មន្រ្តីជាន់ខ្ពស់របស់រដ្ឋាភិបាលថ្លែងការពារជំហររបស់លោកនាយករដ្ឋមន្រ្តី ជុំវិញការចោទប្រកាន់របស់មេធាវីការពារក្ដីឱ្យសហស្ថាបនិកគណបក្សសង្រ្គោះជាតិដែលត្រូវបានតុលាការរំលាយ ដោយអះអាងថា តុលាការប្រទេសបារាំងពុំមានឥទ្ធិពលអ្វីក្នុងការចាប់ខ្លួនលោក ហ៊ុន សែន ឡើយ។
ប្រតិកម្មរបស់លោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាលនេះ នៅបន្ទាប់ពីមេធាវីរបស់លោក សម រង្ស៊ី ដែលជាជនជាតិបារាំងលោក ពីជែរ អូលីវីយ៉េ សៀ (Pierre Olivier Sur) ត្រូវបានសារព័ត៌មាន AFP ស្រង់សម្ដីមកចុះផ្សាយកាលពីថ្ងៃទី២ ខែកុម្ភៈ ដោយលើកឡើងថា តុលាការរបស់ប្រទេសបារាំងកំពុងឈានទៅចាប់ខ្លួនលោកនាយករដ្ឋមន្រ្តី ហ៊ុន សែន។
តាមរយៈបទសម្ភាសន៍នេះ លោក ពីជែរ អូលីវីយ៉េ អះអាងថា ប្រសិនបើលោក ហ៊ុន សែន មិនមានអភ័យឯកសិទ្ធិការទូតទេ ប្រហែលពេលនេះ លោកនាយករដ្ឋមន្រ្តីកំពុងនៅក្នុងរង្វង់ក្រចកសេះជំនួសលោក ហ៊ីង ប៊ុនហៀង និងលោក ហ៊ុយ ពិសិដ្ឋ ដែលជាកូនចៅរបស់លោកបាត់ទៅហើយ។
យ៉ាងនេះក្ដី សម្រាប់លោក ផៃ ស៊ីផាន មន្រ្តីនាំពាក្យរដ្ឋាភិបាលបញ្ជាក់ជំហរថា តុលាការប្រទេសបារាំងមិនអាចធ្វើអ្វីស្រេចតែនឹងចិត្តបានឡើយ ម្យ៉ាងវិញទៀត កម្ពុជាមិនមែនស្ថិតក្រោមឥទ្ធិពលប្រទេសបារាំងនោះដែរ។
លោកបន្ថែមថា ក្រៅពីនេះ លោក ហ៊ុន សែន ក៏មិនមែនជាឧក្រិដ្ឋជននោះដែរ ហើយថែមទាំងជាមេដឹកនាំដែលកំពុងកាន់អំណាចកើតចេញពីការបោះឆ្នោតថែមទៀតផង វាមិនមានហេតុផលណាមួយដែលតុលាការបារាំងត្រូវប្រើអំណាចរំលោភលើកម្ពុជាដែលផ្ទុយពីច្បាប់អន្តរជាតិនោះឡើយ។
លោកបន្តថា៖ «ខ្ញុំអត់ជឿ! អត់ជឿតែម្ដង! ទី១ នាយករដ្ឋមន្រ្តីកម្ពុជាមិនមែនជាភេរវករ។ ទី២ មិនមែនជាអ្នកសម្លាប់មនុស្សក្រៅប្រព័ន្ធតុលាការដូចខ្មែរក្រហម ដែលគេហៅថាបនប្រល័យពូជសាសន៍។ ទី៣ យុត្តាធិការបារាំង និងកម្ពុជា ហើយនៅក្នុងគោលការណ៍ច្បាប់ អត់មានកំណត់បែបហ្នឹងផង»។
បើតាមលោក ផៃ ស៊ីផាន មានតែលោក សម រង្ស៊ី ទៅវិញទេ ដែលជាអ្នកប្រព្រឹត្តបទល្មើស ហើយព្យាយាមប្រើប្រាស់វេទិកាអន្តរជាតិនេះ ទម្លាក់កំហុសប្រឆាំងលោក ហ៊ុន សែន។
លោក ម៉ែន សុថាវរិន្ទ្រ មន្រ្តីដែលស្និទ្ធិនឹងលោក សម រង្ស៊ី ហើយក៏ជាតំណាងរាស្រ្តមណ្ឌលកំពង់ធំ មកពីណបក្សសង្រ្គោះជាតិដែលត្រូវបានតុលាការរំលាយ អះអាងថា ការពិតហើយ លោកនាយករដ្ឋមន្រ្តីអាចនឹងត្រូវប្រឈមមុខពីការចាប់ខ្លួនដោយតុលាការប្រទេសបារាំង។ លោកបន្តថា មូលហេតុដោយសារលោក ហ៊ុន សែន ព្យាយាមការពារជនជាប់ចោទដែលជាកូនចៅរបស់លោក និងជាអ្នកស្ថិតនៅពីក្រោយនៃព្រឹត្តិការណ៍គប់គ្រាប់បែកដៃកាលពី២៥ឆ្នាំមុន។
លោកបន្តថា៖ «គេនឹងធ្វើហើយ! ព្រោះឥលូវនេះគេធ្វើមិនបាន ប៉ុន្តែថ្ងៃណាមួយដែលគាត់លែងជានាយករដ្ឋមន្រ្តី អាហ្នឹងគេអាចធ្វើបានហើយ។ តុលាការគេអាចធ្វើបានហើយ»។
