ភពីការចាប់ខ្លួនលោក ពីសំណាក់ប៉ូលិសសហរដ្ឋអាមេរិក FBI ជាដើម។ លើពីនេះទៅទៀត លោក សម រង្ស៊ី អះអាងថា មូលហេតុនេះហើយដែលនាំឱ្យលោក ហ៊ុន សែន មិនហ៊ានទៅជាន់ទឹកដីអាមេរិកនៅពេលនេះ ព្រោះតែខ្លាចភាពអាម៉ាស់ និងការធ្វើបាតុកម្មប្រឆាំងវត្តមានរបស់លោកតែម្ដង។
លោកបណ្ឌិត សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិត យល់ថា សារនយោបាយរបស់មេដឹកនាំនេះបង្ហាញពីភាពអន់ថយនៃអ្នកនយោបាយចាស់វស្សាទៅវិញទេ។ លោកបន្តថា ការយកចាញ់ឈ្នះតាមទម្រង់បែបនេះ គ្រាន់តែជាវិធីដើម្បីបង្ហាញឱ្យមន្រ្តីនៅក្នុងបក្សទាំងកម្រិតមូលដ្ឋាននិងថ្នាក់ជាតិមើលឃើញពីភាពខ្លាំងរបស់ខ្លួនទៅលើដៃគូនយោបាយប៉ុណ្ណោះ។
លោកបន្តថា៖ «គ្រាន់តែលេសដើម្បីលួងទៅសកម្មជនដែលដើរតាមខ្លួន ដើម្បីឱ្យគាត់ថាមេរបស់ខ្លួនគឺជាមេដ៏អស្ចារ្យ ហើយមនុស្សដែលមើលឃើញធ្លុះ ហើយអាចធ្វើឱ្យដៃគូមានភាពច្របូលច្របល់ ឬក៏ថាខ្លួននឹងមានឱកាសដើម្បីឈ្នះទៅលើគូប្រជែងអ៊ីចឹងទៅ »។
ជាការគ្រោងទុក កិច្ចប្រជុំកំពូលអាស៊ាន-អាមេរិកដែលនឹងត្រូវចាប់ផ្ដើមនៅថ្ងៃទី២៦ ខែកុម្ភៈ ត្រូវបានលើកពេលមិនកំណត់ ដោយសារការជាប់គាំងក្នុងកិច្ចប្រជុំថ្នាក់រដ្ឋមន្រ្តីការបរទេសចង្អៀត កាលពីថ្ងៃទី១៨ ខែមករា នៅខេត្តសៀមរាប៕