មេដឹកនាំកម្ពុជាបញ្ជាក់ជំហរថា បញ្ហានៅមីយ៉ាន់ម៉ា (ភូមា) មិនអាចរកច្រកចេញរួចត្រឹម១ឆ្នាំដែលកម្ពុជាធ្វើជាប្រធានអាស៊ានប្ដូរវេននេះទេ ដោយលោកសម្អាងថា មកដល់ពេលនេះ សមាជិកអាស៊ានខ្លះនៅតែប្រកាន់ជំហរទាត់ចោលរបបសឹកមួយនេះចេញពីកិច្ចប្រជុំអាស៊ានដដែល។
ការអះអាងរបស់លោកនាយករដ្ឋមន្ត្រី ហ៊ុន សែន នេះ ធ្វើឡើងក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ នៅខេត្តក្រចេះ នាព្រឹកថ្ងៃចន្ទនេះ។
ក្នុងពិធីនោះ លោក ហ៊ុន សែន ថ្លែងទាំងមិនបញ្ចេញឈ្មោះថា សភាពការណ៍នៅមីយ៉ាន់ម៉ានៅតែមានភាពស្មុគស្មាញមិនអាចដោះស្រាយបានត្រឹមរយៈពេល១ឆ្នាំ អំឡុងកម្ពុជាធ្វើជាប្រធានអាស៊ានប្ដូរវេននាពេលនេះបានទេ។
លោកគូសបញ្ជាក់ថា បញ្ហានេះ ដោយសារតែទស្សនៈខ្លះនៅតែចង់ទាត់ចោលរបបសឹកភូមាដែលលោកហៅថា «រដ្ឋាភិបាលគ្រប់គ្រងអំណាច របស់លោក មីន អ៊ុងឡាំង»។
លោកថា៖ «អ៊ីចឹងបើអ្នកឯងចង់ទាត់ចោលពួកយោធា អ្នកឯងធ្វើសង្គ្រាម៥០ឆ្នាំថែមទៀត សូមអញ្ជើញចុះ! […] ហើយចង់ឱ្យខ្ញុំទៅមួយថ្ងៃដោះស្រាយរឿងសាំញ៉ាំដែល៧០ឆ្នាំហើយនោះ ដែលយោធាគ្រប់គ្រងហើយ ចង់ឱ្យខ្ញុំទៅ១ថ្ងៃហ្អេ ឱ្យធ្វើបាន? អ៊ីចឹងបើអស់លោកណាពូកែ ចាំធ្វើទៅ»។
យ៉ាងណា លោកនាយករដ្ឋមន្ត្រី ហ៊ុន សែន បានបញ្ជាក់ថា ការដោះលែងសាស្ត្រាចារ្យជនជាតិអូស្ត្រាលី និងជាទីប្រឹក្សាសេដ្ឋកិច្ចរបស់លោកស្រី អ៊ុងសាន ស៊ូជី ជាផ្នែកមួយនៃការស្នើឡើងរបស់លោក ក្នុងជំនួបជាមួយលោក មីន អ៊ុងឡាំង កាលពីដើមខែមករា ឆ្នាំ២០២២។
កាលពីថ្ងៃទី៧ ខែមករា ឆ្នាំ២០២២ នាយករដ្ឋមន្ត្រីកម្ពុជាបានធ្វើដំណើរទៅកាន់ប្រទេសមីយ៉ាន់ម៉ា ដើម្បីស្វែងរកដំណោះស្រាយ តបតាមកុងសង់ស៊ីស៥ចំណុចរបស់អាស៊ាន ក្រោយពីរបបសឹកមួយនេះធ្វើរដ្ឋប្រហារដណ្ដើមអំណាចគណបក្សឈ្នះឆ្នោតរបស់លោកស្រី អ៊ុងសាន ស៊ូជី ហើយត្រូវបានគេផាត់ចេញពីកិច្ចប្រជុំកំពូលអាស៊ាន។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា ប្រសិនបើកម្ពុជានៅតែប្រកាន់ជំហរអញ្ជើញរដ្ឋាភិបាលយោធាមីយ៉ាន់ម៉ាចូលរួមកិច្ចប្រជុំអាស៊ាន នោះនឹងជាប់គាំងទាំងក្របខណ្ឌតំបន់និងក្របខណ្ឌសកល។
លោកបានបញ្ជាក់ថា ក្របខណ្ឌសកល ផ្ដោតទៅលើអាស៊ានជាដៃគូ ជាមួយសហរដ្ឋអាមេរិក ដែលមានលិខិតឆ្លើយឆ្លងគ្នានាប៉ុន្មានថ្ងៃនេះ រវាងមេដឹកនាំសហរដ្ឋអាមេរិក លោក ចូ បៃឌិន និងនាយករដ្ឋមន្ត្រីកម្ពុជា ក្នុងឋានៈជាប្រធានអាស៊ាន។
ប៉ុន្តែលោកថា សាររបស់មេដឹកនាំកម្ពុជានាពេលនេះបង្ហាញថា កម្ពុជាបានទុកបញ្ហាមេដឹកនាំយោធាមីយ៉ាន់ម៉ានៅក្រៅឆាក ហើយអាចឱ្យមន្ត្រីដែលមិនមែនជាអ្នកនយោបាយមកចូលរួមវិញ ដែលថាជំហរបែបនេះមិនធ្វើឱ្យអាស៊ានជាប់គាំងនោះទេ។
លោកថា៖ «ការចេញដំណើរដំបូងរបស់កម្ពុជាទៅទស្សនកិច្ចផ្លូវរដ្ឋនៅភូមាហ្នឹង យើងមានបញ្ហាមួយដែលយើងអត់បានជួបរដ្ឋាភិបាលរួបរួមជាតិដែលជារដ្ឋាភិបាលស៊ីវិល យើងអត់បានជួប យើងជួបតែយោធា ហើយយើងឱ្យតម្លៃតែយោធាតំណាងឱ្យភូមាទាំងអស់ អាហ្នឹងជាការយល់ខុសរបស់ពលរដ្ឋភូមា និងសហគមន៍អន្តរជាតិជាមួយកម្ពុជា។ ប៉ុន្តែបច្ចុប្បន្ន កម្ពុជាងាកមកប្រកាន់ជំហរចាស់វិញ [ជំហរអាស៊ាន២០២១] ដូចជាមិនមានឧបសគ្គអីទេ»។
យ៉ាងនេះក្ដី មេដឹកនាំកម្ពុជាបានអះអាងថា ក្នុងឋានៈកម្ពុជាជាប្រធានអាស៊ានប្ដូរវេន និងសមាជិកអាស៊ាន នឹងមិនបោះបង់នូវការខិតខំប្រឹងប្រែង ដើម្បីជំរុញឱ្យរបបសឹកភូមាអនុវត្តកុងសង់ស៊ីសទាំង៥ចំណុចរបស់អាស៊ាន ដែលចំណុចទាំងនោះរួមមាន ត្រូវបិទបញ្ចប់អំពើហិង្សា រៀបចំកិច្ចសន្ទនាក្នុងន័យស្ថាបនាក្នុងចំណោមភាគីពាក់ព័ន្ធ បញ្ជូនជំនួយមនុស្សធម៌ទៅមីយ៉ាន់ម៉ា តែងតាំងប្រេសិតពិសេសដើម្បីសម្របសម្រួលកិច្ចពិភាក្សា និងអនុញ្ញាតឱ្យប្រេសិតពិសេសចូលទៅក្នុងប្រទេសនេះ៕