ក្នុងព្រឹត្តិការណ៍គប់គ្រាប់បែកដៃចំនួន៤គ្រាប់ចូលក្នុងហ្វូងបាតុករដែលដឹកនាំដោយលោក សម រង្ស៊ី កាលពី២៥ឆ្នាំមុន ពោលកាលពីថ្ងៃទី៣០ ខែមីនា ឆ្នាំ១៩៩៧ បានបណ្ដាលឱ្យមនុស្ស១៦នាក់ស្លាប់នៅនឹងកន្លែងកើតហេតុ និងជាង១០០នាក់ផ្សេងទៀតរងរបួស។ ចាប់តាំងពីថ្ងៃកើតហេតុរហូតមកដល់ពេលនេះ គេនៅរកមិនទាន់ឃើញអ្នកប្រព្រឹត្តបទល្មើសនេះនៅឡើយទេ។
ជុំវិញរឿងក្ដីព្រហ្មទណ្ឌមួយនេះ កាលពីចុងខែធ្នូ ឆ្នាំ២០២១ តុលាការប្រទេសបារាំងបានចេញដីកាឱ្យចាប់ខ្លួនមនុស្ស២នាក់ គឺលោក ហ៊ីង ប៊ុនហៀង និងលោក ហ៊ុន ពិសិដ្ឋ។ បទចោទប្រឆាំងមនុស្សជំនិតរបស់លោកនាយករដ្ឋមន្រ្តីទាំងពីរនាក់នេះ ជាប់ទាក់ទិនការប៉ុនប៉ងសម្លាប់លោក សម រង្ស៊ី ក្នុងព្រឹត្តិការណ៍គប់គ្រាប់បែកពេលនោះ។
ប្រធានការិយាល័យមេធាវីក្រុមអ្នកច្បាប់អមរិន្រ្ទ លោក សុក សំអឿន ក៏ឯកភាពដូចទៅនឹងជំហររដ្ឋាភិបាលដែរថា តុលាការប្រទេសបារាំង ពិតជាមិនមានលទ្ធភាពណាមួយក្នុងការចាប់ខ្លួនលោកនាយករដ្ឋមន្រ្តី ហ៊ុន សែន នោះឡើយ។ លោកបន្តថា ប្រសិនបើតុលាការត្រូវការចាប់ខ្លួនលោក ហ៊ុន សែន មែន លុះត្រាតែលោកត្រូវឆ្លងកាត់ឬចូលក្នុងទឹកដីនៃប្រទេសបារាំង ទើបអាចអនុវត្តដីកានេះបាន។
លោកបន្តថា៖ «បើសិនជាគេចេញបែបហ្នឹង អ្នកដែលត្រូវគេបង្គាប់ឱ្យចាប់ គឺមិនអាចចូលស្រុកបារាំងបានទេ។ បើហ៊ានតែចូល គេនឹងចាប់ តែនៅក្នុងប្រទេសមានស្អី! ក្រៅពីប្រទេសបារាំងក៏អត់ដែរ ព្រោះប៉ូលិសមិនអាចធ្វើសកម្មភាពអីបានភ្លាមៗទេ ហើយបើចូលប្រទេសគេ ត្រូវឆ្លងច្បាប់ប្រទេសគេទៀត»។
ចំណែកលោកបណ្ឌិត ឡៅ ម៉ុងហៃ អ្នកវិភាគសង្គមនិងនយោបាយ ក៏យល់ស្របដែរថា រឿងចាប់ខ្លួនលោក ហ៊ុន សែន ដោយតុលាការប្រទេសបារាំងនេះ វាមិនអាចទៅរួចទេ ព្រោះលោកនាយករដ្ឋមន្រ្តីនៅមានអភ័យឯកសិទ្ធិសភានៅឡើយ។
ផ្ទុយទៅវិញ លោកមើលឃើញថា អ្នកដែលចំណេញពីដំណឹងនេះ គឺលោក សម រង្ស៊ី ឯណោះទៅវិញទេ ដោយថា យ៉ាងហោចណាស់ គេអាចដឹងបានថា តើអ្នកណាជាអ្នកបញ្ជាឱ្យមានព្រឹត្តិការណ៍បង្ហូរឈាមកាលពី២៥ឆ្នាំមុននោះ។
លោកបន្តថា៖ «សម្ដេចតេជោគាត់កំពុងនៅមានអភ័យឯកសិទ្ធិនៅឡើយ ជាក់ស្ដែងគឺកោះហៅគាត់អត់បានទេ។ ចំណែកការផ្សព្វផ្សាយរបស់លោក សម រង្ស៊ី ហ្នឹងគ្រាន់តែបានចំណេញខាងនយោបាយ។ មានន័យថា កាលណាបើគេដឹងឮច្រើនទៅ មហាជនដឹងថាសម្ដេចតេជោមានជាប់ពាក់ព័ន្ធការបោកគ្រាប់បែក ឆ្នាំ១៩៩៧ហ្នឹង»។
លោក ម៉ែន សុថាវរិន្រ្ទ លើកឡើងថា កាលពីឆ្នាំ២០២០កន្លងទៅ តុលាការប្រទេសបារាំងធ្លាប់បានស្នើសុំបើកការស៊ើបអង្កេតក្នុងរឿងក្ដីព្រហ្មទណ្ឌមួយនេះ ប៉ុន្តែត្រូវបានកម្ពុជាបដិសេធ។ ចំណែកមន្រ្តីនាំពាក្យក្រសួងមហាផ្ទៃ ធ្លាប់បានអះអាងជាញឹកញាប់ហើយថា សំណុំរឿងនេះមិនទាន់បានបិទបញ្ចប់នៅឡើយទេ៕
